ايتۋلى شابۋىلشىنىڭ سپورتتىق عۇمىرىندا جارقىن جەڭىستەر از بولعان جوق. ماسكەۋدىڭ «دينامو» كلۋبىنىڭ تۇلەگى 2005 جىلى مۇحيت اسىپ, «ۆاشينگتون كەپيتالز» كلۋبىنىڭ جەيدەسىن كيدى. اقش-قا كەلگەن جىلى-اق وۆەچكين ەڭ ۇزدىك دەبيۋتانتقا تابىستالاتىن «كولدەر تروفي» جۇلدەسىن يەلەندى. سەگىز رەت ەڭ مەرگەن شابۋىلشى جانە ءۇش رەت ەڭ قۇندى ويىنشى اتاندى. ۇحل-دىڭ «جۇلدىزدار ماتچىندا» جەتى رەت ونەر كورسەتتى. 2009 جىلى ۇحل-دىڭ سوڭعى ونجىلدىعىنداعى ەڭ ۇزدىك حوككەيشىلەر تىزىمىنە ەندى. ۇحل تاريحىنداعى 100 داڭقتى ويىنشىلار قاتارىنا ورىن تەپتى.
رەسەيدىڭ قۇراماسىنا 17 جاسىندا قابىلدانعان الەكساندر وۆەچكين ايتۋلى مەملەكەتتىڭ نامىسىن قورعاعان جانە گول سوققان ەڭ جاس حوككەيشى رەتىندە تاريحتا قالدى. ۇلتتىق كومانانىڭ ساپىندا ول ءۇش دۇركىن الەم چەمپيونى, ەكى دۇركىن كۇمىس جانە ءتورت دۇركىن قولا جۇلدەگەر اتاندى. وسىنداي اتاق داڭقى بولا تۇرا وۆەچكين وليمپيادا تۇعىرىنا ءالى بىردە-ءبىر رەت كوتەرىلگەن ەمەس. ەندى ول سول ولقىلىقتىڭ ورنىن تولتىرعاسى كەلەتىنىن مالىمدەدى.
- وليمپيا ويىندارىندا توپ جارۋدى بالا كەزىمنەن ارمانداعانمىن. الايدا وسى جوسپاردى جۇزەگە اسىرۋدىڭ رەتى ءبىر كەلمەگەن ەدى. ەندى سول ولقىلىقتىڭ ورنىن تولتىرۋدى ماقسات تۇتىپ وتىرمىن, - دەيدى داڭقتى حوككەيشى.
