تۇرعىن ءۇي قۇرىلىس جيناق بانكى قاۋىپتى ينفەكتسيانىڭ تارالۋىنا بايلانىستى توتەنشە جاعداي ەنگىزىلگەن كەزدە ازاماتتاردى كارانتين ءتارتىبىن ساقتاپ, ۇيدە وتىرۋعا شاقىرادى. سونداي-اق بانك كليەنتتەرگە ىڭعايلى بولۋى ءۇشىن قىزمەتتى قاشىقتان الۋعا مۇمكىندىك بەرەتىن كانالدار جۇمىسىن كۇشەيتىپ وتىر. بۇدان بولەك جاقىن ارادا دەپوزيتتەردى ونلاين-اشۋ سەرۆيسىن ىسكە قوسۋدى جوسپارلاپ وتىر. ول بانك سايتى ارقىلى جۇمىس ىستەيتىن بولادى.
ەلدە توتەنشە جاعداي ەنگىزىلگەنگە دەيىن بۇل سەرۆيس پيلوت رەجيمدە سىناقتان وتكەن بولاتىن. سونىمەن قاتار قازىر بانكتىڭ ينتەرنەت-بانكينگ, ءموبيلدى قوسىمشا, WhatsApp جانە Telegram-كانالدار, تولەم تەرمينالدارى, 300 ءنومىرى بويىنشا پايدالاۋنعا بولاتىن IVR جۇيەسى سەكىلدى قاشىقتان قىزمەت كورسەتۋگە ارنالعان سەرۆيستەرى تاۋلىك بويى ىستەپ تۇر.
2020 جىلدىڭ 1 توقسانىندا تۇرعىن ءۇي قۇرىلىس جيناق بانكى سالىمشىلارى دەپوزيتتەرىنە 125 ملرد تەڭگە جينادى. جالپى العاندا, جىل باسىنان بەرى 93 508 جيناق شوتى اشىلعان. دەپوزيتتەرگە دەگەن مۇنداي ۇلكەن سۇرانىستىڭ سەبەبى – تەڭگەلەي بەرىلەتىن جانە ۇستەماقىسى بەكىتىلىپ قويعان نەسيەنىڭ قولجەتىمدىگى. دەپوزيتتەرىنە باستاپقى جارناعا دەپ اقشا جيناعان بانك كليەنتتەرى ءۇي ساتىپ الۋ ءۇشىن جىلدىق ۇستەماقىسى 2-8,5% ارالىعىنداعى نەسيە راسىمدەي الا الادى.
جىل باسىنان بەرى مۇنداي مۇمكىندىكتى تۇرعىن ءۇي قۇرىلىس جيناق بانكىنىڭ 7 592 كليەنتى پايدالانعان. قازىرگى ۋاقىتتا تقجب نەسيە قورجىنى 1, 034 تريلليون تەڭگەنى قۇرايدى. ال مەرزىمى بىتپەگەن زاەم سانى 160 000-دى قۇراپ وتىر. جىل باسىندا قويىلعان جوسپارلى كورسەتكىشتەردىڭ ءبارىن تۇرعىن ءۇي قۇرىلىس جيناق بانكى 100%-عا ورىندادى. سونداي-اق بانك زاەمشىلارىنىڭ نەسيە شارتتارىن, ءتارتىبىن ساقتاي الاتىندىعىن اتاپ ءوتۋ كەرەك. مۇنى NPL دەڭگەيىنىڭ تومەندىگىنەن (ۋاقتىلى وتەلمەگەن, تولەۋ مەرزىمىنى كەشىكتىرىلگەنىنە 90 كۇننەن اسقان) كورۋگە بولادى. قازىر بۇل كورسەتكىش 0,18%-دى قۇراپ وتىر, ال ەل بانكتەرىندەگى ورتا NPL 8%-عا تەڭ.
وسى جىلى بانك «باقىتتى وتباسى» باعدارلاماسىن جۇزەگە اسىرۋدى جالعاستىراتىن بولادى. جوبانىڭ ءبىرىنشى كەزەڭى ناتيجەلەرى بويىنشا 4 955 وتباسى باسپانالى بولعان ەدى. بۇدان بولەك 2020 جىلدىڭ 16 ناۋرىزىندا قازاقستاندا توتەنشە جاعداي جاريالانعانعا دەيىن بانك جاڭا 710 ءوتىنىشتى قابىلداپ, ماقۇلداپ ۇلگەردى. نەسيە وتىنىشتەرىن قابىلداۋ 2020 جىلدىڭ 15 ساۋىرىنەن كەيىن جالعاساتىن بولادى.
«اسكەري ءونىم» اياسىندا بانك جىل باسىنان بەرى 71 زاەم بەردى, بۇدان بولەك 75 نەسيە ماقۇلدانىپ, ولار بويىنشا اسكەري قىزمەتكەرلەر ءۇي ىزدەستىرىپ جاتىر. 129 ءوتىنىش قاراستىرىلۋ ۇستىندە.
قازىر 1,5 ميلليوننان استام قازاقستاندىق ازامات باسپانالى بولامىن دەپ تۇرعىن ءۇي قۇرىلىس جيناق بانكىندە اقشا جيناۋدا. ولاردىڭ شوتىنداعى جالپى سوما كولەمى 860,6 ملرد تەڭگەنى قۇرايدى.
