«بۇگىن ءبىز كوپتەگەن ادامدارمەن كەزدەسىپ, ولارمەن سويلەسۋگە مۇمكىندىك الدىق. شىنىندا دا, كوپتەگەن جۇمىسسىز جاندار جۇمىس تابۋعا مۇمكىندىك بەرەتىن, لايىقتى جالاقى الاتىن باعدارلامانىڭ بارىن بىلمەيدى. ءبىز كومەككە جۇگىنگەندەردىڭ بارلىعىنا قول ۇشىن سوزۋعا دايىنبىز. بۇل ءبىر رەتتىك اكتسيا ەمەس, مۇنداي ۇگىت-ناسيحات تۇراقتى تۇردە جۇزەگە اسادى», - دەيدى ەرىكتى باقتيار ەسەنتاەۆ.
ايتا كەتسەك, ەلوردادا «جۇمىسپەن قامتۋ جول كارتاسى - 2020-2021» باعدارلاماسى اياسىندا 15 مىڭنان استام ادامدى جۇمىسپەن قامتۋ جوسپارلانعان. قازىرگى ۋاقىتتا قالالىق جۇمىسپەن قامتۋ ورتالىعى مىناداي الگوريتم بويىنشا جۇمىس ىستەيدى: ورتالىق قاجەتتى بىلىكتى مامانداردى ىرىكتەپ, ولاردى جۇمىس بەرۋشىلەرمەن اڭگىمەلەسۋگە جىبەرەدى.
بۇگىندە جول كارتاسى بويىنشا جالاقى 85 مىڭنان جوعارى. جۇمىسپەن قامتۋ جول كارتاسى اياسىندا 1,5 مىڭعا جۋىق ادام جۇمىسقا ورنالاستى. الەۋمەتتىك سالا, تۇرعىن ءۇي-كوممۋنالدىق شارۋاشىلىق, ينجەنەرلىك جانە كولىك ينفراقۇرىلىمى, سونداي-اق ەلدى-مەكەندەردى اباتتاندىرۋ ماقساتىندا ينفراقۇرىلىمدىق جوبالاردى ىسكە اسىرۋ جوسپارلانعان.
