كومپيۋتەر مەن ينتەراكتيۆ – كۇندەلىكتى قۇرال
وڭىردە ءبىلىم بەرۋ سالاسىن تسيفرلاندىرۋ قاناتقاقتى جوبالار دەڭگەيىنەن اسىپ, تۇراقتى تاجىريبەگە ەندى. بۇگىندە بۇل ۇدەرىس باستاۋىش سىنىپتان باستاپ كوللەدجدەرگە دەيىنگى بارلىق ءبىلىم بەرۋ دەڭگەيىن قامتىپ وتىرعانى بايقالادى. ناتيجەسىندە, باسقارۋ جۇيەسى جەڭىلدەپ, بىلىمگە قولجەتىمدىلىك كەڭەيىپ, مامانداردى دايارلاۋ ەڭبەك نارىعىنىڭ سۇرانىسىنا جاقىنداي تۇسكەن.
وبلىستىق ءبىلىم بەرۋ باسقارماسى اقپاراتتىق تەحنولوگيالار ورتالىعىنىڭ دەرەگىنشە, وڭىردەگى بارلىق مەكتەپ ينتەرنەت جەلىسىنە قوسىلعان. اسىرەسە اۋىلدىق جانە شالعاي مەكتەپتەرگە باسىمدىق بەرىلگەن. ونداعان ءبىلىم بەرۋ ۇيىمى «Starlink» سپۋتنيكتىك بايلانىسى ارقىلى سەكۋندىنا 150 مەگابيتقا دەيىنگى جوعارى جىلدامدىقتاعى ينتەرنەتكە قول جەتكىزدى. ەلدى مەكەندەردى وپتيكالىق تالشىققا قوسۋ جۇمىستارى جالعاسىپ جاتىر. بۇل قاشىقتان وقىتۋعا, ونلاين ساباقتار وتكىزۋگە, تسيفرلىق ءبىلىم بەرۋ پلاتفورمالارىن پايدالانۋعا ناقتى مۇمكىندىك بەرەدى.
مامانداردىڭ ايتۋىنشا, تسيفرلاندىرۋ تەك ينتەرنەتپەن شەكتەلمەيدى. ءوڭىر مەكتەپتەرىندە ماتەريالدىق-تەحنيكالىق بازا جۇيەلى تۇردە جاڭارتىلۋ ۇستىندە. بۇگىندە وبلىس بويىنشا 40 مىڭعا جۋىق كومپيۋتەرلىك تەحنيكا (ستاتسيونارلىق كومپيۋتەرلەر, نوۋتبۋكتار مەن پلانشەتتەر) قولدانىستا. بۇعان قوسا, 1 700-دەن استام ينتەراكتيۆتى قۇرال-جابدىق ورناتىلعان. سونىڭ ناتيجەسىندە ەلەكتروندىق وقۋلىقتار, تسيفرلىق زەرتحانالار مەن ينتەراكتيۆتى تاپسىرمالار وقۋ ۇدەرىسىنىڭ تۇراقتى بولىگىنە اينالعان.
قاعازباستىلىق ازايدى, جۇيە اۆتوماتتاندى
ءبىلىم بەرۋ سالاسىنداعى باسقارۋ جۇيەسى دە تسيفرلىق فورماتقا كوشىرىلىپ جاتىر. قازىر وبلىستا وننان استام اقپاراتتىق جۇيە مەن پلاتفورما جۇمىس ىستەيدى. نەگىزگى دەرەكتەر ۇلتتىق ءبىلىم دەرەكقورىندا جيناقتالسا, مەكتەپتەردىڭ باسىم بولىگى «كۇندەلىك» ەلەكتروندىق جۋرنالى مەن كۇندەلىگىن پايدالانىپ وتىر. اتا-انالار مەن وقۋشىلار 36 مەملەكەتتىك قىزمەتتى ەلەكتروندىق فورماتتا الا الادى. پەداگوگتەردى مونيتورينگتەۋ مەن اتتەستاتسيالاۋ «ۇستاز» پلاتفورماسى ارقىلى جۇرگىزىلەدى. كىتاپحانا قورى «E-Kitaphana» جۇيەسىندە ەسەپكە الىنسا, ال مەكتەپتەردىڭ قارجى-شارۋاشىلىق قىزمەتى «فاۆوريت» ۇلتتىق جۇيەسىندە اۆتوماتتاندىرىلعان. «OnlineMektep», «Daryn Online», «Bilim App» سىندى وتاندىق پلاتفورمالار دا وقۋ ۇدەرىسىنە كەڭىنەن ەنگىزىلگەن.
