20 ناۋرىزدا تۇڭعىش پرەزيدەنت – ەلباسى ن.نازارباەۆ COVID-19 پاندەمياسىنا بايلانىستى قازاقستاندىقتارعا ۇندەۋ تاستاپ, كاسىپكەرلەردى كۇردەلى كەزەڭدە كومەك كورسەتۋگە شاقىردى.
«بۇل قيىن كەزەڭدە ەل-جۇرتقا كومەكتەسكىسى كەلەتىن جانە جاردەم بەرە الاتىن ادامداردىڭ قاراجاتى جيناقتالاتىن رەسپۋبليكالىق قور قۇرۋدى ۇسىنامىن. وسىنداي جاعدايدا بۇرىنعىشا وتاندىق ءىرى كاسىپورىندار دا قولداۋ كورسەتەدى دەپ سەنەمىن», – دەدى نۇرسۇلتان نازارباەۆ. بۇل ۇندەۋگە قازاقستاندىقتاردىڭ كوپشىلىگى, كاسىپكەرلەر مەن كومپانيالار قولداۋ ءبىلدىردى. اكتسياعا مۇناي كاسىبىنە قىزمەت كورسەتەتىن ءىرى كومپانيا «CHI» دە قوسىلدى.
كومپانيانىڭ نەگىزىن قالاۋشى, «بولاشاق» قاۋىمداستىعى كەڭەسىنىڭ قۇرمەتتى مۇشەسى الماس قۇدايبەرگەننىڭ باستاماسىمەن ىندەتپەن كۇرەسكە ارنايى قاراجات ءبولىندى. وسى قاراجاتقا 17 مىڭنان استام مەديتسينالىق ماسكا مەن 100 كونتەينەر انتيسەپتيك ساتىپ الىندى. قاجەتتى زاتتار نۇر-سۇلتان مەن اتىراۋ قالالارىنداعى دارىگەرلەرگە بەرىلدى.
سونداي-اق, كومپانيا قىزمەتكەرلەرى كوروناۆيرۋس ينفەكتسياسىن جۇقتىرعان ناۋقاستاردى ەمدەيتىن مەديتسينا قىزمەتكەرلەرىن قولداۋ ماقساتىندا ونلاين فلەشموب وتكىزدى. قاتىسۋشىلار دارىگەرلەرگە ارناپ ەكى تىلدە ولەڭ وقىپ, ريزاشىلىق ءبىلدىردى. ەلوردا اكىمىنىڭ ورىنباسارى باحتيار ماكەن كورسەتىلگەن كومەك ءۇشىن قاۋىمداستىق مۇشەلەرىنە العىس ايتتى.
«وتانداستارىمىزعا كومەكتەسۋگە مۇمكىندىگى بار قازاقستاندىقتار ەلباسى ۇندەۋىن نازاردان تىس قالدىرماي, ورتاق ىسكە ءوز ۇلەسىن قوساتىنىنا سەنىمدىمىز», – دەپ اتاپ ءوتتى ول.
ەستەرىڭىزگە سالا كەتەيىك, CHI – قازاقستاندىق مۇناي-كەن ورىندارىنا قىزمەت كورسەتەتىن ءىرى كومپانيا. كومپانيا تەڭىز كەنىشىندە جانە باسقا دا كەن ورىندارىندا جۇمىس ىستەپ, مىڭنان استام قازاقستان ازاماتتارىن جۇمىسپەن قامتاماسىز ەتىپ وتىر.
