جاپپاي جۇمىلۋدىڭ ارقاسىندا قىتاي قاتەرلى ىندەتتى تولىق جەڭدى دەمەسەك تە, تاجالدىڭ بەتىن تويتاردى. الىپ مەملەكەتتىڭ وسى باعىتتاعى تىڭ تاجىريبەلەرىن الەمنىڭ بىرقاتار ەلدەرى نىسانعا الىپ, كوروناۆيرۋسپەن كۇرەستە ولاردىڭ اقىل-كەڭەسىنە جۇگىنۋدە.
الماتىدا ءوتىپ جاتقان قىتايلىق دارىگەرلەردىڭ كوروناۆيرۋس تۋرالى ونلاين ساباعىنا قاتىسۋ - تەگىن. بۇل ساباقتار تەك قازاقستاندىق مامانداردىڭ عانا ەمەس, شەتەلدىك دارىگەرلەردىڭ دە قىزىعۋشىلىعىن تۋدىرىپ وتىر. كۇنى كەشەگە دەيىن الماتىدا كوروناۆيرۋسپەن كۇرەس تاسىلدەرىن ۇيرەتۋ ءۇشىن قىتايدان كەلگەن دەلەگاتسيانىڭ ونلاين ترەنينگىن 700-گە جۋىق مەديتسينا قىزمەتكەرى تىڭداعان.
ساباقتار تەك ەمدەۋ مەن دياگنوستيكا سالاسىنا عانا قاتىستى ءوتىپ جاتقان جوق. ايتالىق, شىڭجاڭ وكرۋگىندەگى دوستىق گوسپيتالىنىڭ اعا مەدبيكەسى يۋ. يانسيا ينفەكتسيالىق ستاتسيوناردى زاراراسىزداندىرۋ تاسىلدەرىمەن ءبولىستى. «وقشاۋلاۋدىڭ باستى شارتى - «1 ناۋقاس – 1 پالاتا» قاعيداسىن ۇستانۋ. ءبىز اۋرۋحانالاردى 3 تيپكە بولدىك. جاسىل - تازا ايماق, سارى - جارتىلاي تازا ايماق, قىزىل - جۇقتىرۋ ايماعى. بۇل ايماقتاردىڭ ارقايسىسىن وزىنشە تازالايتىنبىز. ورتا ەسەپپەن كۇنىنە 2 رەت زارارسىزداندىرىپ وتىردىق. اۋانى, قابىرعالاردى, ەدەن مەن قۇرال-جابدىقتاردى دەزينفەكتسيالادىق. تولىق زارارسىزداندىرۋعا 30 مينۋت ۋاقىت كەتەدى. دەزينفەكتسيادان شىققان سوڭ بارلىق ماتەريالدار جويىلادى», - دەدى ءوز تاجىريبەسىمەن بولىسكەن مامان.
قىتايدان الماتىعا كەلگەن تاعى ءبىر بىلىكتى مامان تسيۋ گاۋنفەنگ دەنەسىن دەرت دەندەگەن جاندارعا پسيحولوگيالىق كومەك كورسەتۋدىڭ ماڭىزى زور ەكەنىن تىلگە تيەك ەتتى. دارىگەردىڭ سوزىنشە, كارانتيندە وتىرعان جانداردىڭ جۇيكەسى تەز سىر بەرەدى. سوندىقتان ءار ەل ءوزىنىڭ ۇلتتىق تانىمىنان سىر شەرتەتىن ءتۇرلى بيلەرىمەن, اندەرىمەن دە ناۋقاستاردىڭ كوڭىلىنە مەدەۋ سىيلاي الادى.
بۇل تۇرعىدا ول قازاق دارىگەرىنىڭ «قارا جورعا ءبيىن بيلەۋى ۋحاندىق ناۋقاستاردىڭ وڭالۋىنا وڭ اسەر ەتكەنىن مىسال رەتىندە ايتا كەتتى. تسيۋ گاۋنفەنگتىڭ ايتۋىنشا, ناۋقاستار كۇنىنە ەكى مارتە تىنىس الۋدى جاقسارتاتىن جاتتىعۋ جاساپ, بي بيلەگەنى دۇرىس. ەڭ باستىسى ءبارى دە كوڭىل كۇي ىرعاعىنا ساي بولعانى ابزال.
قىتايدان ارنايى كەلگەن ماماندار الماتىدا 23 ساۋىرگە دەيىن بولادى. الداعى كۇندەرى تاعى دا بىرنەشە ونلاين ساباق وتكىزۋ جوسپاردا بار.