«تسيفرلىق تەحنولوگيالار الەۋمەتتىك سالادا دا ءوز تيىمدىلىگىن كورسەتىپ وتىر. «الەۋمەتتىك ءاميان» جوباسى ارقىلى وقۋشىلاردى تەگىن ىستىق تاماقپەن قامتاماسىز ەتۋ ۇدەرىسى ەداۋىر جەڭىلدەدى. اتا-انالار ەلەكتروندىق ۆاۋچەردى ءموبيلدى قوسىمشا ارقىلى بەلسەندى ەتسە, ال مەكتەپتەر قىزمەتتى تسيفرلىق تۇردە تىركەيدى. بۇل مەملەكەتتىك قولداۋدىڭ اشىقتىعى مەن قولجەتىمدىلىگىن ارتتىردى», دەيدى اقپاراتتىق تەحنولوگيالار ورتالىعىنىڭ باسشىسى ەلنار وتەباەۆ.
شاعىن مەكتەپتەرگە – جاڭا مۇمكىندىك
رەسۋرسى شەكتەۋلى اۋىلدىق جانە شاعىن جيناقتى مەكتەپتەر ءۇشىن تسيفرلىق تەحنولوگيالار ەرەكشە ماڭىزعا يە. ماسەلەن, پاۆلودار اۋدانىنىڭ بىرلىك ورتا مەكتەبى «Qazaq Digital Mektebi» جوباسىنا قاتىسىپ جاتىر. بۇل مودەل ونلاين ساباقتارعا, تسيفرلىق ماتەريالدارعا جانە جاساندى ينتەللەكتى ەلەمەنتتەرىنە نەگىزدەلگەن. جوبا كادر تاپشىلىعىن ازايتىپ, وقۋشىلاردىڭ ءبىلىم الۋ مۇمكىندىگىن مەكتەپتىڭ ورنالاسقان جەرىنە قاراماستان كەڭەيتەدى.
تەحنيكالىق جانە كاسىپتىك ءبىلىم بەرۋ سالاسى دا تسيفرلىق وزگەرىستەردەن تىس قالعان جوق. وبلىس كوللەدجدەرىندە زەرتحانالار مەن شەبەرحانالار جاڭارتىلىپ, زاماناۋي IT-شەشىمدەر ەنگىزىلۋدە. IT-ماماندىقتار بويىنشا مەملەكەتتىك ءبىلىم بەرۋ تاپسىرىسى ءوسىپ كەلەدى. اقپاراتتىق تەحنولوگيالار كوللەدجى ازىرلەگەن «ۇيىرمە» اقپاراتتىق جۇيەسى ۇيىرمەلەرگە قاتىسۋدى ەسەپكە الۋعا مۇمكىندىك بەرسە, ساباق كەستەسىن جاساندى ينتەللەكتى ارقىلى قۇرۋ جۇيەسى وقۋ ۇدەرىسىن وڭتايلاندىرۋعا باعىتتالعان. اتالعان كوللەدج بازاسىندا اشىلعان IT-حاب بۇگىندە «Microsoft», «Festo», «IT Hub Academy», سكولكوۆو ينستيتۋتى جانە باسقا دا حالىقارالىق سەرىكتەستەرمەن جۇمىس ىستەيدى. سونداي-اق جاقىندا وڭتۇستىك كورەيا ۋنيۆەرسيتەتىمەن جاڭا مەموراندۋمعا قول قويىلدى. ونىڭ اياسىندا كوللەدج بازاسىندا اتالعان ۋنيۆەرسيتەتتىڭ فيليالى اشىلماقشى.
روبوتتەحنيكا مەن جاساندى ينتەللەكت
STEM-ءبىلىم بەرۋ اياسىندا روبوتتەحنيكاعا دا ەرەكشە كوڭىل ءبولىنىپ وتىر. قازىر وبلىستىڭ 122 مەكتەبىندە روبوتتەحنيكا كابينەتتەرى جۇمىس ىستەيدى, تاعى 163 مەكتەپ قاجەتتى قۇرال-جابدىقتارمەن قامتاماسىز ەتىلگەن. «بولاشاق ينجەنەرلەر» باعدارلاماسى اياسىندا 24 مەكتەپكە روبوتتىق كەشەندەر جەتكىزىلدى. سونىمەن قاتار جاساندى ينتەللەكتى باعىتىندا دا ناقتى قادامدار جاسالىپ وتىر. وتكەن جىلدان باستاپ ءۇش قالاداعى بەس مەكتەپتە جوعارى سىنىپ وقۋشىلارىنا ارنالعان «جاساندى ينتەللەكتى» جانە «ويىن ازىرلەۋ» ەلەكتيۆتى كۋرستارى ىسكە قوسىلعان. «Daryn Uztaz» پلاتفورماسىندا 8 مىڭنان استام پەداگوگ جي بويىنشا بىلىكتىلىگىن ارتتىرعان. ال پاۆلودار قالاسىندا جاڭادان اشىلعان №48 «كەلەشەك مەكتەبىندە» ەنگىزىلگەن «AI Mektep» جوباسى بەينەاناليتيكا مەن جاساندى ينتەللەكتى ارقىلى قاۋىپسىزدىك پەن وقۋ ساپاسىن قاتار ارتتىرۋعا باعىتتالعان.
