بۇل تاقىرتىپ بويىنشا ارحيۆتىك دەرەكتەر نەگىزىندە زەرتتەۋ جۇرگىزگەن جۋرناليست, ۇلتتىق قاۋىپسىزدىك سالاسىنىڭ ارداگەرى امانتاي عازيز ۇلى, ءتىپتى سوعىس باستالماي تۇرىپ, ياعني 1941 جىلى 16 مامىر كۇنى نەمىستەر بولاشاقتا قولعا تۇسەتىن كەڭەستىك تۇتقىندارعا نە ىستەۋ جايلى ۇكىم شىعارىپ قويعان. وسى قۇجاتتا: بولشەۆيزممەن ۋلانعان كەڭەستىك تۇتقىندارعا قاتاڭ كوزقاراس قولدانىلسىن; سونىڭ ىشىندە ازياتتارعا ءتىپتى قاتاڭدىق كورسەتىلسىن دەگەن باب بولعانىن ايتادى.
جوعارىداعى قۇجاتقا نەگىزدەلگەن قاتاڭ كوزقاراستىڭ كەسىرىنەن 1941 جىلدىڭ كۇزىندە پولشا لاگەرلەرىندە تۇتقىنعا تۇسكەن 132 مىڭداي ازياتتاردىڭ 1942 جىلدىڭ كوكتەمىندە 22 مىڭى عانا ءتىرى قالسا, سول سياقتى چەنستوحوۆا (Czestohowا) لاگەرىندە 1941 جىلدىڭ كۇزىندە تۇتقىنعا تۇسكەن 32 مىڭعا جۋىق تۇركىستاندىقتاردىڭ 1942 جىلدىڭ كوكتەمىندە 262-ءسى عانا ءتىرى قالعان ەكەن. بۇل فاشيستەردىڭ ازياتتارعا اسا مەيىرىمسىز قاتال ساياسات ۇستانعاندىعىنىڭ ايعاعى.
«وسىنداي قيىندىققا تاپ بولعان ازياتتار امان قالۋدىڭ امالىن ويلاپ نەمىستەر تاراپىنان جاساقتالعان «تۇركىستان لەگيونى» قاتارىنا كىرۋگە ءماجبۇر بولعان» دەپ جازىپتى جۋرناليست دوسان بايمولدا مىرزا. بۇل قۇرامعا – وزبەك, قازاق, تۇرىكمەن, قىرعىز, بەلۋج, دۇڭعان, يران تەكتەستەر, قاشعارلىقتار, شۇنعاندار, تارانشى ۇيعىرلار جانە شىعىس تاتارلارى تارتىلعانى جايلى بىلەمىز.
وسى جاۋىنگەرلەرگە وزدەرى ءتىلىن بىلەتىن كەڭەستىك قارۋ-جاراق بەرىلىپ, ۇستەرىنە نەمىس اسكەرىنىڭ فورماسى كيگىزىلىپ, جەڭىنىڭ وڭ جاعىنا «اللاھ بيز بيلان» («اللا بىزبەن بىرگە») دەگەن جازۋ بادىزدەلىپ, حوجا احمەت ياساۋي ماۆزولەيىنىڭ سۋرەتى سالىنعان, ونىڭ استىنا «TURKISTAN» دەپ تاڭبالانعان ەمبلەما (امانتاي كاكەن «جۇلدىز» جۋرنالى, 2008 جىل, قىركۇيەك) تاققان ەكەن.
