«ەل ءىشى – ونەر كەنىشى» دەگەن اتالى ءسوز تەگىن ايتىلماعان. تەك وسى ۋاقىتقا دەيىن بۋلىعىپ جاتىپتى. قاينار بۇلاقتىڭ كوزىن اشقان, شالعايداعى شەبەرلەرگە دەم بەرگەن, جالاۋىن جەلبىرەتكەن ەلباسى نۇرسۇلتان نازارباەۆتىڭ «بولاشاققا باعدار: رۋحاني جاڭعىرۋ» ماقالاسىنىڭ سەرپىنى. سارى ساعىمعا ورانعان شالقار دالانىڭ توسىندەگى زامانداستارىمىزدىڭ كوكىرەگىندەگى قىزدىڭ جيعان جۇگىندەي قاتتالىپ جاتقان كوركەم دۇنيەدە ءسال-ءپال عانا ءوسىرىپ ايتقاندا, شەك جوقتاي. نەشە ءتۇرلى زاتتان جاسالعان ءارالۋان بۇيىمدار. حاس شەبەردىڭ قايتالانباس عاجايىپ تۋىندىسى ىسپەتتى. قاراپ تۇرىپ شىن شەبەرلەر اۋىلدا جاتىر ەكەن عوي دەر ەدىڭىز. تەرىدەن, اعاشتان, بالشىقتان جاسالعان قانشاما بۇيىم. بىرىنەن-ءبىرى وتەدى, بىرىنەن-ءبىرى قىزىق. قايسىسى بولسىن كوز تارتىپ, كوڭىل ارباپ تۇر.
ەڭ العاش كوپشىلىك نازارىنا ۇسىنىلعان قولدانبالى-ساندىك تۋىندالارىنىڭ كورمەسى جاقسى اۋىلىنداعى مادەنيەت ۇيىنە قويىلعان 2018 جىلعى كورمەدەن باستالعان. اۋداننىڭ ءار ەلدى مەكەنىندە تۇراتىن 33 شەبەردىڭ 300-دەن استام ەڭبەگى كورەرمەندى تاڭ-تاماشا قالدىرعان. جاقسىنىڭ جالپاق دالاسىندا تاپ وسىنشالىق كوكىرەگى وياۋ, قولى شەبەر ادامدار تۇرادى دەپ بۇرىن-سوڭدى ويلاماعان دا بولار. جاسامپاز جارقىن ءومىردى بەينەلەيتىن كەسكىننەن تۇلا بويىڭا بەيمالىم جىلۋ تارايتىنداي. كوڭىلىڭە قۋانىش سازىن دارىتاتىنداي.
ءار شەبەردىڭ ەڭبەگى جەكە-جەكە باعالانىپ, جەتىستىگى ايتىلعان. وسى جەردە تاجىريبەلى شەبەرلەردىڭ شەبەرلىك سىنىپتارى دا وتكىزىلدى. تالاپتىلار عانا ەمەس, كورەرمەننىڭ ىشىندەگى قولى ەپسەكتىلەرى دە قاتىسىپ, قىر-سىرىن ۇعىنعان. ءسويتىپ جاقسىنىڭ جاقسى ءىسى ات تۇياعى جەتەتىن اۋماققا تەگىس تارادى. اتباسار, ەسىل, جارقايىڭ اۋداندارىنا كوشپەلى كورمە ۇيىمداستىرىلىپ, ونەگەنىڭ ءورىسى كەڭەيە ءتۇستى. كەيىن «اقمولا جۇلدىزدارى» حالىق شىعارماشىلىق وبلىستىق كورمەسىنە قاتىسىپ, تالانتتىلاردىڭ ءتالىمدى ءىسى تالايعا بەلگىلى بولدى. وبلىس ورتالىعىنىڭ تۇرعىندارى دا شالعايدان كەلگەن شىعارمالاردىڭ شىرايىن جوعارى باعالادى.
وسى جوبا شەڭبەرىندە دەرەكتى فيلم ءتۇسىرىلدى. ەل ىشىندەگى ونەرلىنىڭ ءوز ەڭبەگىنەن قاناعات تاۋىپ, كوكىرەگى ماقتانىش سەزىمى كەرنەيتىن ءسات تۋدى. ولار دا قاناتتانىپ, مارقايىپ قالدى. تالاي تالانت يەسىنە قۋانىش سىيلاعان جوبا ءالى دە جالعاسپاق. جاقسىداعى جاقسى ونەر وتكەن تاريحتىڭ ءوڭىن ۋاقىت توزاڭىنان ارشىپ الىپ, كەيىنگى جاسقا ونەگە ەتۋمەن قاتار, بولاشاقتىڭ باعدارىن اينىتپاي سىلتەيتىن تەمىرقازىق ىسپەتتى دۇنيە. ويتكەنى شەبەرلەردىڭ ويىن ونعا, ساناسىن سەگىزگە ءبولىپ, بويىنداعى بار ءبىلىم-بىلىگىن سارقا جۇمساپ جاساعان دۇنيەلەرىنىڭ جالپى مازمۇنى زامانداستارىمىزدىڭ بويىنداعى قۇندىلىقتاردى ءبىر ارنادا جيناقتاپ, ورتاق رۋحاني بايلىقتى ەسەلەي تۇسەدى.
اقمولا وبلىسى,
جاقسى اۋدانى
