اناسى بار ادامدار قارتايمايتىنى انىق. جىلى ءسوزى, شۋاقتى شاپاعاتى, ىستىق ىقىلاسى جاسارتا تۇسەتىن شاشىلعان شۋاق ەكەنى كۇمانسىز.
بالا كەزىمىز اۋىلدا ءوتتى. سۇراپىل سوعىس باستالعاندا ون جاستا ەدىك. ول كەزدەگى ون جاسار بالادا قازىرگى جيىرماداعى, وتىزداعى جىگىتتىڭ اقىلى بار سياقتى ەدى. كونبىس, ەڭبەكشىل بولدىق. ەڭبەكتىڭ, ءبىر ءتۇيىر ءداننىڭ قادىرىن ءبىلىپ وستىك.
بىزدەر اۋىلدا سوعىستىڭ جەسىرلەرىن, سوعىستان ورالعان مۇگەدەك اعالاردى كوردىك. ءبىر ۇيدەن ەكى بىردەي اعا – بىرەۋى ءبىر اياعىن, بىرەۋى جامباسىن بەرىپ ورالدى. ىزدىقۇل, قونىسباي اعالار قارا جەردى ەركىن باسا الماي دۇنيەدەن ءوتتى.
شاعىن اۋىلدا ول كەزدە قازىرگىدەي ورتالىق جوق. ءار اعايىن ءار جەردە ون شاقتى ءۇي بولىپ, ءار جەردە جەكە-جەكە قونىستانىپ وتىراتىن. ەستيار اعالاردىڭ ءبارى سوعىسقا كەتكەن. كارى-قۇرتاڭداردىڭ قولىنا بيلىك ءتيىپ, وكتەم ءامىرىن جۇرگىزە باستاعان كەز. كەلىنشەك بىتكەننىڭ كوبىسى جەسىر. سول جەسىر كەلىنشەكتەردى الگى كارى-قۇرتاڭدار قيىن جۇمىستارعا جۇمسايدى. كونبەسكە امال جوق. سىلتاۋراتسا «ەڭبەك ارمياسى» دەگەن بار, سوعان اتتاندىرىپ تىنادى. سودان كەلىنشەكتەردىڭ كوبىسى ءىنىسىنىڭ, قاينىسىنىڭ بالاسىن اسىراپ الىپ, «ەڭبەك ارمياسىنان» قۇتىلۋدىڭ امالىنا شىقتى. بالاسى بارلارعا «بۇل ارميادان» قۇتىلاتىن جەڭىلدىك بار ەدى.
اۋىلدا ءبىر اعامىز اۋىلدىق كەڭەستى باسقاردى. وسى قىزمەتىن تاستاپ, ءبىر تۇندە سىمباتتى جەسىر كەلىنشەكتى وزبەكستانعا الىپ قاشىپ كەتتى. ەلگە ورالمادى, سول جاقتان ەكەۋىنە دە توپىراق بۇيىردى. ال كوپتەگەن جەسىرلەر اۋىلدان ۇزامادى, ەرلەرىنىڭ شاڭىراعىن كۇتىپ, بوساعادان اتتامادى. بۇرشان, زاعيپا, ءدانىش, ءشاربان, كۇمىسقال, شولپاندار مىقتى ەدى. ەكى اعايىندى شايىرقوجا مەن ەسبەرگەننىڭ ەكى بىردەي ۇلى سوعىستا مەرت بولدى. قوس اتا كۇيزەلىپ, تەز قارتايىپ شوگىپ قالدى. ەكەۋى اتقا ءمىنىپ, مال ىزدەگەن بولىپ ورالماعان ۇلدارىنىڭ ويناعان جەرلەرىن كورىپ, ماۋقىن باسىپ, شەر تارقاتىپ ورالاتىنىن اۋىلداعىلار ءالى كۇنگە جىر ەتىپ ايتادى.
...بايقايمىز, سوعىستىڭ ۇزاققا سوزىلار ءتۇرى بار. اۋىلدا جالعىز حات تاسۋشى سەيىتقاسىم اعا. دورباسىن يىعىنا ءىلىپ الىپ, قالادان كەلگەن بويدا ءۇي-ءۇيدى ارالايدى. كەلگەن بويدا اسكەردەن ورالعان اعالاردىڭ ءۇش بۇرىشتى حاتىن جەتكىزگەنشە اسىقسا, ال اتىڭ وشكىر «قارا قاعازدى» تاپسىرۋعا جۇرەكسىنىپ, بىرەر كۇن ساقتايدى. «قارا قاعاز» العان ءۇيدىڭ قايعىسىن ەستىگىسى كەلمەيدى. امال نە؟ جەسىرلەر داۋسىنان حات تاسۋشىنىڭ جۇرەگى ابدەن شايلىعىپ قالعان.
