قازاقستان رەسپۋبليكاسى قارجى مينيسترلىگى قارجى مونيتورينگى كوميتەتىنىڭ باتىس قازاقستان وبلىستىق ەكونوميكالىق تەرگەۋ دەپارتامەنتى قىزمەتكەرلەرى جەدەل-ىزدەستىرۋ شارالارى بارىسىندا مۇناي ءونىمىن ءتيىستى قۇجاتسىز تاسىمالداعان كولىكتى ۇستاپ الدى. جانارماي «نافتۋنويل» جشس-نەن قازتالوۆ اۋدانىنىڭ بىرنەشە بالاباقشاسى مەن مەكتەبىنە جىلىتۋ ماۋسىمىنا پايدالانىلاتىن دت-3-ك4 ماركالى ەۋرو ستاندارتىنا سايكەس ديزەل وتىنى رەتىندە جولدانعان ەكەن.
وقيعا بىلاي بولعان: «نافتۋنويل» كاسىپورنىنىڭ ديرەكتورى 2019 جىلى تامىز ايىندا قازتالوۆ اۋدانىنداعى وقىتۋ مەكەمەلەرىمەن 59 ملن تەڭگە سوماسىنا جالپى كولەمى 247 توننا ديزەل وتىنىن جەتكىزۋ ءۇشىن بىرنەشە كەلىسىم-شارت جاساعان. الايدا, ديزەل وتىنىنىڭ ورنىنا مۇنايدى ەكىنشى رەت ءبولىپ الۋ پروتسەسىندە الىناتىن فراكتسيالار (بەنزين, كەروسين) قوسپاسى جالعان قۇجاتپەن جەتكىزىلىپ وتىرعان.
قازىرگى تاڭدا قازتالوۆ اۋدانىنىڭ №2 سوتى زيانكەس كاسىپكەردى قازاقستان رەسپۋبليكاسى قىلمىستىق كودەكسىنىڭ 197-بابىنىڭ 2-ءبولىمى بويىنشا سوتتادى.
سوت جشس ديرەكتورى ە.سەرىكباەۆتى 20 ايلىق ەسەپتىك كورسەتكىش كولەمىندە 50500 تەڭگە ايىپپۇل تولەۋگە, ودان مەملەكەت پايداسىنا 1097872 تەڭگە پروتسەسسۋالدىق شىعىنداردى ءوندىرىپ الۋعا جانە جابىرلەنۋشىلەردىڭ جاردەماقى قورىنا 5 ايلىق ەسەپتىك كورسەتكىش – 12625 تەڭگەنى ماجبۇرلەپ اۋدارتۋعا ۇكىم ەتتى.
«2020 جىلعى 10 ساۋىردە توتەنشە جاعداي جونىندەگى مەملەكەتتىك كوميسسيانىڭ كەزەكتى وتىرىسىندا قازاقستان رەسپۋبليكاسى قاسىم-جومارت توقاەۆ اتاپ وتكەن تاپسىرمالاردى ورىنداۋ ماقساتىندا مينيسترلىكتىڭ قارجى مونيتورينگى كوميتەتى ساپاسىز جانار-جاعارمايدى زاڭسىز جەتكىزەتىن كومپانيالار مەن جەكە تۇلعالاردى انىقتاۋ بويىنشا جۇيەلى جۇمىس جۇرگىزۋدە» دەلىنگەن قارجى مونيتورينگى كوميتەتىنىڭ ءباسپاسوز قىزمەتى.
باتىس قازاقستان
