رۋحانيات • 06 مامىر، 2020

قۇرساقتا قالعان بالا

586 رەت كورسەتىلدى

جاقسىنى كورۋ، ءجۇزى جىلى، ءسوزى ءتۇزۋ اداممەن تىلدەسۋدىڭ ءوزى ءبىر عانيبەت. شيپاجايعا بارعاندا، ەمنەن كەيىن توپ-توپ بولىپ جۇرگەندەردىڭ اراسىنان يمان ءجۇزدى بىرەۋ جىلى ۇشىراسا، تىلدەسۋگە ۇمتىلاتىن ەجەلگى ادەتىم بار. بۇل جۋرناليستەر قاۋىمىنىڭ تابيعاتىنا بىتكەن وزىندىك ءبىر ەرەكشەلىگى بولسا كەرەك. وتكەن جىلى سارىاعاشقا تىنىعۋعا بارعاندا ەڭسەسى بيىك، جەتپىستەن اسقان كىسى كەيدە جاياۋلاتىپ جۇرەدى، كەيدە ەسىكپەن توردەي اق ء«دجيپتىڭ» تىزگىنىن قولىندا ۇستايدى. «ە، مىقتىنىڭ ءبىرى بولدى عوي!» – دەدىم ىشتەي. بىراق جاياۋ جۇرسە دە، كولىكپەن كەلە جاتسا دا سالەمدەسۋ يشاراسىنان جاڭىلماي، باسىن يزەپ، كىسىلىگىن كورسەتىپ جۇرەدى. سۇراستىرا كەلسەم «اق-تىلەك» دەگەن شيپاجايدىڭ قوجايىنى ەكەن. ءىرى مەكەمەنىڭ ءىرى باستىعى جان تىنىشتىعىن ادەمى ويلاستىرعان بولدى عوي دەدىك ىشتەي، پەندەلىككە سالىپ.

اقىرى ديدارلاسۋدىڭ ءساتى ءتۇستى. سويلەستىك. الپاۋىت مەكەمە باس­قارعان ءىرى باستىق بولماپتى. اۋدان كولەمىندە قىزمەت جاساپتى. «ەكى جىلدان كەيىن 80-گە كەلەمىن»، دەدى. بويى بيىك. ءسوزى شيراق. وي بايلامى تەرەڭ، لايسىز. «ەكى انا­نى تەل ەمگەن «تەنتەك» ەدىم»، دەپ جىلى جىميدى دا: «اناۋ، قوجىر-قوجىر توبەنىڭ ەتەگىندەگى شيپاجايدىڭ يەسىمىن. ونىڭ جۇرت­قا قىزمەت ەتىپ جاتقانىنا ءۇش جىل­عا تايادى»، دەگەندى ءسوز اراسىنا قو­سىپ قويدى.

وي ءبولىسۋ ۇستىندە اڭعار­عا­نىمىز، ارعى زاتىندا تەكتىلىك با­رى بىردەن كورىنىپ تۇردى. كىسىلىگى باسىم، ىزەتتى. اتى-ءجونى – تىلەك مىڭجاساروۆ بولىپ شىقتى. «اسىل اجەم ۇلتايدىڭ ايتۋىنا قارا­عاندا 1942 جىلى، سۇراپىل سوعىس شاڭداتىپ جاتقاندا، جاز ماۋسىمىندا ءومىر ەسىگىن اشىپپىن. اكەم مايدانعا اتتانعاندا – التى ايلىق شارانا – انا قۇر­ساعىندا قالىپتى. كەتىپ بارا جاتىپ، «ۇلتۋار امان بوسانسا، اتىن تى­لەكتەس قويىڭىزدار!» دەپتى. اجەم مەن انامنىڭ جانارلارى جاس­قا تولىپ ارتىندا قالعان. اكەم الگى تىلەگىن مايدانعا بارا جاتىپ، جول بويى ەلگە جازعان حاتىندا تاعى قايتالاپتى. ونداعى ويى اماندىقپەن ورالۋعا تىلەكتەس بولسىن دەگەن شىعار. ول كەزدە اسىل اجەم 65 جاستا بولسا، اياۋلى انام وسى كۇنى قىز جاسى دەپ جۇرگەن 24-تەگى ۋىزداي كە­لىنشەك ەكەن»، دەپ ءبىر تىنىستاپ الدى دا اكەسىنىڭ 11 اعايىندى: 10 ۇل، 1 قىز ەكەنىن ايتىپ، 9 ۇل ەر­تە و دۇنيەلىك بولعانىن، ءبىر ۇل، ءبىر قىز سارقىتقا قالعانىن العا تارتتى. ون سەگىزگە كەلگەندە قىز دا ماڭگىلىككە بەت تۇزەپتى.

