«رەسەي فەدەراتسياسىنىڭ سامارا وبلىسىمەن شەكاراداعى «سىرىم» اۆتووتكەلىندەگى سانيتارلىق-كارانتيندىك بەكەتتە ءبىزدىڭ ەپيدەميولوگ ماماندار قاشىقتىق تەرمومەتريا جانە ساۋالناما جۇرگىزۋ كەزىندە ازاماتتاردىڭ بىرىنەن دەنە قىزۋى كوتەرىلگەنىن انىقتاعان. ءسويتىپ, ءىس-ارەكەت الگوريتمىنە ساي ولار وقشاۋلانىپ, جەدەل جاردەم كولىگى شاقىرىلدى. بارلىق ەپيدەمياعا قارسى ءىس-شارالاردى ساقتاي وتىرىپ, اتالعان ازاماتتار پروۆيزورلىق ستاتسيونارعا جەتكىزىلىپ, كوروناۆيرۋس جۇقپاسىنا تالداۋ جاسالدى. دياگنوستيكالىق زەرتتەۋ ناتيجەسى بويىنشا COVID-19 دياگنوزى ناقتىلاندى. قازىرگى ۋاقىتتا وبلىستىق جۇقپالى اۋرۋلار اۋرۋحاناسىندا جەكە بوكستارعا ورنالاستىرىلدى» دەلىنگەن مەملەكەتتىك كوميسسيانىڭ شۇعىل شتابى تاراتقان مالىمدەمەدە.
قازىر ناۋقاستارمەن قارىم-قاتىناستا بولعان ادامدار انىقتالىپ, بارلىعى مەديتسينالىق باقىلاۋعا الىنعان. اۋرۋ وشاقتارىندا ەپيدزەرتتەۋ جۇمىستارى, «ۇلتتىق ساراپتاما ورتالىعى» وبلىستىق فيليالى دەزينفەكتسيا ورتالىعى ماماندارى دەزينفەكتسيالىق جۇمىستار جۇرگىزدى.
ايتا كەتەيىك, كەشە عانا ءدال وسى شەكارا بەكەتىندە ءدال وسىنداي جاعداي بولىپ, ەكى وزبەك جۇرگىزۋشىسى اۋرۋحاناعا جاتقىزىلعان بولاتىن. سونىمەن, باتىس قازاقستان وبلىسىندا COVID-19 كوروناۆيرۋس ينفەكتسياسىن جۇقتىرعان ادام سانى 6-عا جەتتى. ولاردىڭ ءبارى وبلىستىق جۇقپالى اۋرۋلار اۋرۋحاناسىنا ەم الۋدا.
باتىس قازاقستان
