بۇل تۋرالى ۋنيۆەرسيتەتتىڭ ءباسپاسوز قىزمەتىنىڭ جەتەكشىسى جاندار اسان حابارلادى.
«وقۋ ورنىنىڭ بىلىكتى پسيحولوگ ماماندارىنان قۇرالعان توپ «وتباسى», «پسيحيكالىق ساۋلىق» جانە «وقۋ, موتيۆاتسيا جانە ءوزىن-ءوزى ىسكە اسىرۋى» باعىتتارى بويىنشا كەڭەس جۇرگىزبەك. قىزمەتتەردىڭ بارلىعى تەگىن», – دەپ اتاپ ءوتتى ءباسپاسوز قىزمەتىنىڭ جەتەكشىسى.
پسيحولوگتار ءوزىن-ءوزى وقشاۋلاۋ سيتۋاتسياسىندا وتباسى رەسۋرستارىن قولداۋ, ءارتۇرلى جاس ەرەكشەلىكتەرىندەگى بالالاردىڭ تاربيەسىنە بايلانىستى سۇراقتار, وتباسىنداعى زورلىق-زومبىلىق ارەكەتتەردى بولدىرماۋ, جۇمىسسىزدىق داعدارىسى, كارانتين كەزىندە ء«موبيلدى توپتارداعى» جۇمىس اتقارۋشى مامانداردىڭ كاسىبي-ەموتسيالىق قۇلدىراۋى سياقتى ساۋالدار توڭىرەگىندە كەڭەس بەرەدى.
سونىمەن قاتار ولار تۇلعانىڭ ونلاين-ساباققا پسيحولوگيالىق بەيىمدەلۋى, وقۋشىلاردا, ستۋدەنتتەردە وقۋعا دەگەن موتيۆاتسيانى قالىپتاستىرۋ, ستۋدەنتتەردىڭ ديپلوم جۇمىسىن قورعاۋعا پسيحولوگيالىق دايىندىعى, ينكليۋزيۆتى وقىتۋ ەرەكشەلىكتەرى جايىنداعى ماسەلەلەردى دە قاراستىرادى.
پسيحولوگيالىق كەڭەس جانە قولداۋ الۋ ءۇشىن وپەراتورلارعا قوڭىراۋ شالىپ, الدىن الا سۇرانىس قالدىرۋىڭىز كەرەك.
پسيحولوگيالىق قىزمەت دۇيسەنبى-جۇما كۇندەرى ساعات 9:00-18:00 ارالىعىندا جۇمىس ىستەيدى.
بايلانىس تەلەفوندارى: 8 775 309 00 01, 8 778 727 80 25.
الدىن الا جازىلۋدى سىزبەن حابارلاسقان وپەراتورلار قۇزىرەتتى ماماندارعا باعىتتايدى.
ايتا كەتەيىك, قازاق ۇلتتىق قىزدار پەداگوگيكالىق ۋنيۆەرسيتەتىنىڭ ستۋدەنتتەرى مەن وقىتۋشىلارى «UNIVER» اقپاراتتىق جۇيەسى ارقىلى پسيحولوگيالىق قولداۋ الۋعا مۇمكىندىكتەرى بار.
الماتى