«جالعىز بالانى جەتەلەپ ءجۇ­رىپ ەندى جەتتىم بە دەگەندە، اجەم­نىڭ ۇلىن، انامنىڭ سەرىگىن 1941 جىلى باستالعان سوعىسقا اكە­تىپتى. شەشەم: «اكەڭ مايدانعا ات­تان­عاندا سەن دە ءبۇيىرىمدى بۇل­كىل­دەتكەنسىڭ»، – دەيتىن. ونىڭ راس، وتىرىگىن قايدام. جارىق دۇ­نيەگە مەن كەلگەن سوڭ اكەمنىڭ ءسوزىن ەكى ەتپەي اجەم: «نەمەرەمنىڭ اتى – تىلەكتەس! مىڭجاسارىمنىڭ ورالۋىنا تىلەكتەس بولادى، ق ۇلىنىم!» دەپتى اعىنان جارىلىپ. اجەم تۋ تۋرالى كۋالىگىمدى انە-مىنە دەپ ءجۇرىپ ءبىر جىلعا كەشىكتىرىپ الىپتى. ونداعى ويى «بۇل دا ەرتەڭ اس­كەرگە بارادى بىرەۋدەن تاياق جەپ قالا ما، قارۋ اسىنعاندا تىزەسى دىرىلدەپ جۇرە مە، ءبىر جىلعا بولسا دا ەسەيگەنى دۇرىس قوي»، دەگەن-اۋ شاماسى. «اۋزى كۇيگەن ءۇرىپ ىشە­دى»، دەپ اجەڭ سەنىڭ باسىڭنان قۇس ۇشىر­ماي ءوتتى مىنا جالعاننان وبەكتەپ ءجۇرىپ، دەيتىن انام».

وسى ءسات ول باسىن تومەن سالىپ ەدى، ءتىپ-تىك قوس جاۋىرىنى ەڭ­كىش تارتىپ، ديدارى الدەنەشە وزگەرىپ، ماڭدايداعى ءاجىم ىزدەرى تاۋ ساعاسىنىڭ سوقپاعىنداي ەلەس­تەپ كەتتى.

«قازىر ەرتەگى سەكىلدى ەستىلەر. سو­عىس كەزىندە جۇرەكتى ءبىر ءۇزىم قارا نان جالعاپ، ءبىر جۇتىم سۋ ءشولدى باسقان. انام ماقتا ەگىپ، ماق­تا تەرگەن. اۋىر بەينەتىنە 1-1،5 كيلو بيداي تيەتىن بولعان. سونى تالعاجاۋ ەتىپپىز. ول كەزدە جۇمىستىڭ بارلىعى دەرلىك قولمەن اتقارىلاتىن. ە، قاراعىم، ەر ادامدار مايداندا، ايەلدەر تىلدا ەرلىك كورسەتتى. ب ۇلىڭعىرلاۋ ەسكە تۇسەدى. ول كەزدىڭ ايەلدەرى شەتىنەن قايراتتى، قارۋلى بولاتىن. تاڭ قىلاڭ بەرە ماقتالىققا كەتەدى، ءتۇننىڭ ءبىر ۋاعىندا كەلەدى. سودان دا شىعار، مەن انامدى كوپ كورە بەرمەيتىنمىن. اجەمنىڭ قول­تىعىندا ءجۇرىپپىن. مىنا ءبىر وقيعانى ەستىگەندە قۋ جانىمدى وسى كۇنگە دەيىن قويارعا جەر تاپپاي، قينالاتىنىم بار. ول تۇستا ماقتا تەرگەندە قاۋاشاقتا قالىپ قويمادى ما دەپ باقىلايتىندار كوپ بولىپتى. ءبىر جولى سونداي تەكسەرگىش شولاق بەلسەندى اناما: «ماقتانىڭ قاۋاشاعىندا ماقتا قالىپ قويعان، سەن حالىق جاۋىسىڭ دەپ، شەشەمدى اتىن اتاماي-اق قويايىن، ءبىر بريگادير باسىنا قام­شى ءۇيىرىپ، جاۋىرىنىنا اياماي سىلتەپتى. ء«ورىم ءىزى بىلەۋ-بىلەۋ بولىپ قالدى»، دەپ كەيىن ەسىنە تۇسسە انام وكسىگىن باسا الماي «مىڭجاسار بولسا، ماڭىمنان جۇ­رەر مە ەدى وندايلار»، – دەيتىن. ءوز قولىم ءوز اۋزىما جەتكەندە ال­گى بريگاديردى ىزدەسەم، ومىردەن ءوتىپ كەتىپتى. كىم ءبىلسىن، زامان سولاي بولدى ما، الدە اباي ايتقان زامان­عا كۇيلەگەندەردىڭ كۇيكى تىرلىگى قامشى سىلتەتتى مە، و جاعىن تاپ باسىپ ايتا المايمىن»، دەگەن قاريا ويعا شومىپ ءبىراز ءۇنسىز قالدى.

