كارى قۇرلىقتا رۋبيكون دەگەن وزەن بار, ب.ز.ب. 49 جىلى تسەزار كەشىپ وتكەن. قايتا جول باسىنا كەلمەسكە, كەرى اينالماسقا, كەزەڭدى قايتا وتكەرمەسكە بەكىنگەن جاننىڭ تاۋەكەلى - «رۋبيكوندى كەشىپ ءوتۋ».
ءبىز دە ءوز رۋبيكونىمىزدى كەشىپ ءوتىپ كەلەمىز. ۆيرۋس بارماعان ءبىرلى-جارىم ەل, بىرنەشە ارال عانا قالدى. ەلىمىزدە قالالاردى قويا تۇرعاندا, تۇتاس اۋىلدار كارانتين «تۇتقىنىنا» اينالدى. كۇشەيتىلگەن كارانتين رەجىمى كەلەسى كەزەڭىنە ۇزارتىلدى.
الەمنىڭ ءوز رۋبيكونىن كەشىپ ءوتىپ بارا جاتقانى ويىما فيلوسوف ۆلاديمير سولوۆەۆتىڭ «وزەنىن» سالدى.
مىنا نۇرلى دۇنيەدە ارمانى – بالا قۋعان باتپىراۋىقتاي شالعايعا كەتكەن, مۇراتى مەن ماقساتى – قاراشادا جولىققان قىز جۇرەگىندەي قۇپياعا اينالعان جىگىت بولىپتى. شارشاعان, شالدىققان, ازاپ كەشكەن, اداسقان, جولسوقتى بولعان سول جىگىتتىڭ الدىنان ءبىر كۇنى وتكەل بەرمەس وزەن شىعادى. تۇركەن وزەندى كەشىپ وتەرگە تالاپ تا, تاۋەكەل دە جوق, مۇزداي سۋى ميدى قۇرسارداي, سۇيەكتى سىزداتارداي, اعىنى – الماعايىپ زاماننىڭ الدامشى ءۇمىتى سەكىلدى الىپ قاشارداي. ءوز قايعىسىنىڭ قۇشاعىندا وزەن بويلاپ كەلە جاتقان سول جىگىت ءبىر كەزدە وزەننەن وتە الماي قۇسالانىپ تۇرعان كەيۋانانى كورەدى. كەيۋانا كوزىنىڭ جاسى ءوڭىرىن توزدىرىپ, ارعى بەتتە قالعان پرەزەنتىنە جەتە الماي تۇرعانىن ايتادى. ءوز ومىرىندە وزگەگە كورسەتەر ورنەك جوق, بەكەرگە وتكەن, زايا كەتكەن كوپ كۇننىڭ وتەۋى نەدە, بالكىم, وسى كەيۋانانى وزەننەن وتكەرسە, ءدۇريا دۇنيەدەگى دۇرىس شەشىمى سول بولار ما؟!.
وسى ويمەن الگى جىگىت كەيۋانانى ارقالاپ, وزەنگە قويىپ كەتەدى. وزەن قايتسىن, ءوز دەگەنىن قىلادى عوي. جويقىن اعىس جۇلقا تارتادى, سۋدىڭ سۋىعى سۇيەگىنەن وتەدى, كەيۋانانىڭ زىلدەي سالماعى موينىن كەسىپ بارادى. سونىڭ بارىنە توزگەن جىگىت كەڭ وزەندى كەشىپ كەلەدى, كەسىپ كەلەدى, ءبىر ساتتە ارقاسىنداعى جۇكتىڭ جەڭىلدەي باستاعانىن, اعىستىڭ سايابىرسىعانىن, سۋىقتىڭ قايتقانىن سەزىنەدى. وزەننىڭ ارعى بەتىنە ءوتىپ, كەيۋانانى تۇسىرگەندە, ونىڭ كۇن استىنداعى كۇنىكەيدەي كوز قانىپ بولماس كوركەم سۇلۋعا اينالىپ كەتكەنىن كورەدى.
ءبىزدىڭ رۋبيكون – وسى وزەن سەكىلدى, ارقامىزعا باتقان وسى كەزەڭدى ارقالاپ وتسەك, قازىرگى ۇرەي مەن قورقىنىشقا, استامشىلىق پەن الىمجەتتىلىككە, بەي-بەرەكەت باراقاتسىزدىققا تولى الەمىمىزدىڭ جاڭا سيپاتتاعى جارقىن دۇنيەگە, وزگەشە ءماندى وزگەرىسكە ۇشىراعان زامانعا, ادامزات پروگرەسىنىڭ جاڭا داۋىرىنە اينالعانىن كورەمىز.
بەتپەردە كيگەن كوكتەم. كوكتەمنىڭ جان ەلىتكەن جۇپار ءيىسى كەلەر كوركەم كۇندەردىڭ جازعان حاتى سەكىلدى. بالانىڭ قولىمەن جازىلعان.
