- «ماقتانساڭ – شاكىرتىڭمەن ماقتان» دەمەكشى, مۇنداي جاستار ءوز ارامىزدا, ولاردىڭ ءبىرى – ىنتا قويىپ, تاپسىرىلعان ىسكە ەرەكشە ىقىلاسپەن كىرىسەتىن شاكىرتىم, «مۇناي گاز ءىسى» ماماندىعىنىڭ 4-كۋرس ستۋدەنتى امانيازوۆ ەرمەك. كۇنى كەشە كونراد ادەناۋەر قورى ۇيىمداستىرعان Sur-Place باعدارلاماسى اياسىنداعى رەسپۋبليكالىق كونكۋرستىڭ ستيپەندياتى اتاندى, اتالعان كونكۋرسقا قاتىسىپ, اقپان ايىندا اقتوبە قالاسىندا وسى قور وكىلدىگىنىڭ ديرەكتورى توماس حەلممەن سۇحباتقا قاتىسىپ كەلگەن بولاتىن, دەيدى «مۇناي گاز ينجينيرينگى» كافەدراسىنىڭ دوتسەنتى م.كاراجانوۆا.
ايتا كەتەرلىك, قازاقستاندىق جوو-دارىنىڭ ستۋدەنتتەرىنە ارنالعان جەرگىلىكتى گرانتتاردىڭ Sur-Place باعدارلاماسى 2007 جىلدان بەرى قازاقستاننىڭ جاس ەليتاسىن قولداپ كەلەدى. ك.ادەناۋەر قورى ەلىمىزدەگى ازاماتتىق قوعام ۇيىمدارىمەن, ۋنيۆەرسيتەتتەرمەن, ساياسي پارتيالارمەن جانە جەكەلەگەن ەليتالارمەن تىعىز بايلانىستا جۇمىس جاساي وتىرىپ, ايماقتىق جانە جاھاندىق ساياسي ارىپتەستىكتى دامىتۋعا نەگىزدەلگەن. بۇل قور باعدارلاماسىنىڭ نەگىزگى ماقساتى جاستاردىڭ وقۋدا ءوز قابىلەتتەرىن اشۋ عانا ەمەس, ءوز ءبىلىمىن, كۇشى مەن باستاماسىن ءوز ەلىنىڭ ساياسي جانە الەۋمەتتىك ومىرىنە قاتىسۋعا ارناۋعا ۇمتىلاتىن دارىندى جاستارعا قولداۋ كورسەتۋ. قاتىسۋشىلاردى ىرىكتەۋ ەلدىڭ قوعامدىق-ساياسي ومىرىنە بەلسەندى قاتىساتىن جەكە ومىرلىك نىق ۇستانىمى, دۇنيەتانىمى كەڭ جانە ايقىن ماقساتى بار ستۋدەنتتەردى انىقتاۋ نەگىزىندە جۇرگىزىلەدى. قوردىڭ باسىم باعىتتارى ساياسات جانە باق, جەرگىلىكتى ءوزىن-ءوزى باسقارۋ, ساياسي ءبىلىم بولىپ, تەحنيكالىق سالالارعا سالىستىرمالى تۇردە از نازار اۋدارىلاتىندىقتان جانە تاپسىرىس بەرگەن 400 كانديدات ىشىنەن ىرىكتەلگەن 30 شاقتى ستۋدەنت اراسىنان تابىلعان ەرمەكتىڭ بۇل جەتىستىگى, ارينە, ۇستازدارى ءۇشىن قۋانارلىق جايت.
ۇستازدارىنىڭ ۇكىلى ءۇمىتى ەرمەك 2017 جىلى KazEnergy جانە Shell كومپانيالارىنىڭ ۇيىمداستىرۋىمەن Student Energy Challenge اتتى رەسپۋبليكالىق عىلىمي جوبالار بايقاۋىندا جۇلدەلى ورىن السا, سول جىلى اقتاۋ قالالىق مادەنيەت جانە تىلدەردى دامىتۋ ورتالىعىنان تۇڭعىش پرەزيدەنت كۇنىنە وراي وتكىزىلگەن «تۇڭعىش پرەزيدەنت جانە مەنىڭ وتانىم» اتتى قالالىق شىعارما جازۋ بايقاۋىندا 2-ءشى ورىندى يەمدەندى. 2019 جىلى 31 ناۋرىزدا تشو جانە NCOC مۇناي كومپانيالارىنىڭ جانە SPE قاۋىمداستىعىنىڭ ۇيىمداستىرۋىمەن وتكەن حالىقارالىق «Atyrau International Petroleum Olympiad» تەحنيكالىق وليمپياداسىندا توپتىق ەسەپتە 1-ءشى ورىندى يەمدەنىپ, ماراپات رەتىندە NCOC كومپانياسىندا وندىرىستىك تاجىريبەدەن ءوتىپ كەلدى. قاتىسقان شارالاردىڭ وزەكتىلىگى, ماقساتى, مىندەتتەرى, ۇسىنىستارى تۋرالى وي تۇجىرىمداپ, ەرەكشە ءمان بەرۋى ونىڭ ودان ءارى قاناتتانىپ, بيىك بەلەستەردەن كورىنۋىنە بىردەن-ءبىر سەبەپشى بولدى.
- شاكىرتىمىزدى ماقتان ەتە وتىرىپ, ونىڭ كاسىبي مامان بولىپ قالىپتاسۋىمەن قاتار, ەلىمىزدىڭ بولاشاعىنا, بىرلىككە, جاسامپاز تىرلىككە قىزمەت ەتۋىنە ۇلكەن ءۇمىتىمىز بار, - دەيدى ۇستازى م.كاراجانوۆا.