«تسيفرلاندىرۋ ءبىز ءۇشىن جەكە-جەكە جوبالار ەمەس, ول كۇندەلىكتى ۇدەرىسكە كىرىككەن جۇيە. سونىڭ ارقاسىندا ءار بالا ساپالى ءبىلىم مەن زاماناۋي تەحنولوگيالارعا تەڭ قول جەتكىزە الادى. ناتيجەلەرى قازىردەن-اق بايقالىپ وتىر. ونى مەكتەپ وقۋشىلارى, ستۋدەنتتەر, پەداگوگتەر ءبىلىم كونكۋرستارىنداعى جەتىستىكتەرىمەن دالەلدەپ كەلەدى. ەڭ باستىسى, بۇل ءۇردىس جالعاسىپ جاتىر», دەيدى ەلنار وتەباەۆ.
اتاپ وتەرلىگى, پاۆلودار وبلىسىنىڭ كوماندالارى كەيىنگى جىلدارى رەسپۋبليكالىق جانە حالىقارالىق جارىستاردا ۇنەمى تۇعىر باسىنان كورىنىپ ءجۇر. بىلتىر «ساتۋرن» روبوتتەحنيكا مەكتەبىنىڭ «Atlantis» كومانداسى «Almaty Tech Cup 2025» حالىقارالىق تۋرنيرىندە «FIRST LEGO LEAGUE Explore» ساناتىندا ءابسوليۋتتى چەمپيون اتانىپ, اقش-تاعى الەم چەمپيوناتىنا جولداما الدى. كەيىن كوماندا حيۋستوندا 50 مىڭ قاتىسۋشى اراسىنان «Team Model Award» ماراپاتىن يەلەندى. ال استاناداعى «Fibonacci International Robot Olympiad Kazakhstan» جارىسىندا باياناۋىل اۋدانىنان قاتىسقان «Bayanaul №1» جانە «Bayanaul №2» كوماندالارى «Lego Sumo» ساناتىندا ءبىرىنشى ورىنعا يە بولدى. سونداي-اق بيىل قاڭتار ايىندا نازارباەۆ ۋنيۆەرسيتەتىندە 900-دەن استام وقۋشى قاتىسقان FIRST Kazakhstan 2025–2026 Astana FIRST AGE ءتۋرنيرى ءوتىپ, ەرتىس-بايان وڭىرىنەن وعان 21 كوماندا جولداما العان. سولاردىڭ بىرنەشەۋى «Central Asia FIRST® Championship 2026» جارىسىنا قاتىسۋ قۇقىعىن يەلەنىپ وتىر.
جەرگىلىكتى ءبىلىم بەرۋ سالاسىنىڭ ماماندارى تسيفرلىق تەحنولوگيالار, روبوتتەحنيكا مەن جاساندى ينتەللەكت زاماناۋي ءبىلىم بەرۋ ورتاسىن جۇيەلى تۇردە قالىپتاستىرۋدا دەپ ەسەپتەيدى. قازاقستاننىڭ «OpenAI» كومپانياسىنىڭ «Education for Countries» باعدارلاماسىنا قوسىلۋى بۇل باعىتتاعى جۇمىستى ودان ءارى كۇشەيتە تۇسكەن. ساراپشىلاردىڭ ايتۋىنشا, ءبىلىم بەرۋ سالاسىنا سالىنعان ءاربىر ينۆەستيتسيا ءوڭىردىڭ ادام كاپيتالى مەن تۇراقتى دامۋىنىڭ كەپىلى بولماق. پاۆلودار وبلىسىنىڭ تاجىريبەسى «تسيفرلىق مەكتەپ» تەك بولاشاقتىڭ جوباسى ەمەس, بۇگىنگى شىنايى تاجىريبە ەكەنىن كورسەتىپ وتىر.
پاۆلودار وبلىسى
