وپپوزيتسيا مەن قۇقىق قورعاۋشىلاردىڭ شاقىرۋىنا قاراماستان, پولشا ۇكىمەتى كوروناۆيرۋس پاندەمياسى جاعدايىندا 10 مامىردا پوشتا ارقىلى ءوتۋى ءتيىس پرەزيدەنتتىك سايلاۋدىڭ داۋىس بەرۋ كۇنىن اۋىستىرۋدان باس تارتتى. باقىلاۋشىلار قازىرگى پرەزيدەنت اندجەي دۋدقا سايلاۋشىلاردىڭ 60% - عا جۋىعى قولداۋعا دايىن ەكەنىن اتاپ ءوتتى. مەملەكەت باسشىسى لاۋازىمىنا التى كانديدات ۇمىتكەر.
«قۇقىق جانە ادىلەتتىك» باسقارۋشى پارتياسىنىڭ كوشباسشىسى ياروسلاۆ كاچينسكيدىڭ تاپسىرماسى بويىنشا دايىندالعان پوشتا ارقىلى سايلاۋ وتكىزۋ ءراسىمىن پولشا سەيمى ءساۋىر ايىنىڭ باسىندا ماقۇلدادى. جاقىن كۇندەرى قاشىقتان داۋىس بەرۋ تۋرالى زاڭ جوباسىن سەنات قاراۋى ءتيىس. پولشانىڭ پرەمەر-ءمينيسترى ماتەۋش موراۆەتسكي سىرتتاي سايلاۋ قاۋىپسىز ەكەنىن مالىمدەپ, سەناتورلاردى بۇل ۇسىنىستى قولداۋعا شاقىردى.
پوشتا ارقىلى داۋىس بەرۋگە ەلدىڭ بۇرىنعى پرەزيدەنتتەرى مەن پرەمەرلەرى قارسى ەكەنىن ايتۋدا. ەۋروكوميسسيا پولشادا سايلاۋدىڭ ەركىن جانە ادال وتەتىنىن كۇتەتىندىگىن اتاپ ءوتتى.
«ەگەر مەن پولشانىڭ ازاماتى بولسام, وندا مەنىڭ سۇراقتارىم كوپ بولار ەدى. سەبەبى, مەن ادىلەتتى تۇردە داۋىس بەرۋگە قول جەتكىزگىم كەلەدى. كانديداتتار سايلاۋ الدىنداعى ناۋقاندى قولايلى ۋاقىتتا وتكىزگەنىن قالايتىن ەدىم»,- دەدى ەۋروكوميسسيا باسشىسىنىڭ ورىنباسارى ۆەرا يوۋروۆا.
سونداي-اق سوڭعى الەۋمەتتىك ساۋالناما مالىمەتتەرى بويىنشا, 10 مامىردا سايلاۋ وتكىزىلگەن جاعدايدا حالىقتىڭ 30% - دان كەمى داۋىس بەرۋگە جينالادى.
