–بالەت تەرميندەرى مەن ولاردىڭ ماعىناسى تۋرالى نە بىلەسىزدەر؟ فۋەتە, ان دەور, ان دەدان دەگەنىمىز نە؟ – دەپ, «استانا وپەرا» تەاترى بالەت ترۋپپاسىنىڭ ءسوليسى سەرىك ناقىسپەكوۆ اۋديتورياعا ساۋال تاستادى. ول ساباق بارىسىندا بالەت ونەرىنىڭ نەگىزگى قيمىل-قوزعالىستارى تۋرالى بايانداپ, ءوزى سولاردى كاسىبي جوعارى دەڭگەيدە ورىنداپ بەردى. بۇدان بولەك, كورەرمەن نازارىنا بالەتتىك قويىلىمداردىڭ بەينەتىزبەسى ۇسىنىلىپ, اتالعان بي ەلەمەنتتەرىنىڭ قالاي قولدانىلاتىنى كورسەتىلدى.
«بالەت جانە ونىڭ قىر-سىرى» باعدارلاماسىنىڭ كەلەسى شىعارىلىمى زاماناۋي حورەوگرافياعا ارنالماق. بۇل تۇسىرىلىمدە جۇرتشىلىق بي پلاستيكاسىمەن قانداي ەموتسيالار بەرىلۋى مۇمكىن ەكەنىنەن حاباردار بولادى.
تاعى ءبىر ايتا كەتەتىن جايت, تىكەلەي ەفير ارقىلى بالەت جۇلدىزدارىمەن تانىسىپ, تىلدەسۋگە مۇمكىندىك تۋعىزىلعان. مىسالى, 12 ءساۋىر كۇنى قازاقستاننىڭ ەڭبەك سىڭىرگەن قايراتكەرى گاۋحار ۋسينا تەاتردىڭ ينستاگرام پاراقشاسىنداعى وقىرماندار قويعان سۇراقتارعا جاۋاپ بەرگەن بولاتىن. كورەرمەننىڭ سۇيىكتى ارتىستەرىمەن ينتەرنەت-بايلانىس جاساۋ تاجىريبەسى تىڭ جوبانىڭ سۇرانىسقا يە ەكەنىن كورسەتەدى.
بالەت ترۋپپاسىنىڭ تانىمال ارتىستەرى باقتيار ادامجان مەن ايگەرىم بەكەتاەۆانىڭ شىعارماشىلىعىنا قىزىعۋشىلىق تانىتقان كورەرمەنگە 22 ساۋىردە تاعى ءبىر توسىن سىي ازىرلەنۋدە. بيشىلەر «كارانتيندەگى جۇلدىزدار» جوباسىنا قاتىسادى. بۇل جوبا جەتەكشى سوليستەردى اۋديتورياسىنا بۇرىنعىدان دا جاقىنداتا تۇسەدى دەپ كۇتىلۋدە. ارتىستەر قويىلىم جانرىنان تىس ونەر كورسەتىپ قانا قويماي, وزدەرىنىڭ نەگىزگى كاسىبىمەن ۇيلەستىرە وتىرىپ, شەشەندىك ونەر داعدىلارىن پاش ەتپەك.
كارانتينگە قاراماستان بالەت ارتىستەرى كۇن سايىن ساحنالىق قالىپتارىن ساقتاۋعا, بەكزات ونەردىڭ اسەم يىرىمدەرىن ايشىقتى جەتكىزۋگە تىرىسىپ باعادى. ول ءۇشىن وزدەرىنىڭ ۇستازدارىمەن ءتۇرلى جاتتىعۋلار مەن كومبيناتسيالاردى ورىنداي وتىرىپ, كۇندەلىكتى كلاسسيكالىق بي ساباقتارىنا قاشىقتان جاتتىعادى. ونەر مايتالماندارى جۇرگىزەتىن ساباقتاردىڭ الەۋمەتتىك جەلىلەردە جاريالانۋى بالەت ونەرىن تاڭداعان كەيىنگى جاستار ءۇشىن بىلىكتىلىك ارتتىرۋ الاڭىنا اينالۋدا.
