ءداپ قازىر قازاقستاندىق جانكۇيەرلەردى وسى سۇراق قاتتى مازالاۋدا. سكابەلكا «بارىستىڭ» تىزگىنىن 2018 جىلى ۇستادى. ناتيجە جامان بولعان جوق. ەكى ماۋسىمدا دا جەرلەستەرىمىز چەرنىشەۆ ديۆيزيونىندا توپ جارىپ, شىعىس كونفەرەنتسياسىندا ەكىنشى ورىنعا تابان تىرەدى. ەكى رەتىندە دە پلەي-وفف دوداسىنىڭ ەكىنشى كەزەڭىنە شىقتى. تىپتەن, بيىل گاگارين كۋبوگىندا ودان دا زور كورسەتكىشكە قول جەتكىزۋگە شاق قالعان ەدى. بىراق كوروناۆيرۋسكە بايلانىستى «بارىس» باسەكەنى جالعاستىرۋدان باس تارتتى.
قازىرگى كەزدە شەتەلدىك جانە وتاندىق باق وكىلدەرى «نۇر-سۇلتاننىڭ «بارىس» كلۋبىنىڭ باس باپكەرى بولىپ كىمنىڭ تاعايىندالۋى مۇمكىن؟» دەگەن ساۋالدى سان-ساققا جۇگىرتۋدە. كوبىسى بۇل قىزمەتكە 45 جاستاعى رەسەيلىك مامان اندرەي نازاروۆتىڭ كەلگەنىن قالايتىن سەكىلدى. كەزىندە ۇلتتىق حوككەي ليگاسىنىڭ (ۇحل) بىرقاتار بەلدى كوماندالارىندا ونەر كورسەتكەن ول باپكەر رەتىندە دە تانىلىپ ۇلگەردى. 2014-2015 جانە 2015-2016 جىلدارداعى ماۋسىمدا «بارىستى» جاتتىقتىردى. 2014-2016 جىلدارى قازاقستان ۇلتتىق قۇراماسىنىڭ باس باپكەرى بولدى.
كوپتەگەن باسىلىمدار نۇر-سۇلتانعا اندرەي نازاروۆتىڭ كەلەتىنىنە سەنىمدى. ماسەلەن, «Championat.com.» سايتى «قازىرگى كەزدە «بارىستىڭ» باس باپكەرى قىزمەتىنەن نەگىزگى ۇمىتكەر رەتىندە اندرەي ۆيكتوروۆيچتىڭ ەسىمى اتالۋدا. ەگەر وسى اڭگىمە راستالسا, بۇل كلۋب باسشىلىعى تاراپىنان قابىلدانعان وتە ساۋاتتى شەشىم بولاتىنىنا كۇمانىمىز جوق. سەبەبى, ول «بارىستى» دا, قازاقستان قۇراماسىن دا جاقسى بىلەدى. سونىمەن قاتار نازاروۆ جاستارمەن جاقسى جۇمىس ىستەي الادى جانە دە جەرگىلىكتى ەرەكشەلىكتەردى جاقسى بىلەدى» دەپ جازدى.
