ادىستەمەنى سەمەي مەديتسينا ۋنيۆەرسيتەتىنىڭ عالىمى, مەديتسينا عىلىمدارىنىڭ دوكتورى, رەانيماتولوگ مارات سىزدىقباەۆ ءوزىنىڭ اتالعان جوعارى وقۋ ورنىنداعى ارىپتەستەرىمەن بىرلەسىپ جازعان.
ول وزى ازىرلەگەن ادىستەمەسىنە اۆتورلىق قۇقىق الماسا دا, جاڭالىعىمەن ءبولىسىپ, يگىلىگىن ەلدىڭ, قوعامنىڭ كورە بەرگەنىن قالايدى.
مارات سىزدىقباەۆ:
«قالامىزداعى ەڭ العاش اۋىرعان ەرلى-زايىپتىلارعا وسى ادىستەمە قولدانىلدى. اسىرەسە جۇقپالى دەرتپەن اۋىرعان ەر ادام اۋىر حالدە بولعان, قازىر جازىلىپ, اياققا تۇردى. ەندى وسى ادىستەمەنى ەلىمىزدە قولدانساق, پايداسىن بەرەتىنىنە سەنىمدىمىز. ءارى اشىق تۇردە الەمنىڭ كەز كەلگەن ماماندارى قولدانۋى ءۇشىن دە تاراتامىز», دەيدى Qazaqstan ۇلتتىق ارناسىنداعى ارىپتەسىمىزگە بەرگەن سۇحباتىندا.
سەمەي مەديتسينا ۋنيۆەرسيتەتىنىڭ رەكتورى ەرسىن ءجۇنىسوۆ تە ماماندارىن ءوز كەزەگىندە قولداپ, ادىستەمەنىڭ كەڭىنەن تارالۋى ءۇشىن ەلىمىزدەگى ارىپتەستەرىن جاڭالىقتان حاباردار ەتىپ جاتقانىن ايتادى. بۇدان بولەك ۋنيۆەرسيتەتتىڭ بىلىكتى عالىمدارى سەمەيدەگى ينفەكتسيالىق اۋرۋحانانىڭ پاندەميامەن كۇرەسىپ جۇرگەن دارىگەرلەرىنە تاۋلىك بويى تولاسسىز كەڭەس بەرىپ وتىرۋ ماقساتىندا ارنايى توپ قۇرعان. ۋنيۆەرسيتەت عالىمدارى قاۋىپتى ىندەتتى جۇقتىرعان ناۋقاستاردى ەمدەپ جاتقان ەلىمىزدىڭ بارلىق دارىگەرلەرىنە كەڭەس بەرۋگە ءازىر ەكەنىن جەتكىزدى.
