بۇعان دەيىن كوروناۆيرۋسقا قارسى ۆاكتسينانى بيولوگيالىق قاۋىپسىزدىك پروبلەمالارى عىلىمي-زەرتتەۋ ينستيتۋتىنىڭ ازىرلەگەنى جانە ونىڭ دايىندالۋ بارىسى جونىندە كەڭىرەك تارقاتىپ جازعانبىز. اتالعان وتاندىق ءونىم قازاقستان اۋماعىندا COVID-19 ينفەكتسياسىن جۇقتىرعان ادامداردان بولىنگەن ۆيرۋس شتاممىنىڭ نەگىزىندە جاسالدى.
ءبىلىم جانە عىلىم ءمينيسترى اسحات ايماعامبەتوۆ وسىنداي ناتيجەگە قول جەتكىزگەن عىلىمي-زەرتتەۋ ينستيتۋتىنىڭ قىزمەتكەرلەرىن قۇتتىقتادى. مينيستر جولداعان جەدەلحاتتا:
«بۇل – قازاقستاندىق عىلىمنىڭ مەملەكەتىمىزدىڭ بيولوگيالىق قاۋىپسىزدىگىن قامتاماسىز ەتۋگە قوسقان ەلەۋلى ۇلەسى, سونداي-اق ەلدىڭ مىقتى عىلىمي الەۋەتىنىڭ دالەلى. ينستيتۋت ۇجىمى قاۋىپتى جانە اسا قاۋىپتى اۋرۋلارعا قارسى ۆاكتسينالاردىڭ جاڭا تۇرلەرىن ازىرلەۋدە ءوز ماڭىزدىلىعىن تاعى ءبىر مارتە دالەلدەدى», دەلىنگەن.
مىنەكەي, ەندى قازاقستان رەسمي تۇردە COVID-19 ۆيرۋسىنا قارسى يناكتيۆتەندىرىلگەن ۆاكتسينانى ازىرلەۋشى ەلدەردىڭ قاتارىنا قوسىلدى. دەمەك, ينستيتۋت عالىمدارى كلينيكاعا دەيىنگى سىناق جۇرگىزۋدى باستايدى.
ايتا كەتەيىك, بيولوگيالىق قاۋىپسىزدىك پروبلەمالارى عىلىمي-زەرتتەۋ ينستيتۋتى قاۋىپتى جانە اسا قاۋىپتى اۋرۋلارعا قارسى ۆاكتسينالاردىڭ 67 ءتۇرىن, 15 تەست-جۇيە مەن 30-دان استام بيوپرەپاراتتاردى ازىرلەپ, وندىرىسكە ەنگىزگەنىن ەستەرىڭىزگە سالا كەتەيىك. ولاردىڭ اراسىندا قۇستاردىڭ جوعارى پاتوگەندى تۇماۋى مەن جوعارى پاتوگەندى شوشقا تۇماۋىنا, نودۋليارلىق دەرماتيتكە قارسى ۆاكتسينالار, سونداي-اق برۋتسەللەزگە قارسى جاڭا ۆەكتورلىق ۆاكتسينا دا بار.