تىلەك مىڭجاسار ۇلى اجەسى مەن اناسىن ەسكە العاندا قاتتى تول­قىپ: «قوس بايتەرەگىمنىڭ قادىرىنە جەتتىم بە، جەتپەدىم بە؟!» دەي بەرەدى. ولاردىڭ تالاي ويراندى كورگەنىن، اسىرەسە مىڭ جاسار ما ەكەن دەگەن ارمان ءۇمى­تىن ۇكىلەپ، بالاسىنىڭ اتىن مىڭ­جاسار قويىپ، سونىڭ ەرتەڭى ءۇشىن بار ءومىرىن ارناعان، بار قيىن­دىققا توزگەن اجەسىن ەسكە العاندا جانارى جاساۋراپ كەتە بەرەدى. كەيۋانا 94 جاسقا كەلگەنگە دەيىن مىڭجاسارىنان ءۇمىتىن ۇز­بەي، ءتىپتى «مىڭجاسارعا بارام»، دەپ پويىزعا وتىرىپ، ءبىراز جەردى شارلاپ قايتقانىن دا ەسكە ءتۇسىردى. «ول ءتىرى، كەلەدى دەپ دۇعا دا باعىشتاتپادى. سوعىس كەزىندە ويدان شىعاردى ما ەكەن، الدە شىن با اجەم: «ۇلتۋار، تۇندە ءتۇس كوردىم، ءۇش سالت اتتى كەلدى ۇيگە، اراسىندا مىڭجاسار دا بار، ءبىر داستارقاننان ءدام تاتتىق. ول ءتىرى، ورالادى، ءۇمىتىڭدى ۇزبە!» دەيدى ەكەن انام ەكەۋمىزگە كەزەك قاراپ. سول ءسوزىن اجەم مەن قاتايىپ كەلە جاتقاندا دا، ىلعي ايتىپ وتىراتىن. قۇلاعىما ابدەن سىڭگەندىكتەن بە، اكەم ءتىرى دەگەنگە يلانىپ، كوپكە دەيىن ءۇمىتىمدى ۇزبەدىم. سويتسەم اجەم ءبىر جاعى كەلىنىنىڭ كوڭىلىن اۋلاۋ ءۇشىن، ەكىنشىدەن توركىنىنە كەتىپ قالا ما دەپ قاۋىپتەنگەندىكتەن ايتاتىن بولسا كەرەك. ونىڭ ۇستىنە ناعاشىمدا دا ۇل بالا بولماپتى. ەكى اتانىڭ ءۇمىت ەتكەنى مەن عانا بولىپپىن. دەگەنىم بولماي جىلاسام ناعاشى اتام قوسا جىلايتىنى ءالى ەسىمدە. ولار قانداي مەيىرىمدى جاندار ەدى دەيمىن وسى كۇنى. امال نە، اكەم مايداننان ورالمادى. اجەم ەكەۋمىزدىڭ كوپتەن كۇتكەن قۋانىشىمىز اقتالمادى.

اجەم 96 جاسىندا باقيلىق بولدى. 94 جاسىندا مال اتاپ سو­يىپ، اس بەرگىزدى. قۇران وقىتتى. قۇشاعىنا قىسىپ ماۋقىن باساتىن كيىمىن بار زامانداستارىنا تاراتتى. سول كۇنى كوڭىلى بوساماعان ءبىر ادام قالماعان شىعار. ۇلدى كۇتۋدىڭ قيىندىعىن مەن دە سول جولى انىق ءتۇسىندىم. وسى كۇنى بالالارىما وتكەننىڭ قيلى وتكەلدەرىن ايتىپ وتىرامىن. ساباق الىڭدار دەيمىن. قيىن كەزدە ساناتقا قوسىلۋ وڭاي ەمەس دەگەن ءسوزىمدى ۇققان جانعا جالىقپاي ايتامىن»، دەپ تىلەك اقساقال تولقىدى.

