بىرلىكتىڭ بايراعى بيىكتەر كۇن

قايىرلى اتامەكەنىمىز الاش جۇرتىنا الماعايىپ ءار داۋىردە تۇراقتاعان باسقا اتانىڭ بالالارى دا ەڭ الدىمەن وسى ىنتىماق قاسيەتىن قاستەرلەۋ كەرەگىن تانىدى. ءارتۇرلى حالىقتىڭ ءبىر شاڭىراق استىنا جينالۋى ولاردىڭ ءبىر-بىرىنە دەگەن ءىلتيپاتى مەن ىزگىلىگىن وياتتى. ءبىر-ءبىرىن باۋىرىنا تارتۋ ارقىلى ولار ورتاق مۇددەگە جۇمىلدى, بىرلەسىپ ەلدىكتىڭ ەڭسەلى تۋىن كوتەردى.

ادام بالاسىنىڭ اراسىنداعى تا­نىس­تىقتىڭ تۋىستىققا اينالۋى الاش ىشىن­دە بۇلجىماس ءداستۇر سانالادى.

بۇگىندە ەگەمەن ەلىمىزدىڭ ەن بايتاق شەكاراسىندا باس قۇراعان بىرنەشە ۇلت­تىڭ ءبىر شاڭىراق استىنا جينالۋىنىڭ ءما­نى دە وسىناۋ ءداستۇر ساباقتاستىعىن ەس­كە تۇسىرەدى. بولاشاق ماڭگى ەلدى ماقسات تۇت­قان بۇل مۇرات بىزگە سوناۋ باعزىدان ءۇن قاتقان بىتىك تاستاردىڭ بەتىندەگى كيەلى جازۋلارمەن جەتتى.

كەشە ءبىزدى كوك تۇرىك تۋىنىڭ استىنا تۇتاستىرىپ, بەرەكەلى بىرلىكتىڭ بايراعىن كوتەرتكەن دە وسىناۋ ىرىستى ىنتىماق بولاتىن.

تارلان تاريحقا كوز جۇگىرتىپ, سوناۋ كوشپەلى تايپالاردىڭ كونە جازبالارىنان جەتكەن جادىگەرلەرگە ۇڭىلسەك, تابعاشتار ايداپ سالعان توعىز وعىزدى توعىلا جازىعىندا تاس تالقان ەتكەن تونىكوك قاعاننىڭ: «كىمدە-كىم بىرلىك بايراعىن كوتەرەمىن, اتا جاۋعا قارسى بىر­لەسىپ كۇرەسەمىن دەسە, وتۇكەنگە كەل­سىن. ءبىز سوندا بىرەر كۇن ەرۋ بولامىز», دەگەن ءسوزى جادىمىزدا جاڭعىرىپ سالا بەرەدى.

ءبىزدىڭ بۇل بەيبىت كۇندەگى بىرلىكتى باع­دار ەتكەن يگى قادامىمىزدىڭ ءتۇپ-تامىرى وسىناۋ كونە تاريحتىڭ كومبەسىنە بارىپ تىرەلەدى.

ءۇش ءجۇزدىڭ باسىن قوسقان اتاقتى ابى­لاي حاننىڭ وڭ تىزەسىن باسقان بۇقار ابىزدىڭ «بۇل, بۇل ۇيرەك, بۇل ۇيرەك, بۇل ۇيرەكتەي بولىڭىز» دەپ توپتانىپ ۇشقان ادال قۇستىڭ وزىنەن تاتۋلىق بەلگى­سىن كورەتىنىن ويلاڭىز. توزعان قازدى توپتانعان قارعا الاتىنىن مەڭزەپ, ءتام­سىلىن «اينالا الماي ات ءولسىن, ايىرا ال­ماي جات ءولسىن, جات بويىنان ءتۇڭىلسىن, ءبارىڭىز ءبىر ەنەدەن تۋعانداي بولىڭىز», دەپ تۇيەدى.

قازاقتىڭ قۇتتى قونىسىندا تاتۋلىق بەسىگىن تەربەتكەن جۇزدەگەن ۇلت پەن ۇلىس­تىڭ اۋىزبىرشىلىگىنە وسىناۋ تالىمگەر تاريحتىڭ التىن بەتتەرى كۋا.

ءبىزدى بىرىكتىرگەن – جەكەلەگەن تاع­دىرلاردىڭ توعىسى. قازاقتىڭ كەڭپەيىل قۇشاعى مەن ىرىسى ورتايماعان كوپشىل نەسىبەسى ءبىزدى ءبىر شاڭىراق استىنا جينادى. ءبىزدى باسقا ۇلتتارمەن بىرىكتىرگەن – اۋىر قاسىرەتتەر مەن سالتاناتتى وقي­عالار شەجىرەسى.

ەلباسىنىڭ قازاقستان حالقى اسسام­بلەياسىن قۇرۋ يدەياسى – الاشتى پانا تۇتقان باسقا ۇلت وكىلدەرىن عانا ەمەس, ادامزاتتى الديلەگەن بەيبىت­شىلىك بەسىگىن كوز الدىڭىزعا اكەلەدى.

بۇگىندە الەمدى ابىگەرگە سالعان داۋاسىز دەرتتىڭ قىسپاعىنا تۇسكەن كەزدە دە ەلىمىزدىڭ وسى بەرىك ىنتىماعى ءوز ناتيجەسىن كورسەتتى.

مەملەكەت باسشىسىنىڭ مىنبەردەن ايتىلعان ء«بىز بىرگەمىز!» دەگەن ءسوزى قالىڭ بۇقارانى قاتەرلى اپاتتان اراشالاپ تۇر.

ۇلى كەمەڭگەر, حاكىم ابايدىڭ «بىرلىك – اقىلعا بىرلىك, مالعا بىرلىك ەمەس», دەگەن ءسوزى ادامزاتقا ورتاق قۇندىلىقتىڭ قاينارىن كورسەتەدى.

ءيا, ءبىز ەجەلدەن بىرگەمىز!

ءبىزدىڭ اقىل-پاراساتىمىز, پەيىل-نيەتىمىز بىرگە!