بۇل سۇراققا قوجا احمەت ياساۋي اتىنداعى حالىقارالىق قازاق-تۇرىك ۋنيۆەرسيتەتىنىڭ رەكتورى بولاتبەك سەرىكباي ۇلى جاۋاپ بەردى.
– قوجا احمەت ياساۋي اتىنداعى حالىقارالىق قازاق-تۇرىك ۋنيۆەرسيتەتى مەملەكەت باسشىسى قاسىم-جومارت كەمەل ۇلىنىڭ ەلىمىزدە توتەنشە جاعداي ەنگىزۋ تۋرالى جارلىعىنا بايلانىستى وقۋ پروتسەسىن تولىعىمەن قاشىقتان وقىتۋ رەجىمىنە اۋىستىرۋدى ءوز ۋاقىتىندا ءارى جوعارى دەڭگەيدە ۇيىمداستىردى. بۇعان ۋنيۆەرسيتەتىمىزدە سوڭعى 5 جىلدان بەرى ءساتتى جۇمىس جاسايتىن, ءارى ماگيستراتۋرا باعدارلاماسى بويىنشا تولىق اپپروباتسيادان وتكەن كازتەپ (قازاق تىلىندە قاشىقتىقتان ءبىلىم بەرۋ) قاشىقتان وقىتۋ جۇيەسى سەبەپ بولدى. بۇل جۇيە قاشىقتان وقىتۋ بويىنشا تۇركيا تاجىريبەسى نەگىزىندە تۇركيالىق ماماندارمەن بىرلەسە قۇرىلعان. وسى اقپاراتتىق جۇيەنىڭ اۋقىمى كەڭەيتىلىپ, 14-16 ناۋرىز كۇندەرى ارالىعىندا بارلىق فاكۋلتەتتەر جۇيەگە ينتەگراتسيالاندى, – دەيدى رەكتور.
ونىڭ ايتۋىنشا, قاشىقتان وقىتۋ جۇيەسىنە (https://dot.ayu.edu.kz/) وفلاين ءدارىس جۇرگىزۋ ءۇشىن MOODLE پلاتفورماسى, ال ونلاين ۆەبينارلار ءۇشىن جۇيەسىنە Zoom, Cisco Webex, BigBlueButton ۆيدەوكونفەرەنتسيا باعدارلامالارى ء«بىر تەرەزە» قاعيداسى نەگىزىندە ينتەگراتسيالانعان. قوسىمشا پلاتفورما رەتىندە Platonus جانە باسقا دا جۇيەلەر (Google hangouts, YouTube, Whatsap ت.ب.) قولدانىستا بار.
– قازىرگى تاڭدا 839 ءپان بويىنشا 1000 جۋىق وقىتۋشى-پروفەسسور قۇرامى 9500 ءبىلىم الۋشىعا قاشىقتان ءبىلىم بەرۋدە. جۇيەگە جوعارى تەحنولوگيالىق قولداۋ قامتاماسىز ەتۋ ماقساتىندا «بۇلتتىق-cloud» تەحنولوگيا قولدانىلدى جانە 1-ءساۋىر 2020ج. كۇنىنە ءبىر ۋاقىتتا ورتاشا ەسەپپەن 6000 قولدانۋشى جۇيەدە جۇمىس جاساۋدا. ۋنيۆەرسيتەتتە 19 ەلدەن 1404 شەتەل ازاماتى ءبىلىم الادى. ولاردان توتەنشە جاعداي جاريالاعاننان كەيىن ەلدەرىنە قايتقان 1042 ستۋدەنت تۇركيا, بولگاريا, ۆەنگريا, البانيا, بوسنيا-گەرتسەگوۆينا, كوسوۆو, ءازىربايجان, رەسەي سەكىلدى شەت ەلدەردەن قاشىقتان ەش كەدەرگىسىز (ۋاقىت ايىرماشىلىعىن ەسكەرمەگەندە) ءبىلىم الىپ جاتىر. بارلىق پاندەر بويىنشا ەلەكتروندى وقۋ-ادىستەمەلىك قۇرالدارى (سيللابۋستارى, لەكتسيالارى, قاجەتتى پرەزەنتاتسيالارى ت.ب.) جۇيەگە تولىق ەنگىزىلگەن. ۋنيۆەرسيتەتتىڭ كىتاپحاناسىنىڭ ەلەكتروندى كىتاپ قورى مەن 24 وقۋ-عىلىمي ەلەكتروندى رەسۋرس بازالارى ءبىلىم الۋشىلارعا 7/24 قولجەتىمدى. حالىقارالىق ۋنيۆەرسيتەت رەتىندە الەمنىڭ ەڭ ماڭىزدى عىلىمي مەتريكالىق قورلانىڭ ءبىرى- TUBITAK ULAKBIM (30 484 تولىق ءماتىندى عىلىمي جۋرنال, 87 ملن. بيبليوگرافيالىق ءماتىن, 3341 ستاندارت جانە تب.) رەسۋرستارى بىلىمگەرلەرگە ۇسىنىلدى, – دەيدى ب.سەرىكباي ۇلى.
رەكتوردىڭ مالىمدەۋىنشە, ءبىلىم الۋشىلارمەن كەرى بايلانىستى ورناتۋ ماقساتىندا Call ورتالىق جۇمىس ىستەيدى. سونىمەن قاتار ۋنيۆەرسيتەت جاتاقحانالارىندا قازىر 382 (ونىڭ 362 –شەتەلدىك) ستۋدەنت جەكە وقشاۋلانۋ شارتتارىندا قاشىقتان ءبىلىم الۋدا. دارىستەر جۇيە ارقىلى بەكىتىلگەن ساباق كەستەسىنە ساي جۇرگىزىلۋدە. كامپۋستار مەن جاتاقحانالار كەڭ جيىلىكتى ينتەرنەت جەلىسىمەن قامتىلعان (600- مبيت/س دەيىن).
