وقيعا بىلاي بولعان: زەينەتكەر ايەلگە بەلگىسىز ەر ادام حابارلاسىپ, ءوزىن كاسپي بانكىنىڭ قاۋىپسىزدىك قىزمەتىنەن ەكەندىگىن, الدەبىرەۋلەر مۇنىڭ اتىنان نەسيە تولتىرعالى جاتقانىن ايتىپ, ساقتاندىرعان. ءارى-بەرى اڭگىمەدەن كەيىن ونىڭ سەنىمىنە كىرىپ, ءوزى نەسيە الىپ بەرە الاتىنىن ايتادى. وسىلايشا ايەل اۋەلى وزىنە, كەيىن قىزىنا دا نەسيە تولتىرادى.
مۇنىمەن قويماي «قاۋىپسىزدىك قىزمەتكەرى» الگى ايەلدىڭ دەپوزيتى بار-جوعىن سۇراپ, ونداعى بار اقشانى سەنىمدى شوتقا اۋدارۋعا كەڭەس بەرەدى. ايەل بارلىق ايتقانىن مۇلتىكسىز ورىندايدى.
اقىر سوڭىندا ايەل الاياققا جالپى سوماسى 1 ملن 440 مىڭ تەڭگە كولەمىندە اقشا اۋدارىپ جىبەرگەن.
«ورال قالالىق پوليتسيا باسقارماسى وسى وقيعا بويىنشا قىلمىستى اشۋ ءۇشىن قىلمىستىق كودەكستىڭ 190-بابى 2-بولىمىنە (الاياقتىق) سايكەس سوتقا دەيىنگى تەرگەۋ امالدارىن باستادى» دەپ حابارلايدى پوليتسيانىڭ ءباسپاسوز قىزمەتى.
وسىعان ۇقساس وقيعا بيىلعى ناۋرىز ايىنىڭ 30-ى كۇنى بولعان ەكەن. ول كەزدە ورال قالاسىنىڭ 31 جاستاعى تۇرعىنى ونلاين نەسيە الىپ بەرەمىن دەگەن الاياققا سەنىپ, «Kaspi.kz» قوسىمشاسى ارقىلى 56 700 تەڭگە اقشاسىن اۋدارىپ جىبەرگەن.
كارانتين كەزىندە كوپ ءىس-ارەكەت ونلاين ارقىلى ءجۇرىپ جاتىر. وسى كەزدە الاياقتاردىڭ ارباۋىنا ءتۇسىپ قالماۋ ءۇشىن پوليتسيا بانك كارتاسىنداعى جەكە دەرەكتەردى, پارولدار مەن SMS-كودتاردى بوگدە ادامعا كورسەتۋگە بولمايتىنىن ەسكەرتەدى.
باتىس قازاقستان
