«25 ءساۋىر ءبىزدىڭ مەملەكەتىمىزدىڭ تاريحىندا اتاۋلى كۇن سانالادى. ون سەگىز جىل بۇرىن قازاقستان ەۋروپا فۋتبول قاۋىمداستىقتارى وداعىنىڭ قۇرامىنا ەنىپ, ەلىمىزدە جانە الەمدە ەڭ تانىمال ويىننىڭ دامۋ جولىن جالعاستىردى.
وسى ۋاقىت ارالىعىندا وتاندىق فۋتبول العا نىق قادام جاساپ, قاناتىن كەڭگە جايا باستادى. فۋتبول – ەلىمىزدەگى ەڭ بۇقارالىق سپورت ءتۇرى. قازاقستان قۇراماسى مەن وتاندىق كلۋبتاردىڭ حالىقارالىق ويىندارى ارەنالار مەن تەلەديدار الدىندا وراسان اۋديتوريا جينايدى. ال, ۇلتتىق چەمپيونات تمد ەلدەرى اراسىندا ەڭ مىقتىلاردىڭ قاتارىنا كىرەدى.
شەبەرلىكتى شىڭدايتىن باسەكەسى جوعارى ۋەفا اياسىنداعى جارىستاردا ءبىزدىڭ فۋتبولشىلار مەن باپكەرلەر العا تۇراقتى قادام باسىپ كەلەدى. قازاقستان قۇراماسى ەڭ مىقتى قارسىلاستارىنا سەس كورسەتىپ, وتاندىق كلۋبتارىمىز چەمپيوندار ليگاسى مەن ەۋروپا ليگاسىنىڭ توپتىق كەزەڭىنە شىعىپ ءجۇر. قول جەتكىزگەن تابىستار ءارى قاراي ەل فۋتبولىن ورلەتىپ, بيىك شىڭداردى باعىندىرۋعا ىنتا-جىگەر بەرەدى.
كاسىپقوي فۋتبولدىڭ ىرگەتاسى – بالالار مەن جاسوسپىرىمدەر فۋتبولى جانە بۇقارالىق فۋتبول. قازاقستان فۋتبول فەدەراتسياسى مەن ەلىمىزدەگى ءبىزدىڭ مىڭداعان مۇددەلەستەرىمىز جوسپارعا سايكەس كەلەشەكتەگى جەڭىستەردىڭ نەگىزىن قالاپ كەلەدى. فۋتبول ورتالىقتارى مەن اكادەميالاردىڭ ەسىگى ايقارا اشىلىپ, ينفراقۇرىلىمدار مەن سپورت عيماراتتارى سالىنىپ, كاسىبي باپكەرلەر مەن باسقا ماماندار دا ءبىلىم الا باستادى.
قازاقستاندا فۋتزال, قىزدار فۋتبولى مەن جاعاجاي فۋتبولىنا دا باسا ءمان بەرىلىپ كەلەدى. بۇل باعىتتاردى دامىتىپ, كەڭ تانىمال ەتۋ ماقساتىندا جۇمىستار اتقارىلىپ, جەمىسىن بەرە باستادى. سونىڭ ءبىر ايعاعى حالىقارالىق ارەنادا تىركەلگەن وڭ ناتيجەلەر ەكەنى ءسوزسىز.
بارشا جانكۇيەرلەر مەن فۋتبول جاناشىرلارىن, ويىنشىلار مەن باپكەرلەردى قازاق فۋتبولىنىڭ كۇنىمەن قۇتتىقتايمىن! زور دەنساۋلىق, وركەنيەت پەن امان-ساۋلىق تىلەيمىن! كەزدەسكەن قيىندىقتاردى جاقىن ارادا جەڭىپ, ءبىزدىڭ سۇيىكتى ويىنىمىز تارتىستى كەزدەسۋلەر مەن كەرەمەت كوڭىل-كۇيلەرىمەن قۋانتا تۇسەتىنىنە كۇمان كەلتىرمەيمىن!» دەلىنگەن فەدەراتسيا پرەزيدەنتىنىڭ قۇتتىقتاۋىندا.
