كارانتين كەزىندەگى ەلوردا ءبىلىم بەرۋ ۇيىمدارىنىڭ قاشىقتان وقىتۋ ماسەلەلەرى بويىنشا بايانداما جاساعان ش.قادىروۆا:
– 16 ناۋرىزدان باستاپ قالانىڭ بارلىق كوللەدجدەرى قاشىقتىقتان وقىتۋعا كوشتى.
قازىرگى ۋاقىتتا كوللەدجدەر ااج "Platonus", Google Classroom, Edupage پلاتفورمالارىندا جۇمىس ىستەيدى. وقۋ پروتسەسى بەلگىلەنگەن وقۋ جۇكتەمەسىنە, وقۋ جۇمىس جوسپارىنا, وقۋ باعدارلامالارىنا, ساباق كەستەسىنە سايكەس جۇزەگە اسىرىلادى.
ءبىلىم الۋشىلارعا مەملەكەتتىك ستيپەنديا اي سايىن تولەنۋدە جانە تولەم كارتوچكالارىنا تاماقتانۋ ءۇشىن اقشا اۋدارىلىپ وتىر. 22661 ستۋدەنتتىڭ باسقا قالادا تۇراتىن 9172 (40,5%) ستۋدەنتتەر تۇرعىلىقتى جەرىنە جىبەرىلدى. بۇگىنگى تاڭدا كوللەدجدەردىڭ جاتاقحاناسىندا جەتىم جانە اتا-اناسىنىڭ قاراۋىنسىز قالعان 50 ستۋدەنت قالىپ, وقۋلارىن جالعاستىرۋدا. باسقارما تاراپىنان ول بالالارعا الەۋمەتتىك كومەك كورسەتىلۋدە.
وقۋ قۇنى ماماندىق تۇرىنە بايلانىستى جىلىنا 80-نان 320 مىڭ تەڭگەنى قۇرايدى. وقۋ اقىسىن تولەي المايتىن ستۋدەنتتەردىڭ جالپى سانى 1015 ادامدى قۇرادى. بۇگىنگى تاڭدا كوللەدج اكىمشىلىگىنە ءوتىنىش بىلدىرگەن بارلىق ستۋدەنتتەرگە وقۋ اقىسىن تولەۋ مەرزىمى اعىمداعى جىلدىڭ تامىز ايىنا دەيىن ۇزارتىلدى, – دەدى.
