قازاقستان رەسپۋبليكاسىنىڭ قورعانىس ءمينيسترى ادىلبەك جاقسىبەكوۆ رەسەي فەدەراتسياسىندا سىرتقى ىستەر مينيسترلەرى كەڭەسىنىڭ, قورعانىس مينيسترلەرى كەڭەسى مەن ۇقشۇ قاۋىپسىزدىك كەڭەسى حاتشىلارى كوميتەتىنىڭ جانە ۇقشۇ ۇجىمدىق قاۋىپسىزدىك كەڭەسى سەسسياسىنىڭ وتىرىسىنا قاتىستى.
قازاقستان رەسپۋبليكاسىنىڭ قورعانىس ءمينيسترى ادىلبەك جاقسىبەكوۆ رەسەي فەدەراتسياسىندا سىرتقى ىستەر مينيسترلەرى كەڭەسىنىڭ, قورعانىس مينيسترلەرى كەڭەسى مەن ۇقشۇ قاۋىپسىزدىك كەڭەسى حاتشىلارى كوميتەتىنىڭ جانە ۇقشۇ ۇجىمدىق قاۋىپسىزدىك كەڭەسى سەسسياسىنىڭ وتىرىسىنا قاتىستى.
سوچيدە, كەشە تۇسكە دەيىنگى مەزگىلدە ۇجىمدىق قاۋىپسىزدىك شارتى ۇيىمى قورعانىس, سىرتقى ىستەر مينيسترلەرى مەن قاۋىپسىزدىك كەڭەسىنىڭ حاتشىلارى بىرقاتار ماسەلەنى قاراستىردى. ۇقشۇ باس حاتشىسى نيكولاي بورديۋجا قىرعىز رەسپۋبليكاسىنىڭ 2013 جىلى ۇيىمعا توراعالىق ەتۋى كەزەڭىندە ۇقشۇ ۇقك-ءنىڭ جەلتوقسان (2012) سەسسياسى شەشىمدەرىنىڭ ورىندالۋى, بىشكەكتەگى ۇقشۇ-عا مۇشە مەملەكەتتەر باسشىلارىنىڭ بەيرەسمي كەزدەسۋىنىڭ جانە ۇقشۇ قىزمەتىنىڭ باسىم باعىتتارىنىڭ جۇزەگە اسىرىلۋى جونىندە حابارلادى.
وتىرىسقا قاتىسۋشىلاردىڭ نازارى نەگىزىنەن كەلەشەكتە ۇيىمنىڭ تاجىريبە جۇزىندە سىرتقى ساياسي ۇيلەسىمدىلىگى شارالارىنىڭ ارتۋىنا, اسكەري قۇرامداس بولىگىنىڭ نىعايۋىنا, قاۋىپ-قاتەرگە قارسى جەدەل الدىن الۋ شارالارىنا, سونداي-اق, ۇيىم قىزمەتىنىڭ قۇقىقتىق, قارجىلىق جانە اقپاراتتىق قامتاماسىز ەتىلۋىنە اۋدارىلدى.
بىرىككەن سەسسيا وتىرىسىنىڭ كۇن تارتىبىنە 2020 جىلعا دەيىنگى كەزەڭدە ۇقشۇ ۇجىمدىق قاۋىپسىزدىگى جۇيەسى باسقارۋ ورگاندارىنىڭ بىرلەسىپ جۇزەگە اسىراتىن جەدەل جانە جاۋىنگەرلىك دايىندىعى جانە كۇشتەرى مەن قاراجاتىن قالىپتاستىرۋ ماسەلەلەرى ەنگىزىلدى.
– ۇيىمنىڭ اسكەري قۇرامداس بولىگىنىڭ دامۋى ءۇشىن ۇجىمدىق جەدەل دەن قويۋ كۇشتەرىنىڭ قۋاتىن ارتتىرۋعا باسا كوڭىل ءبولۋ قاجەت. بۇل ۇستانىمدى بىشكەكتە اعىمداعى جىلعى مامىر ايىندا ۇقشۇ-عا مۇشە مەملەكەتتەر باسشىلارىنىڭ بەيرەسمي سامميتىندە قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆ قولداعان بولاتىن, – دەدى ۇيىم شەڭبەرىندەگى اسكەري ىنتىماقتاستىقتىڭ باسىمدىعى جونىندە قورعانىس ءمينيسترى ادىلبەك جاقسىبەكوۆ.
تۇستەن كەيىن ۇقشۇ-عا مۇشە مەملەكەتتەر باسشىلارىنىڭ قاتىسۋىمەن ۇجىمدىق قاۋىپسىزدىك كەڭەسى سەسسياسىنىڭ كەڭەيتىلگەن پلەنارلىق وتىرىسى ءوتكىزىلدى.
ۇقشۇ ۇجىمدىق قاۋىپسىزدىك كەڭەسى سەسسياسىنىڭ قورىتىندىسى بويىنشا قاتىسۋشىلار بىرلەسكەن كومميۋنيكەگە قول قويدى.
«ەگەمەن-اقپارات».