مەكتەپكە بارعاندا تىلەكتەس اتتى ەكى بالانى مۇعالىم ءبىر پارتاعا وتىرعىزىپتى. ءبىرى – ۇل، ەكىنشىسى – قىز بالا. قىزدىڭ اتا-اناسى دا مايدانداعى ازاماتتار امان كەل­سىن دەگەن تىلەكپەن تىلەكتەس قويعانى بەلگىلى. بالاڭداۋ كەزدە تىلەكتەستەر ونى بىلە قويماعان. وسە كەلە قۇربىلارى ءتۇرلى اڭگىمە ايتا باستاعاندا، ول اجەسىنەن اتىن تىلەك دەپ اتاۋدى سۇراپتى. مەك­تەپكە جەتەلەپ بارىپ، جەتەلەپ قايتىپ جۇرگەندە ءتۇپتىڭ ءتۇبى وسى الدىمىزدان شىعادى-اۋ دەگەن اجەسى وعان قارسى بولا قويماپتى. ءتيىستى ورىندارعا جۇگىرىپ ءجۇرىپ، بارلىق قۇجاتتى وزگەرتىپ، تىلەك مىڭجاساروۆ دەگەن كۋالىكتى قولىنا ۇستاتىپتى.

«اۋىلداعى 4 جىلدىق مەكتەپتى اياقتاعان سوڭ 15 شاقىرىم جەردەگى ورتا ءبىلىم بەرەتىن مەكتەپكە ءبىر قاراڭعى، ءبىر جارىقتا ەسەكپەن قاتىناپ وقىدىق. ءبىر وقيعا ەسىم­نەن كەتپەيدى. بۇكىل اۋىل ءبىر كۇنى كوزدەرى بۇلاۋداي بولىپ جىلاپ ءجۇردى. «قايتىپ كۇن كورەمىز؟» دەپ وكسيدى شەتىنەن. ءبىز بالالار اۋىل­دىڭ امان-ەسەن ەكەنىن كورىپ ءجۇر­مىز. ءۇي باسى تىنىشتىق. سويتسەك، ولگەن ستالين ەكەن. ونىڭ كىم بول­عانىن كەيىن بىلدىك قوي»، دەيدى تىلەك قاريا.

سوعىس زاردابى بىرتە-بىرتە سەيى­لىپ، ەل ەڭسە تىكتەي باستاعاندا تىلەك مىڭجاسار ۇلى مەكتەپ ءبىتى­رىپ، ەكى اناعا قالاي قولعانات بولسام ەكەن دەپ، ءار تاراپقا كوز سالادى. اجەسى ءوز ۇلىنىڭ مايداننان امان كەلەتىنىنە ءالى سەنىمدى. ء«بىز سەل­بەسىپ كۇن كورەمىز. اكەڭ كەلگەنشە ورتا ءبىلىم ال»، دەپ اجەسى شىمكەنت قالاسىنداعى ولكەلىك تۇتىنۋشىلار وداعىنىڭ كووپەراتيۆ تەحنيكۋمىنا باعىت بەرەدى. اناسى اجەسى ايتسا زاڭ دەپ ۇعادى. تەحنيكۋمدى بىتىرگەننەن كەيىن اسكەرگە اتتانادى. باكۋ قالاسىندا بورىشىن وتەيدى. اجەسى بۇل كەزدە: «ەكى ۇلىم دا اسكەردە ءجۇر»، – دەيتىن كورىنەدى. كەيۋانا ءوز سەنى­مىنەن ءبىر اۋىتقىماعان، وعان ەشكىمنىڭ شاك كەلتىرۋىنە جول دا بەرمەگەن. تىلەك اسكەردەن كەلىپ، قىزمەتكە ورنالاسىپتى. سوعىس بالاسى شىمىر كەلەتىنى بەلگىلى. ءبىراز مەكەمەدە ەسەپشى، باس ەسەپشى بولادى. ءۇي تىرلىگىندەگى قارا جۇمىستى دا، كەڭسەدەگى قالام جۇمىسىن دا ءمىنسىز اتقارادى. قيادان جول تا­ۋىپ، ۇيادا قاناتىن قاتايتقان ونى اۋدان كولەمىندەگى بەلدى قىزمەتتەرگە شاقىرسا، ۇلتاي اجەسى، كوز الدىمدا ءجۇرسىن دەگەن نيەتپەن: «اۋىلدان الىستاپ، ەلدەن قول ءۇزىپ قالاسىڭ»، دەپ جىبەرە قويمايدى. كەيىن ءومىر اعىسى ول كىسىنىڭ دە شەڭبەردەگى ويىن بۇزىپ، ءورىسىن كەڭەيتكەندە نەمەرەسىنىڭ الدىنان شىقپاي، ساتتىلىك تىلەپتى.

