توتەنشە جاعداي كەزىندە مەملەكەت ءتۇرلى باعىتتا تەگەۋرىندى جۇمىستار اتقارىپ, حالىققا بارىنشا قامقورلىق كورسەتىپ جاتىر. ازاماتتاردىڭ اماندىعىن كوزدەيتىن ءىس-شارالار شەڭبەرىندە الەۋمەتتىك قولداۋعا قوسا ەكونوميكالىق تۇراقتىلىقتى قامتاماسىز ەتۋ ماسەلەسى دە نازاردان تىس قالعان جوق. تابىسىنان ايىرىلعان قاراپايىم حالىقتان باستاپ جۇمىسى تۇرالاپ تۇرعان كاسىپكەرلەرگە دەيىن مەملەكەتتىڭ زور قولداۋىن سەزىندى. ەلىمىزدىڭ ءوڭىر-وڭىرىندە حالىققا قارجىلاي دا, زاتتاي دا كومەك بەرىلۋدە. قانشاما ادامعا ازىق-ت ۇلىك ۇلەستىرىلدى.
بۇل باعىتتاعى جۇمىستار توقتامايدى. ويتكەنى ىندەتتىڭ تارالۋ قاۋپى ءالى دە سەيىلە قويعان جوق. سوندىقتان پرەزيدەنت توتەنشە جاعداي رەجىمىن 11 مامىرعا دەيىن ۇزارتاتىنىن ايتتى. ەڭ باستىسى, تابىسىنان ايىرىلعان ازاماتتارعا قولداۋ جالعاسىپ, كەلەسى ايدا دا 42 500 تەڭگەدەن بەرىلەدى. اينالىپ كەلگەندە, مۇنىڭ ءبارى ءبىزدىڭ كونستيتۋتسيادا قازاقستاندى الەۋمەتتىك مەملەكەت دەپ كورسەتكەن تۇجىرىمعا سايكەس كەلەدى. ياعني حالىقتىڭ ءال-اۋقاتى, تۇرمىس-تىرشىلىگى قاشاندا باستى نازاردا بولادى.
كارانتين كەزىندە تىرشىلىگىمىزدى قامتاماسىز ەتىپ وتىرعان ماڭىزدى سالالاردىڭ جۇمىسى ىركىلىپ قالماۋىن قاداعالاۋ ماڭىزدى. وسى رەتتە ازىق-ت ۇلىك تاپشىلىعىنا تاپ بولماۋىمىز ءۇشىن قازىردەن كوكتەمگى ەگىس ناۋقانىنا ەرتە قامدانۋىمىز كەرەك. توتەنشە جاعدايعا تۋرا كەلىپ قالعاندىقتان, بۇل جۇمىستاردى ۇيىمداستىرۋعا بارلىق قاۋىپسىزدىكتى ساقتاي وتىرىپ, ادەتتەگىدەن ەرەكشە ءمان بەرىپ كىرىسكەن دۇرىس. سوندىقتان ديقاندار دا قازىرگى قيىن كەزەڭدە الدىڭعى شەپتە جۇمىس ىستەپ ءجۇر.
ەگىس ناۋقانىنا كوڭىل بولگەندە, ساياجايلاردىڭ تىرلىگىن دە ەستەن شىعارماعان ءجون. ويتكەنى وزدەرىنىڭ ولشەۋلى جەرىنە كوكونىسىن ەگىپ, سودان ناپاقاسىن تاۋىپ وتىرعان ازاماتتار دا بار. سولاردىڭ بىرقاتارى ماعان حابارلاسىپ, جاعدايىن ايتتى. مەن بۇل جونىندە اتىراۋ قالاسىنىڭ اكىمىمەن سويلەسىپ, ماسەلەنى تەزدەتىپ شەشۋدى سۇرادىم. مەرزىمى ءوتىپ كەتپەي تۇرعاندا مۇنداي شارۋاقور ادامداردىڭ جۇمىسىنىڭ كىدىرىپ قالماۋىن دا قاداعالاۋ كەرەك.
سارسەنباي ەڭسەگەنوۆ,
سەنات دەپۋتاتى
