ايماقتار • 04 ءساۋىر، 2020

بقو: 108 مىڭ وقۋشى قاشىقتان وقيدى

25 رەتكورسەتىلدى

باتىس قازاقستان وبلىسى مەكتەپتەرىندەگى 14 مىڭنان استام مۇعالىمنىڭ 98،9%-ى كومپيۋتەرلىك قۇرىلعى، سمارتفونمەن قامتىلعان. قاشىقتان وقىتۋ جوسپارلانىپ وتىرعان IV توقسان قارساڭىندا 601 مۇعالىمگە ۋاقىتشا پايدالانۋعا كومپيۋتەر بەرىلدى.

باتىس قازاقستان وبلىستىق ءبىلىم باسقارماسى باسشىسى ايىمگۇل ءتىرجانوۆا وڭىردەگى 390 مەكتەپتە 108 مىڭنان استام وقۋشى بار ەكەنىن، وقۋ جىلىنىڭ قورىتىندى، ءتورتىنشى توقسانىن قاشىقتان وقىتۋعا دايىندىق پىسىقتالعانىن حابارلادى.

- وقۋشىلار ءۇشىن قاشىقتان وقىتۋ ءتۇرلى فورماتتا جۇرگىزىلەدى. ءبىرىنشى «ەلارنا»، «بالاپان» تەلەارنالارىندا جانە «قازاق راديوسى» تولقىنىندا ساباقتار بەرىلەدى. وسى ساباقتاردى كورىپ، تىڭداپ بولعان سوڭ مۇعالىم تۇسىندىرىلگەن جاڭا تاقىرىپتار بويىنشا وقۋشىلارمەن كەرى بايلانىس ورناتادى. كەرى بايلانىس ەلەكتروندىق جۋرنال بولعان جاعدايدا عانا ورناتىلادى. ەلەكتروندىق جۋرنال بولماعان جاعدايدا مۇعالىمدەر وزدەرىنىڭ ۋاقىتشا جۋرنالىندا وقۋشىلاردىڭ وقۋ ۇلگەرىمىن بەلگىلەپ وتىرادى، - دەيدى ايىمگۇل ءتىرجانوۆا.

ەلىمىزدە ء«Bilىm Media Group»، «كۇندەلىك»، «مەكتەپ ونلاين»، «دارىن ونلاين» ينتەرنەت پلاتفورمالارى مۇعالىمدەر مەن وقۋشىلارعا تەگىن قىزمەت ۇسىنىپ وتىر. مۇندا ءار ءپان بويىنشا بىرنەشە مىڭنان استام بەينەساباق ورنالاستىرىلعان. وسى رەسۋرستاردى پايدالانىپ، مۇعالىم وقۋشىلارعا ءتيىستى تاپسىرما بەرىپ، وقۋشىمەن كەرى بايلانىس جاسايدى جانە ساباقتىڭ قالاي وتكەنىن قورىتىندىلاپ وتىرادى.

«سونىمەن قاتار ۇيالى بايلانىس مۇمكىندىگىن پايدالانىپ ۋاتساپ، تەلەگرامم باسقا دا چاتتار، ەلەكتروندىق پوشتالار ارقىلى وقىتۋ ۇيىمداستىرىلادى» دەيدى باسقارما باسشىسى.

قاشىقتان وقىتۋعا كوشۋگە بايلانىستى ءبىلىم ۇيىمدارىنىڭ بالانسىندا تۇرعان كومپيۋتەرلەر پەداگوگتەر مەن مۇقتاج اتا-انالارعا ۋاقىتشا پايدالانۋ ءۇشىن بەرىلسە، ۇنەمدەلگەن قارجىدان كومپيۋتەر، نوۋتبۋك، پلانشەت ساتىپ الۋ دا كوزدەلگەن.

- بارلىق اۋداندىق جانە ورال قالالىق ءبىلىم بولىمدەرىنىڭ مالىمەتى بويىنشا وبلىستاعى وقۋشىلاردىڭ 91،5%-ىندا كومپيۋتەرلىك قۇرىلعى، سمارتفون بار. ولاردىڭ 86،9%-ى ينتەرنەتكە شىعا الادى. ال 9288 وقۋشىنىڭ كومپيۋتەرى جوق ەدى، قازىرگى تاڭدا ولاردىڭ 2554-ىنە مەكتەپتەردەگى كومپيۋتەر ۋاقىتشا پايدالانۋعا بەرىلدى، - دەيدى ايىمگۇل ءتىرجانوۆا.

ءوڭىر حالقىنىڭ تەڭ جارىمى تۇراتىن ورال قالاسىندا 50342 وقۋشى بار. بۇلاردىڭ ىشىندە از قامتىلعان جانە كوپبالالى وتباسىنىڭ بالالارىنا مەكتەپ تاراپىنان 779 كومپيۋتەر، 116 نوۋتبۋك بەرىلگەن. سونىمەن قاتار دەمەۋشىلەر ارقىلى كەيبىر وتباسىلارعا ينتەرنەت وتكىزىلىپ، 7 سمارتفون، 9 كومپيۋتەر، 7 تەلەديدار، 21 پلانشەت، 34 مودەم، 4 فلەشكا، 2 روۋتەر الىندى. ورال قالاسىندا 244 وقۋشىنىڭ ينتەرنەت جەلىسىنە قوسىلۋى ءۇشىن قاراجىلاي قولداۋ كورسەتىلگەن.

- ەلىمىزدە توتەنشە جاعدايعا بايلانىستى وقىتۋدىڭ جاڭا ءتۇرى ەنگىزىلىپ وتىر. سوندىقتان مۇعالىمنىڭ جۇمىسى كوبەيدى. بۇل كەزەڭدە وقۋشىلار مەن اتا-انالار دا ءوز ۇلەسىن قوسۋى قاجەت. وسى ۇشتىك بىرلەسە جۇمىس ىستەسە عانا قاشىقتىقتان وقىتۋ ناتيجەلى بولادى، - دەيدى باتىس قازاقستان وبلىستىق ءبىلىم باسقارماسىنىڭ باسشىسى ايىمگۇل ءتىرجانوۆا.

 

باتىس قازاقستان

سوڭعى جاڭالىقتار

Covid-19: تاعى 3 ادام كوز جۇمدى

كوروناۆيرۋس • كەشە

Covid-19: 184 ادام جازىلىپ شىقتى

كوروناۆيرۋس • كەشە

نۇكتە فيلوسوفياسى

رۋحانيات • كەشە

ۇقساس جاڭالىقتار