كىتاپ بۇدان بۇرىن جەڭىستىڭ 50,60,65,70 جىلدىقتارىنا ارناپ جارىق كورگەن «بوزداقتار», «تاعزىم» كىتاپتارىنىڭ جالعاسى بولىپ تابىلادى. ماڭعىستاۋ وبلىسىنىڭ قۇرمەتتى ازاماتى قويلىباي قاراجانوۆتىڭ قۇراستىرۋىمەن شىققان كىتاپ ەلى ءۇشىن قۇربان بولعان جاۋىنگەرلەر رۋحىنا تاعزىم ەتۋگە, جاس ۇرپاقتى تاربيەلەۋگە, ەل باسىنا كۇن تۋعاندا اجالمەن بەتپە-بەت تۇرعان بابالارىنىڭ ەرلىگىن ۇلگى ەتە وتىرىپ, پاتريوتتىق سەزىمدى قالىپتاستىرۋعا, سونداي-اق قيىن كەزدە ەل قورعاعان اعا بۋىن وكىلدەرىنىڭ ەسىمىن ۇرپاق جادىندا جاڭعىرتۋعا نەگىزدەلگەن.
ماڭعىستاۋ وڭىرىنەن ەكىنشى دۇنيەجۇزىلىك سوعىسقا 6186 ادام اتتانىپ, ونىڭ 4942-ءسى سوعىس وپەراتسيالارىنا قاتىسسا, 1244-ءى جۇمىسشى باتالونىنا الىندى. وسى ازاماتتاردىڭ ۇشتەن ەكىسى تۋعان جەرگە ورالمادى.
جاڭادان جارىق كورگەن «تاعزىم-5» جيناعى كىتاپقا ەنگەن بارلىق مايدانگەرلەر مەن تىل ارداگەرلەرىنىڭ ۇرپاقتارىنا, وبلىستاعى كىتاپحانالار مەن ءبىلىم بەرۋ ۇيىمدارىنا, مەملەكەتتىك مەكەمەلەرگە تەگىن تاراتىلىپ بەرىلەدى.
ەل باسىنا كۇن تۋعاندا سوعىسقا اتتانعان ەرلەر مەن ەڭبەك مايدانىندا ەرلەردەن كەم ەمەس تەر توككەن انالاردىڭ ەرلىگى – ماڭگى ەستە جانە ۇنەمى ۇلگى.
ماڭعىستاۋ وبلىسى
