18 كۇندە سالىنعان اۋرۋحانادا 280 توسەك-ورىن, 6 كلينيكالىق بولىمشە, 28 توسەكتىك رەانيماتسيا بولىمشەسى بار. سونىمەن قاتار گوسپيتال رەنتگەن جۇيەسى, كومپيۋتەرلىك توموگرافيا, ۋلترادىبىستىق دياگنوستيكا اپپاراتتارى, ەندوسكوپيالىق جابدىقتار, وكپەنى جاساندى جەلدەتۋ اپپاراتتارى, مونيتورلار, پەرفۋزورلار سياقتى اپپاراتتارمەن جابدىقتالعان. جاڭا اۋرۋحاناعا 26 ساۋىردەن باستاپ كورونوۆيرۋس ينفەكتسياسىن جۇقتىرعان ناۋقاستار جاتقىزىلدى. قازىر COVID-19 دياگنوزى قويىلعان 251 پاتسيەنت ەمدەلۋدە.
ەلجان ءبىرتانوۆ مودۋلدىك كەشەندە ورنالاسقان «ي.س.جەكەنوۆ اتىنداعى قالالىق كلينيكالىق جۇقپالى اۋرۋلار اۋرۋحاناسى» فيليالىندا ەڭبەك ەتىپ جاتقان دارىگەرلەرمەن جۇزدەستى جانە ناۋقاستاردىڭ دا جاعدايىن سۇرادى. «گوسپيتالدا جاقسى جاعداي جاسالعان, ەمدەلۋدەمىز. مەديتسينا قىزمەتكەرلەرى وتە مۇقيات, ءاردايىم ءسوزىمىزدى جەرگە تاستامايدى جانە قيىن كەزدە ۇلكەن قولداۋ كورسەتتى», دەدى اناستاسيا زاحاروۆا (اتى-ءجونى وزگەرتىلدى).
سونداي-اق مينيستر الماتىعا ءبىر كۇندىك ءىسساپارى اياسىندا بىرقاتار مەديتسينا مەكەمەسىن دە ارالاپ, كەزدەسۋلەر وتكىزبەك. اتاپ ايتقاندا سانيتارلىق-ەپيدەميولوگيالىق ساراپتاما جانە مونيتورينگ عىلىمي-پراكتيكالىق ورتالىعىنا, س.اسفەندياروۆ اتىنداعى قازۇمۋ مەن فارماتسەۆتيكا زاۋىتىنا, ءوندىرىس تسەحىنا بارادى جانە ونداعى باكتەريولوگ, يممۋنولوگ جانە گەنەتيك عالىمدارمەن كەزدەسىپ, COVID-19-دى تالقىلايدى.
