«3 ساۋىردە اقپارات جانە قوعامدىق دامۋ ءمينيسترى داۋرەن اباەۆ ارنايى بريفينگ وتكىزىپ, ءدىن سالاسىنداعى ازاماتتارعا, ەل حالقىنا, ءدىني بىرلەستىكتەرگە ۇستانىمدارىن ايتقان بولاتىن. بۇل ۇستانىمدار بويىنشا جالپى ءدىني راسىمدەردى وتكىزۋ كەزىندە حالىقتى كوپ جيناماۋ, سونداي-اق تۇرعىندارعا اقپاراتتى بەرىپ تۇرۋ ءۇشىن ونلاين فورماتىن ەنگىزۋ ۇسىنىلعان ەدى. قۋانتارلىق جاعداي, ەلىمىزدەگى بارلىق ءدىني ۇيىمدار تاراپىنان بۇل ۇسىنىستار قولداۋ تاۋىپ جاتىر», دەدى ءدىن ىستەرى كوميتەتىنىڭ توراعاسى ەرجان نۇكەجانوۆ.
باس ءمۇفتي ناۋرىزباي قاجى تاعان ۇلى قازاقستاندىقتاردى كەلىپ جەتكەن رامازان ايىمەن قۇتتىقتاي كەلە, ازاماتتاردى توتەنشە جاعداي شارتتارىنا تۇسىنىستىكپەن قاراۋعا جانە ءدىني مەرەكەلەردى تويلاۋ كەزىندە بارلىق كارانتيندىك شارانى ساقتاۋعا شاقىردى. سونىمەن قوسا ءدىن قىزمەتكەرلەرى كارانتين كەزىندە 17 643 وتباسىنا كومەك كورسەتكەنىن, 47 821 بەتپەردە تاراتىلعانىن مالىمدەدى.
بريفينگتە قمدب توتەنشە جاعداي كەزىندە ونلاين-ۋاعىزدار مەن دارىستەردىڭ ارنايى كەستەسىن بەكىتكەنى بەلگىلى بولدى. سونداي-اق ازاماتتارىمىزدى قىزىقتىراتىن بارلىق سۇراققا جەدەل جاۋاپ بەرۋ ءۇشىن call-ورتالىق ىسكە قوسىلعانى ايتىلدى.
«ۇلتتىق عارىشتىق زەرتتەۋلەر مەن تەحنولوگيالار ورتالىعى» مەكەمەسىنىڭ عىلىمي مالىمەتىنە سۇيەنىپ, سونداي-اق كورشى وزبەكستان جانە قىرعىزستان مۇسىلماندارى ءدىني باسقارمالارىمەن كەڭەسىپ, رامازان ايىنىڭ باستالاتىن كۇنى بەلگىلەندى. شاريعات ۇكىمى مەن عىلىمي زەرتتەۋ جۇمىسىنىڭ قورىتىندىسىنا سايكەس, مۇسىلماندار اسىعا كۇتەتىن رامازان ايى بيىل ەلىمىزدە 24 ءساۋىر كۇنى باستالاتىن بولدى», دەدى باس ءمۇفتي.
وسى ورايدا ول شاريعات بويىنشا باليعاتقا تولعان, اقىل-ەسى دۇرىس ءاربىر مۇسىلمانعا رامازان ايىندا ورازا ۇستاۋ پارىز ەكەنىن ەسكە سالدى. «الايدا جولاۋشىلارعا, سىرقاتتانعان نەمەسە دەنساۋلىعى ناشار ادامدار اۋرۋىنىڭ اسقىنۋىنان قاۋىپتەنسە جانە دارىگەر ۇزاق ۋاقىت بويى اشىعۋدان دەنساۋلىعى كۇرت ناشارلاپ كەتۋى مۇمكىن دەگەن شەشىم قابىلداسا, سونداي-اق جۇكتى نەمەسە ومىراۋدا بالاسى بار ايەلدەرگە ورازا تۇتۋدى كەيىنگە قالدىرۋعا شاريعات مۇرسات بەرەدى», دەدى ناۋرىزباي قاجى تاعان ۇلى.
قازاقستان مۇسىلماندارى ءدىني باسقارماسىنىڭ باسشىسى ەلىمىزدەگى توتەنشە جاعدايعا بايلانىستى قاسيەتتى رامازان ايىندا ىندەتتىڭ تارالۋىنىڭ الدىن الۋ ماقساتىندا كارانتين مەرزىمىندە تاراۋىق نامازى مەشىتتەردە جاماعاتپەن وقىلمايتىنىن مالىمدەدى. «تاراۋىق نامازىن اركىم ءوز شاڭىراعىندا وتباسى مۇشەلەرىمەن وقۋىنا كەڭەس بەرەمىز. ءبىز وسىلاي وقشاۋلانۋ ارقىلى جۇقپالى ىندەتتى جەڭەمىز», دەدى ناۋرىزباي قاجى.
سونىمەن قاتار باس ءمۇفتي كارانتين كەزىندە اۋىزاشار بەرىلۋ بارىسىن ءتۇسىندىردى. «جۇقپالى ىندەتتىڭ تارالۋىنىڭ الدىن الۋ ماقساتىندا مەشىتتەردە, ءدامحانالاردا, قوعامدىق ورىنداردا جانە باسقا دا مەكەمەلەردە جينالىپ اۋىزاشار بەرۋدى ۋاقىتشا توقتاتۋعا شاقىرامىز. سوندىقتان كارانتين كۇندەرى اركىم ءوز شاڭىراعىندا اۋىزاشار وتكىزۋگە, كوپشىلىك ورىنداردا ء(دامحانا, مەيرامحانا) جينالماۋعا ۇندەيمىز», دەي كەلە, مەيرامحانالارعا تاپسىرىس بەرىپ, اۋىزى بەرىك ادامدارعا تاماق تاراتۋ, الەۋمەتتىك جاعدايى تومەن وتباسىلارعا ازىق-ت ۇلىك تاراتۋ ارقىلى اۋىز اشتىرۋ, اۋىزاشارعا جۇمسالاتىن شىعىنداردى ورازا ۇستاعان ادامدارعا قارجىلاي بەرۋ سەكىلدى ىزگى امالدارعا شاقىردى.
استانا جانە قازاقستان ءميتروپوليتى الەكساندر پراۆوسلاۆ حريستياندارىن قاسيەتتى پاسحامەن قۇتتىقتادى. «بيىل پاسحا مەيرامىن ءدىني قاۋىمنىڭ مۇشەلەرىنىڭ كوبىسى ءماجبۇرلى ءوز-ءوزىن وقشاۋلاۋ جاعدايىندا اتاپ وتەدى. ۇيدە دۇعا تىلەپ, ءدىني ادەبيەت وقىپ, عيبادات ەتۋ شارالارىن ترانسلياتسيالار ارقىلى قاراپ, ءبىز وسى مەيرامعا ورتاقتاسامىز», دەدى ورتالىق كوممۋنيكاتسيالار قىزمەتىندەگى بريفينگتە. سونىمەن قاتار ميتروپوليت پاسحا تۇنىندە «ەۋرازيا ءبىرىنشى» ارناسىندا مەيرامعا وراي ەلىمىزدىڭ باس شىركەۋىندە وتەتىن عيبادات ەتۋ شاراسىنان تىكەلەي ترانسلياتسيا وتەتىنىن ايتتى.
