جيىن بارىسىندا «قاندىاعاش – ماقات» جانە «اتىراۋ – رف شەكاراسى (استراحان)» جولدارىنىڭ رەكونسترۋكتسياسى ماسەلەلەرى تالقىلاندى. اتالمىش جوبالار جوعارىدا اتالعان وڭىرلەر مەن ەلدىڭ كولىكتىك الەۋەتىن ارتتىرۋدا ۇلكەن ماڭىزعا يە.
ۇزىندىعى 359 شاقىرىمدى قۇرايتىن «قاندىاعاش – ماقات» اۆتوموبيل جولىنىڭ قۇرىلىسى 2018 جىلى باستالعان بولاتىن. بيىل جولشىلار توپىراقتىڭ 40,5 مىڭ تەكشە مەترىن, جولدىڭ 5 شاقىرىمىنا جول تابانىنىڭ نەگىزگى قاباتتارىن توسەدى. سونىمەن قاتار, قيىرشىق تاستىڭ 598 مىڭ تەكشە مەترى, تبب 2,4 مىڭ تەكشە مەترى مەن بيتۋمنىڭ 8,7 مىڭ تونناسى دايىندالدى. جۇمىستارعا تەحنيكانىڭ 570 بىرلىگى مەن 950-دەن استام مامان جۇمىلدىرىلعان. قايتا جاڭارتۋ جۇمىستارى 2021 جىلى تولىقتاي اياقتالادى دەپ جوسپارلانۋدا.
يدم باسشىسى جۇمىستاردى جىل سوڭىنا دەيىن اياقتاپ, اقتوبە وبلىسىنداعى ۇزىندىعى 154 شاقىرىمدى قۇرايتىن اۆتوموبيل جولىنىڭ ۋچاسكەسىن پايدالانۋعا بەرۋدى, كولىكتەردىڭ اتىراۋ وبلىسىنداعى جولدىڭ 40 شاقىرىمىندا جول جابىندىسىنىڭ تومەنگى قاباتىمەن ءجۇرۋىن قامتاماسىز ەتۋدى تاپسىردى.
ۇزىندىعى 217 شاقىرىمدى قۇرايتىن «اتىراۋ – رف شەكاراسى (استراحان)» جولىنىڭ قۇرىلىسى 2019 جىلى باستالدى. بيىل نىساندا توپىراقتىڭ 2,1 مىڭ تەكشە مەترى, 6,3 شاقىرىمعا جول تابانىنىڭ قاباتى توسەلىپ, قيىرشىق تاستىڭ 107,4 مىڭ تەكشە مەترى دايىندالدى. جوبا اياسىنداعى جۇمىستارعا تەحنيكانىڭ 171 بىرلىگى مەن 271 ادام جۇمىلدىرىلدى. جوسپارعا سايكەس اۆتوموبيل جولى 2023 جىلى پايدالانۋعا بەرىلۋى ءتيىس. بەيبىت اتامقۇلوۆ بيىل جولدىڭ 60 شاقىرىمىندا قوزعالىستى اشۋ قاجەتتىگىن, جولدىڭ تولىق بويىندا جۇمىستاردى بەلسەندى جۇرگىزۋ قاجەتتىگىن اتاپ ءوتتى.
بۇدان بولەك, اتالمىش وڭىرلەردە ۇزىندىعى 89 شاقىرىمدى قۇرايتىن «اقتوبە – اتىراۋ» جوباسىن ىسكە اسىرۋ, 27 شاقىرىمدىق اتىراۋ قالاسىنىڭ بۇرما جولىنىڭ قۇرىلىسى جوسپارلانعان.
مينيستر وسى جىلعا جوسپارلانعان جۇمىستاردىڭ 100% ورىندالۋىن قامتاماسىز ەتۋدى تاپسىردى.
ەسكە سالايىق, قر ۇكىمەتى ەلىمىزدىڭ اۆتوموبيل جولدارى سالاسىنىڭ الدىنا 2020 جىلدىڭ سوڭىنا دەيىن جولداردىڭ 2,6 مىڭ شاقىرىمىندا قوزعالىستى اشۋ سياقتى ۇلكەن مىندەتتى قويعان بولاتىن.
