بۇگىن جامبىل وبلىسىنىڭ اكىمى بەردىبەك ساپارباەۆ ارداگەردىڭ شاڭىراعىندا بولىپ, مەملەكەت باسشىسى قاسىم-جومارت توقاەۆتىڭ قۇتتىقتاۋ حاتىن تاپسىردى. قازاقستان رەسپۋبليكاسىنىڭ پرەزيدەنتى قاسىم-جومارت توقاەۆ ءوز حاتىندا اعا ۇرپاق تىلەۋقابىل تورەبەكوۆتى مەرەيتويىمەن قۇتتىقتايتىنىن جەتكىزىپ, ونىڭ ءومىر جولى بۇگىنگى ۇرپاق ءۇشىن ۇلگى-ونەگە بولىپ تابىلاتىنىن اتاپ وتكەن.
تىلەۋقابىل تورەبەكوۆ كەڭەس اسكەرىنىڭ قاتارىندا ميليتاريستىك جاپونيامەن سوعىسقان ەرجۇرەك مايدانگەر. ال, سوعىس اياقتالعان سوڭ جامبىل وبلىسىنىڭ دامۋىنا ۇلەس قوستى. 1950-1966 جىلدار ارالىعىندا ول وبلىستىق پارتيا كوميتەتى ءبىرىنشى حاتشىسىنىڭ كومەكشىسى, ءبولىم مەڭگەرۋشىسى بولىپ جۇمىس ىستەدى. جامبىل قالالىق پارتيا كوميتەتىنىڭ ەكىنشى حاتشىسى, 1970 جىلدان 1983 جىلعا دەيىن جامبىل قالالىق اتقارۋ كوميتەتىنىڭ توراعاسى قىزمەتىن اتقاردى. تىلەۋقابىل تورەبەك ۇلى قۇرمەتتى دەمالىسقا شىققاندا دا قوعامدىق جۇمىستان تىس قالعان جوق. 1995 جىلدان 2015 جىلعا دەيىن وبلىستىق ارداگەرلەر كەڭەسىن باسقاردى.
ول ءىىى دارەجەلى داڭق, ءىى دارەجەلى وتان سوعىسى, ەڭبەك قىزىل تۋ, «قۇرمەت بەلگىسى» وردەندەرىمەن, 13 مەدالمەن, ونىڭ ىشىندە «ەرلىگى ءۇشىن» مەدالىمەن ماراپاتتالعان. التى بالا تاربيەلەپ وسىرگەن.
بەردىبەك ساپارباەۆ قاريامەن اڭگىمە بارىسىندا ارداگەردىڭ ءوڭىردىڭ الەۋمەتتىك-ەكونوميكالىق دامۋىنا قوسقان زور ۇلەسىن, ونىڭ ۇيىمداستىرۋشىلىق قابىلەتىن جانە بىلىكتىلىك قاسيەتتەرىن اتاپ ءوتتى. سونىمەن قاتار, ءوڭىر باسشىسى تىلەۋقابىل تورەبەكوۆتى ۇلى جەڭىستىڭ 75 جىلدىعىمەن قۇتتىقتاپ, ارداگەرگە 1 ميلليون تەڭگەلىك سەرتيفيكات تابىس ەتتى.
جامبىل وبلىسى