ال جەسىر قالعان اپا-اجەلەرىمىز بار قيىندىقپەن ومىرلەرىن وتكىزدى, سۇيىكتى جارلارىن كەلەر دەگەن ۇمىتپەن كوبىسى تۇرمىس قۇرمادى. ەندى بىرەۋلەرى شاراسىز كۇيگە ءتۇسىپ, بوساعا جاڭارتقاندارى ءالى ەسىمدە. كۇمىسقال, بۇرشان ەكى بالامەن, ءدانىش ەكى قىزبەن, ءشاربان-نازەنمەن عۇمىر كەشتى. بۇلار سول كەزدە بار-جوعى 20-21 جاستا عانا ەدى. سىمباتتى اپامىز زاعيپانى اۋىلداعى بەلسەندىلەر «ەڭبەك ارمياسىنا» جىبەرەمىز» دەپ مازالادى, سودان ءبىر ءسىڭلىسىنىڭ قىزىن اتىنا جازدىرىپ, باۋىرىنا سالعان سوڭ ارەڭ ەڭبەك ارمياسىنا شاقىرۋدان قۇتىلعانىن ءوزى جىر ەتىپ ايتاتىن ەدى جارىقتىق.
شولپان دەگەن اجەمىز ەكى قىز, ءبىر ۇلمەن سوعىستان بۇرىن جەسىر قالعان ەدى. قايراتىنا تاڭعالامىز. ۇلكەن قىزى اۋىلدا تۇرمىس قۇرعان. سول قىزىنىڭ ۇيىندە بار عۇمىرىن وتكىزدى. جالعىز قىزدىڭ ءبىر ۇلى تىم ءالسىز بولىپ دۇنيەگە كەلدى, سونى تىماققا سالىپ, كەرەگە باسىنا ءىلىپ قويىپ وسىرگەن بەينەتى ءالى كوزگە ەلەستەيدى.
بالا كەزىمىز. شولپان مەن كۇمىسقال اجەنىڭ تىڭ جەرگە ەككەن قاۋىن-اڭگەلەگى الدىمەن پىسەدى. سونى تورۋىلدايمىز. بىرگە وقيتىن ءىزباسار, سارسەنباي, سەرىكبايلاردى اڭگەلەك ۇرلاۋعا كۇن بۇرىن دايىندايمىز. قورانىڭ وسال تۇسىن, تەسىك جەرىنە شولۋ جاسايتىن تاجىريبە بار. قولعا دا تۇسەمىز, ايتەۋىر قۇتىلامىز. جەسىر كەلىنشەكتەر ءسال-ءپال ىزعار شاشادى دا «ۇرلاسا ۇرلاسىن» دەگەندەي كەشىرىممەن قارايدى.
بۇرشان, كۇمىسقال, ءشاربان سىندى اسىل اجەلەرىم ەرىن كۇتۋمەن وزدەرىنىڭ مىقتىلىعىن, سۇيىكتى جارىنا دەگەن ادالدىعىن اۋىلداستارعا ۇلگى ەتىپ, عۇمىر كەشتى. تۇڭعىش اتتاعان شاڭىراعىنا كىر شالدىرمادى. بۇگىن ويلاپ قاراسام, ءبىر عانا ءبىزدىڭ اۋىلدان وتىزعا جۋىق اعالارىم سوعىستان ورالماپتى.
بۇل دۇنيەنى قوزعاۋعا «ەgemen Qاzاqstاn» گازەتىندە (13.11.2019) جاريالانعان س.وردابەكوۆتىڭ «اناعا تاعزىم ەتىڭدەر!» اتتى دۇنيەسى ويتۇرتكى بولدى. اسىلى, جان دۇنيەڭدى وسىلاي قوزعايتىن, تولعانىسقا تۇسىرەتىن دۇنيەلەر كوبەيە بەرگەي.
قايىربەك مىرزاحمەت ۇلى
قىزىلوردا