ول جيىرما جىلدان اسا ۋاقى­تىن ماقتا شارۋاشىلىعىنا، ونى وركەندەتۋدىڭ ەسەپ-قيسابىنا ارناپتى. بولاتتاي بەرىك دەپ يلانعان وداق قيراپ، ەلىمىز ازاتتىعىن العان تۇستا حالىقتىڭ داعدارىپ قالعانى بەلگىلى. «ماقتامەن ماق­تانىپ وتىرعان جۇرت ەس تاپپاي ەسەڭگىرەدى مە، قالاعا اعىلدى. سو­عىس تۇسى ەمىس-ەمىس ەسىمدە، ودان كەيىنگى تىر­لىك كوز الدىمدا. ەكى انامنىڭ سول ۋاقىتتاعى جاسى­ماعان جىگەرى مەنى قانات­تان­دىردى. وسى دالادا بابالارىم ءوستى، ءوندى، مەن سول جولدا قالام دەپ بەكىندىم. ماعجان دەگەن اقىننىڭ: «ادامزاتتىڭ ءبارى – ەڭبەكشى، ءبارى – قۇل» دەگەن ولەڭى ويىمنان كەت­پەيتىن. ماعىناسى تەرەڭ بەس ءسوز بەلىمدى بەكەم بۋعىزدى. بالالار قاتتى قايىرىمعا كەلە قويماعان كەز. كىندىك ەلدەن كەتپەيىن دە­دىم. ۇلەسىمە تيگەن 30 گەكتار جەر­دى ىسكە جاراتتىم. قات بولىپ تۇر­عان، ماقتا تۇقىمىن وندىرەتىن «قارا­شا» شاعىن شارۋاشىلىعىن قۇر­دىم. يەسىز قالعان جەرلەردى الىپ، ۇلەسىمدەگى جەر كولەمىن 130 گەكتارعا جەتكىزىپ، ماقتا ەك­تىم. تۇقىم شارۋاشىلىعىم دا، ماق­تا ءوندىرۋ دە ىلگەرى جىلجىدى. سۇرا­نىس ارتتى، تاپسىرىس كوبەيدى. بوس جۇرگەن جۇزدەي ادامعا جۇمىس تابىلدى. ولاردىڭ ءۇيى جوقتارىنا جەر بەرىپ، ايلىعىڭنان ازداپ تو­لەپ وتىراسىڭ دەپ، قۇرىلىس ماتە­ريالدارىمەن قامتاماسىز ەتتىم. شەتىنەن ولار ءۇي تۇرعىزىپ جاتتى. مالى جوققا مال بەرىپ، ءونىمىن پايدالان دەدىم. وسىلايشا جاساعان تىرلىك وسۋىمىزگە، ونۋىمىزگە سەپتىگىن تيگىزدى. قارجى مولايدى»، دەگەن تىلەك مىڭجاسار ۇلى ءوزىنىڭ سوعىسقا قاتىسقاندارعا، تىل ەڭبەككەرلەرىنە ەرەكشە ىلتيپاتپەن قارايتىنىن، ءوزىنىڭ تىرلىگىنە تياناق بولعان قوس اناسى ەكەنىن، ودان كەيىن ءبىر جىلى سارىاعاش شيپاجايىندا ۇلت باتىرى باۋىرجان مومىش ۇلىمەن بىرگە دەمالىپ، سول از كۇندە العان ءتالىمى «قارۋ» بول­عانىن العا تارتادى. «باتىر ءبىر توبە، قالعاندارىمىز ءبىر توبە ەدىك. قاراپايىم جۇرت باتىردى توڭىرەكتەپ جۇرەدى. ءسوز ەستىپ قالا­مىز با دەي مە، شىرەنگەندەر اۋلاعىراق كەتەدى. بەت-بەدەلىڭە قارامايدى ەكەن، قاعىپ تاستايدى. ادىلدىك پەن شىندىق دەسە، ونى كوتەرە ايتادى، وتىرىككە ورە تۇرادى. مەن تەز تابىسىپ كەتتىم. اجەم تۋرالى اڭگىمەم قاتتى ۇنادى. ءبىر جولى: «جەڭىستى ءبىز ەمەس، سول انالار اكەلدى. ارداقتاي الدىڭ با اجەڭدى؟»، دەپ گۇر ەتە ءتۇستى. ءۇنىم ءوشىپ قالدى. «ولار جانكەشتى ەڭبەك ەتپەگەندە ءبىتىپ ەدىك. وسى كۇنگىلەر كوك جالقاۋ، سىرعاق. تەك سويلەي بەرەدى. سەن انالارىڭ سەكىلدى ەڭبەك ەتە بىلەسىڭ بە، الدە ودان سالسا، بۇدان وزىپ جۇرگەن بىرەۋسىڭ بە؟»، دەدى. ۇندەمەدىم، بىراق مەن ءۇشىن باتىردىڭ وسى ايتقانى الدىمداعى تۋرا جولعا اينالدى»، دەپ ول زەر­دەسىنىڭ بارلىعىن تانىتتى.

