«تسەنترالنىي» شاعىن اۋدانىنداعى ءبىر-بىرىنە جاپسارلاسا سالىنعان سپورتتىق الاڭ سول توڭىرەكتىڭ تۇرعىندارىنا تولى. ولاردىڭ جاس مولشەرى دە ءارتۇرلى. سولاردىڭ اراسىنان كەشەگى كەڭەس وداعى كەزىندە بوكستان كوكشەتاۋ وبلىسىنىڭ نامىسىن لايىقتى قورعاعان الپىستىڭ اسقارىنداعى عالىمجان ايباسوۆ, ەرعالي ەسكەندىروۆ, ەرىك جۇسىپوۆتەردى كورىپ, كوڭىلىمىز مارقايىپ قالدى.
– كارانتين رەجيمى از-كەم جەڭىلدەتىلگەننەن كەيىن وتباسىمىزبەن وسى سپورت الاڭىنا كەلىپ, تاڭعى جاتتىعۋلار جاساپ ءجۇرمىز. نەمەرەلەرىممەن جاستى بالعىن بوكسشىلاردىڭ دايىندىعىن كورىپ, وسىدان جارتى عاسىر بۇرىنعى شارشى الاڭداعى شايقاستارىمدى كوز الدىما ەلەستەتەمىن. سپورتشى ءۇشىن قانداي جاعدايدا بولماسىن بابىندا بولۋ قاجەت. مىنا بالالاردان سول قاسيەتتى كورىپ قۋانامىن, – دەيدى بوكس ارداگەرى عالىمجان ايباسوۆ.
شاعىن عانا توپپەن جاتتىعۋ جۇرگىزىپ جاتقان بوكس باپكەرىن اڭگىمەگە تارتتىق.
– كۇن جىلىنعالى وسى توڭىرەكتە تۇراتىن بىرنەشە بالانى جاتتىعۋعا شاقىردىم. ولارمەن كارانتين ەرەجەسىنە ساي ارنايى باعدارلامامەن جۇمىس ىستەيمىن. فيزيكالىق دايىندىققا ەرەكشە ءمان بەرەمىز. بوكستىڭ وزگە دە ادىستەرىن ۇيرەتىپ جاتىرمىن. ارا قاشىقتىقتى قاتاڭ ساقتايمىز, – دەيدى باپكەر عايدار ساتانوۆ.
تازا اۋادا دايىندىق جاساپ جاتقان ءجاسوسپىرىم بوكسشىلاردىڭ اراسىندا قالا, وبلىس چەمپيونى اتانىپ ۇلگەرگەن ورەڭدەر دە از ەمەس.
ءبىراز ۋاقىت بوكس زالىنا بارماعان بالعىنداردىڭ تازا اۋادا جاتتىعۋى ولاردىڭ بويىن سەرگىتىپ, شەبەرلىكتەرىن شيراتا تۇسۋدە. جاتتىعۋدان سوڭ ورەڭدەر بوكس ارداگەرى عالىمجان ايباسوۆ اتالارىمەن ەمەن جارقىن اڭگىمەلەسىپ, باتاسىن الدى.
كوكشەتاۋ قالاسى.
