فوتو: istockphoto.com
جوباعا سايكەس, بانكتەر كليەنتتەردىڭ وپەراتسيالارىن باقىلاۋ, زەردەلەۋ جانە تالداۋ بارىسىندا تاۋەكەلگە نەگىزدەلگەن ءتاسىلدى قولداناتىن بولادى. سونداي-اق قازاقستان رەسپۋبليكاسىنىڭ بەيرەزيدەنتتەرى ءۇشىن بانك شوتتارىن اشۋ راسىمدەرىن وڭتايلاندىرۋ كوزدەلىپ وتىر.
قۇجاتتا اتالعان تۇزەتۋلەر قارجى ۇيىمدارىنا تۇسەتىن ارتىق رەتتەۋشىلىك جۇكتەمەنى ازايتۋ جانە قولدانىستاعى زاڭنامامەن سايكەستىكتى قامتاماسىز ەتۋ ماقساتىندا ازىرلەنگەنى كورسەتىلگەن.
جوبا قارجى نارىعىندا قىلمىستىق جولمەن الىنعان كىرىستەردى زاڭداستىرۋعا (اقشانى جىلىستاتۋعا), تەرروريزمدى قارجىلاندىرۋعا جانە جاپپاي قىرىپ-جويۋ قارۋىن تاراتۋدى قارجىلاندىرۋعا قارسى ءىس-قيمىل شارالارىن جەتىلدىرۋگە باعىتتالعان.
قۇجات اۆتورلارىنىڭ پىكىرىنشە, ۇسىنىلىپ وتىرعان وزگەرىستەر قارجى جۇيەسىنىڭ اشىقتىعىن ارتتىرىپ, وعان دەگەن سەنىمدى نىعايتۋعا مۇمكىندىك بەرەدى.