اكەدەن انا قۇرساعىندا قالعان تىلەك مىڭجاسار ۇلى اتاسى، اكەسى، ءوزى – ءۇش جالعىزدان ۇش ۇل، ەكى قىز، ولاردان جيىرما نەمەرە، ون شوبەرە بارىن، مۇنىڭ ءبارى انا­لارىنىڭ قۋات-كۇشى، جىگەر-قايراتىمەن جالعاسقانىن ايتىپ، قازاق­تىڭ بۇگىنگى كۇنىنە شۇكىرلىك ەتىپ، كەلەشەگىنە كەمەلدىك تىلەيدى. «80-گە بەت العان سوعىس بالاسى بۇ­دان وزگە نە ايتادى»، دەگەندى دە ءسوز ورتاسىنا قوسىپ قويدى.

تىلەك مىڭجاسار ۇلىنىڭ ەتكەن ەڭبەگى ەلەۋسىز ەمەس كورىندى. ونى سۇراعانىمىزدا: «مەن ەڭبەگىمدى پۇلداعان ادام ەمەسپىن. قۇرمەت كورسەتىپ جاتادى. ءتيىستى مەكەمەلەر 2018 جىلدىڭ ۇزدىك شيپاجايى دەگەن اتاق بەرىپتى. راحمەت! بىراق سونى بارىپ الا قويمادىم. سەبەبى، مەن سياقتى قىزمەت ەتىپ جاتقاندار از ەمەس قوي. ارتىق ماقتان، ارتىق اتاق اۋىر جۇك سەكىلدى كورىنەدى. مەنىڭ كەيىنگە قالدىرعان بار جەتىستىگىم: ۇرپاعىم، ودان كەيىنگى تابىسىم قيىن كەزەڭدە قيراعان شارۋانى وڭ جولعا سالىپ، جۇز­گە تاياۋ ادامدى جۇمىسپەن قامتىعا­نىم. دەنساۋلىعىنا شيپا ىزدەگەن­دەر دەمالسىن دەپ «اق-تىلەك» مەكە­­مە­سىنىڭ جۇمىسىن جولعا قوي­عا­نىم. ەندىگى بار ايتارى تىلە­گىم، وسىنى كەيىنگىلەر ۇعىنىپ، ۇر­پا­عىم جالعاستىرىپ، ۇلتىنا قىز­مەت ەتسە – ارمان-ماقساتىما جەت­كەنىم بولار ەدى. انالارىمنىڭ ءۇمىتىن اقتاپ، ادال ىسىممەن ارتىما جاقسى ءسوز قالدىرسام بولعانى»، دەپ سەكسەننىڭ سەڭگىرىنە اياق باسىپ قالعان تىلەك مىڭجاسار ۇلى اڭگىمەنى تۇيىندەگەندە، ابايدىڭ: «ادامشىلىقتىڭ قارىزى ءۇشىن ەڭبەك قىلساڭ، اللانىڭ سۇيگەن ق ۇلىنىڭ ءبىرى بولاسىڭ» دەگەن ءسوزى كوكەيدە كۇمبىرلەپ سالا بەردى.

 

سۇلەيمەن مامەت،

جۋرناليست

 

سوڭعى جاڭالىقتار

قانشا ادام ۆاكتسينا سالدىردى؟

كوروناۆيرۋس • بۇگىن، 09:16

ۇقساس جاڭالىقتار