17 ءساۋىردىڭ تاڭىندا باتىس قازاقستان وبلىسىندا «COVID-19» ينفەكتسياسىن جاڭادان جۇقتىرعان 5 وقيعا تىركەلدى.
- ولاردىڭ بىرەۋى – ورال قالاسىنىڭ 30 جاستاعى تۇرعىنى. ول كوروناۆيرۋستىق ينفەكتسيا جۇقتىرعان اداممەن قارىم-قاتىناستا بولعان. تاعى 4 ازامات رەسەي فەدەراتسياسىندا ۆاحتا ادىسىمەن جۇمىس جاساپ كەلگەن باتىس قازاقستان وبلىسىنىڭ تۇرعىندارى, - دەدى باتىس قازاقستان وبلىستىق تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتى باسشىسىنىڭ ورىنباسارى نۇرلىبەك مۇستاەۆ.
ۆاحتالىق جۇمىسشىلار رەسەي فەدەراتسياسىنىڭ ساراتوۆ وبلىسىمەن شەكاراسىنداعى «تاسقالا» اۆتووتكەلىندە سانيتارلىق-كارانتيندىك بەكەتتەن وتكەن كەزىندە ەشقانداي اۋرۋ بەلگىسىن سەزىنبەگەن. بىراق ەپيدەميولوگ ماماندار قاشىقتان تەرمومەتريا جاساپ, ساۋالناما جۇرگىزىپ, زەرتحانالىق تەكسەرۋ ءۇشىن كارانتيندىك ستاتسيونارعا جىبەردى. سول جەردە دياگنوستيكالىق زەرتتەۋ قورىتىندىسى ولاردىڭ بويىندا قاۋىپتى ينفەكتسيا بار ەكەنىن ناقتىلادى.
«قازىرگى تاڭدا ناۋقاستاردىڭ جاعدايلارى قاناعاتتانارلىق. بارلىعى وبلىستىق جۇقپالى اۋرۋلار اۋرۋحاناسىنا ورنالاستىرىلدى. ناۋقاسپەن قارىم-قاتىناستا بولعان ادامدار انىقتالىپ, بارلىعى مەديتسينالىق باقىلاۋعا الىنۋدا. اۋرۋ وشاقتارىندا ەپيدزەرتتەۋ, دەزينفەكتسيا جۇمىستارى جۇرگىزىلۋدە» دەلىنگەن باتىس قازاقستان وبلىسى كوميسسياسىنىڭ شۇعىل شتابى تاراتقان مالىمدەمەدە.
قازىرگى ساتتە باتىس قازاقستان وبلىستىق جۇقپالى اۋرۋلار اۋرۋحاناسىندا – 28 ادام, پروۆيزورلىق ستاتسيوناردا – 50, كارانتيندىك ستاتسيوناردا – 158, ءۇي وقشاۋلاۋىندا – 1396 ادام دارىگەر باقىلاۋىندا.
باتىس قازاقستان
