شىمكەنت قالالىق ءبىلىم باسقارماسى باسشىسىنىڭ ورىنباسارى گۇلنار دارىباەۆانىڭ ايتۋىنشا, بوس جۇمىس ورىندارى بىرىڭعاي «قارقىن» جوباسىنىڭ ءبىر باعىتى «سانا» پلاتفورماسىنىڭ كومەگىمەن انىقتالدى.
«بۇل ەلەكتروندى تۇعىرنامانى 2025 جىلدىڭ قىركۇيەگىنەن باستاپ ىسكە اسىرىپ كەلەمىز. پلاتفورما ارقىلى سىنىپ قالىپتاسىپ, ءار پاننەن قانشا ساعات بار ەكەنى بەلگىلى بولادى. سول ساعاتتار كەيىن مۇعالىمدەرگە ۇلەستىرىلەدى. پلاتفورمامەن ساعاتتاردى ءبولۋ بارىسىندا كوپتەگەن ولقىلىق انىقتالدى. ياعني مۇعالىمدەر 56 ساعاتپەن جۇمىس ىستەپ كەلگەن. ءتىپتى 16 ساعاتتان ەكى مەكتەپتە ساباق بەرگەن. زاڭ بويىنشا مۇعالىم 1 جۇكتەمەمەن ول 16 ساعات نەمەسە ءارى كەتسە 1.5 جۇكتەمەمەن, ياعني 24 ساعاتقا دەيىن عانا جۇمىس ىستەي الادى. وسى ارتىق ساعاتتاردىڭ ءبارىن جيناقتاپ, جاڭا جۇمىس ورىندارىن قالىپتاستىردىق. ارتىق جۇكتەمە بەرىپ, بوس جۇمىس ورىندارىن جاسىرعان – مەكتەپتىڭ ءبىرىنشى باسشىلارى. سوندىقتان جاۋاپكەرشىلىك تىكەلەي سولاردىڭ موينىندا. وسىعان قاتىستى پروكۋراتۋرا كەيبىر ديرەكتورلارعا تارتىپتىك جازا قولدانعان. ال بۇگىنگى ءىس-شاراعا كەلسەك, ۋنيۆەرسيتەتتە JPI بويىنشا 3,8 بالمەن بىتىرگەن تۇلەكتەر كونكۋرسسىز جۇمىسقا قابىلدانادى», دەدى گ.دارىباەۆا.
سونىمەن بىرگە «سانا» باعدارلاماسىمەن 1166 بوس جۇمىس ورنى انىقتالعان. نەگىزىنەن حيميا, بيولوگيا, ماتەماتيكا, باستاۋىش سىنىپتارعا ورىس تىلىندە ساباق بەرەتىن مۇعالىمدەر جەتىسپەيدى. كونكۋرستىڭ ءادىل, اشىق وتۋىنە ءبىلىم باسقارماسى كەپىلدىك بەرەدى. بۇگىنگى تاڭدا مەگاپوليستە 164 مەملەكەتتىك, 138 جەكەمەنشىك مەكتەپ جۇمىس ىستەيدى.
بۇل ماسەلەنى ارنايى بريفينگ بارىسىندا قالا اكىمىنىڭ ورىنباسارى سارسەن قۇرانبەك تە ايتقان بولاتىن. ونىڭ مالىمدەۋىنشە, پەداگوگتەردى نەگىزسىز جۇمىستان شىعارۋ بۇدان كەيىن ورىن المايدى. جۇمىستان بوساعان مامان ماسەلەسىمەن تىكەلەي ءوزى اينالىساتىنىنا ۋادە بەردى. كەرىسىنشە, قالا اكىمدىگى مەكتەپ باسشىلارىنا تالىمگەرلىك باستامانى قولعا الۋدى جۇكتەپ وتىر. ول بويىنشا مەكتەپتەر جاڭادان قابىلدانعان مامانداردى بىلىكتى پەداگوگ دارەجەسىنە جەتكەنشە جان-جاقتى قولداۋ كورسەتەدى. سونداي-اق س.قۇرانبەك قالا اكىمى عابيت سىزدىقبەكوۆتىڭ ۇيعارىمىمەن ۇزدىك 100 مۇعالىمگە گرانت تاعايىندالعانىن جەتكىزدى. ول گرانت «ساپالى ءبىلىم» جوباسىنىڭ قورىتىندىسى بويىنشا ۇزدىك اتانعان مۇعالىمدەرگە بەرىلەدى. ياعني ولاردىڭ جالاقىسىنا ۇستەمە رەتىندە 200 مىڭ تەڭگە قوسىلادى. مۇنداعى ماقسات – بىلىكتى كادرلار ارقىلى ءبىلىم ساپاسىن جاقسارتۋ. س.قۇرانبەكتىڭ ايتۋىنشا, شىمكەنتتە ساپالى ءبىلىم بەرەتىن مەكتەپتەر سانى وتە از. ءتىپتى ونعا دا جەتپەيدى. سوندىقتان ءبىلىم بەرەتىن ۇيىمداردىڭ دا ءتۇرلى گرانتتار ارقىلى مارتەبەسىن كوتەرۋ جوسپاردا بار. سارسەن اباي ۇلىنىڭ پىكىرىنشە, قالادا مۇعالىمدەر كادرىنا تاپشىلىق جوق. سەبەبى مەگاپوليستەگى پەداگوگ ماماندىعىن دايارلايتىن جوعارى وقۋ ورىندارى, كوللەدجدەر سۇرانىستىڭ ورنىن تولتىرىپ وتىر. وعان پەداگوگ بولىپ جۇمىس ىستەگەن شەتتەن كەلەتىن قانداستاردى قوسىڭىز. دەي تۇرعانمەن, ول مامانداردىڭ جۇمىسقا تۇرا الماۋىنا ءبىرىنشى كەزەكتە بوس جۇمىس ورىندارى كونكۋرسىن دەر كەزىندە وتكىزبەگەن مەكتەپ باسشىلىعى كىنالى دەيدى. ونىڭ ۇستىنە جىل سايىن قالا اكىمى ءوز تاراپىنان جوعارى وقۋ ورىندارىنا 285 گرانت بولەدى. بۇگىنگە دەيىن بىردە-ءبىر مەكتەپتەن وزدەرىنە قاجەتتى ماماندارعا گرانت ءبولۋ تۋرالى ۇسىنىس كەلىپ تۇسپەگەن. س.قۇرانبەك ءوز سوزىندە جاس پەداگوگتەردى كوبىرەك جۇمىسقا تارتۋ كەرەكتىگىن اتاپ ءوتتى. ويتكەنى ونىڭ ويىنشا جاڭا تەحنولوگيانى جىلدام مەڭگەرەتىن جاس كادرلار ءبىلىم سالاسىندا ءوزارا باسەكەلەستىك تۋعىزىپ, ۇستازدار تاجىريبەسىنىڭ ارتۋىنا ۇلەس قوسپاق. سونىمەن بىرگە ول مەگاپوليستە ناقتى قانشا مۇعالىم ماماندىعىنا تاپشىلىق بارىن بوس جۇمىس ورىندارى جارمەڭكەسىنەن كەيىن بەلگىلى بولاتىنىن مالىمدەدى.
شىمكەنت
