«اۋىل – ەل بەسىگى» جوباسىنىڭ نەگىزگى مىندەتى – اۋىل تۇرعىندارىنىڭ ءومىر ءسۇرۋ ساپاسىن جاقسارتۋ. بۇل دەگەنىمىز, الەۋمەتتىك-ينجەنەرلىك ينفراقۇرىلىمدى جاڭارتۋ, الەۋمەتتىك يگىلىكتەردىڭ قولجەتىمدىلىگىن ارتتىرۋ جانە جايلى ورتا قالىپتاستىرۋ.
– «اۋىل – ەل بەسىگى» جوباسى اياسىندا ءبىزدىڭ ەلدىمەكەنگە وسى جىلى 6 باعىت بويىنشا 1 جارىم ميلليارد تەڭگە ءبولىندى. ونىڭ 4-ءۋى جولداردى ورتاشا جوندەۋ جۇمىستارىنا, 1-ءۋى «كوكشە» مادەنيەت ۇيىنە كۇردەلى جوندەۋ جۇگىزۋگە, تاعى 1-ءۋى جاڭا قازاندىقتان ەلدىمەكەننىڭ كوشەلەرى بويىنشا وتەتىن جىلۋ جۇيەلەرىنە باعىتتالدى,–دەيدى كراسنىي يار سەلوسىنىڭ اكىمى نۇرلان ايسين.
جوسپارلانعان جۇمىستار 5-ءشى ساۋىردەن باستاپ ىسكە اسۋدا. ارنايى تەحنيكالاردىڭ كۇشىمەن 100 مىڭ شارشى مەتر اۋماققا توپىراق توگىلدى. سونداي-اق, 79 مىڭ شارشى مەتر جولداردىڭ جارتىسىنا قيىرشىق تاس توسەلدى.
– بۇگىندە 6-7 كوشە اسفالتتاۋعا دايىن تۇر. اياقتاۋ مەرزىمى قىركۇيەك ايىنا دەيىن, الايدا, ءبىز ونى ەرتەرەك بىتىرەمىز دەپ وتىرمىز. وسى اپتانىڭ اياعىندا اسفالتتاۋ جۇمىستارىن باستايمىز,–دەيدى «كوكشە اگروينۆەست» سەرىكتەستىگىنىڭ ينجەنەرى رۋسلان بايجىگىتوۆ.
«جول اكتيۆتەرىنىڭ ساپاسى» رەسپۋبليكالىق ورتالىعىمەن كەلىسىم شارت جاسالعان. بارلىق تاۋارلاردىڭ ساپاسى زەرتحانالىق ءادىس ارقىلى تەكسەرىلۋدە. جالپى, كراسنىي يار اۋىلىندا 24 كوشەدە جانە «نۇرلى كوش» ىقشام اۋدانىندا جوندەۋ جۇمىستارى جاسالۋ قاجەت. ولاردىڭ جالپى اۋماعى 25 شاقىرىم. جوندەۋ جۇمىستارىنا 25 مامان مەن 23 تەحنيكا جۇمىلدىرىلعان. بۇل جۇمىستار 31 تامىزعا دەيىن اياقتالماق.
