قالاي بولعاندا دا, ادامزات جوعالىپ كەتكەن جوق, امان قالدى. جانتۇرشىگەرلىك سۇمدىق سۇراپىل ۇرەيگە, تىكتەپ كەلگەن اجالعا تەك ادام بالاسىنا ءتان كۇرەسكەرلىك رۋحىنىڭ سابىر, ءتوزىم, ەرىك-جىگەر, پايىم-پاراساتى سياقتى قۇدىرەتتى قۇندىلىقتارىمەن قارسى تۇردى. ءبىزدىڭ اتا-بابامىزدان «بۇدان دا جامان كۇنىمىزدە تويعا بارعانبىز» دەگەن ءسوز قالعان. مۇنىڭ استارىندا اسپان اينالىپ جەرگە تۇسسە دە ءومىر ءسۇرۋدى توقتاتا المايمىز, قاسيەتتى جەر-انانى تاستاپ كەتە المايمىز دەگەن ۇستانىم جاتىر. بۇل بۇگىنگى تاڭدا بۇكىل الەمگە جايىلىپ بارا جاتقان كوروناۆيرۋس كەزىندە كۇندەلىكتى كۇنكورىس سالتىمىزدىڭ, ماقسات-مۇددەمىزدىڭ بارلىعىنان ۇستەم بولۋى ءتيىس. پرەزيدەنتىمىز قاسىم-جومارت توقاەۆتىڭ ەلىمىزدەگى توتەنشە جاعدايعا جانە مەملەكەتتىڭ داعدارىسقا قارسى ءىس-شارالارىنا بايلانىستى مالىمدەمەسىندەگى: «قازىر بۇكىل الەم بۇرىن-سوڭدى بولماعان كۇردەلى جاعدايمەن بەتپە-بەت كەلىپ وتىر... كوروناۆيرۋس – باتپانداپ كىرىپ, مىسقالداپ شىعاتىن قاۋىپتى دەرت», دەگەن ەسكەرتۋىن ەرتەلى-كەش ەستەن شىعارماۋىمىز كەرەك. ەل-جۇرتقا قاۋىپ ءتونىپ كەلە جاتقاندا, سول ەڭ باستى قازىنامىزدىڭ تۇتاستاي اماندىعى ءۇشىن تاڭدى اتىرىپ, كۇندى باتىرىپ, كۇن كەشە المايتىن بولساق, مىنا جارىق دۇنيەدە بارار جەر, باسار تاۋىمىز قالماي قالادى. ماسەلە وسىلاي قويىلىپ وتىرعان سىن ساعاتتا ەل پرەزيدەنتى قاسىم-جومارت توقاەۆ پەن ۇكىمەت تاراپىنان جۇزەگە اسىپ جاتقان شۇعىل شارالار – بىلگەنگە ءدال بۇگىن سۇيەنەر جالعىز سەنەرىمىز. بىزگە قالاتىنى, اۋا جايىلاتىن الىپ-قاشپا سوزدەردى اينالىپ وتەتىن ءتارتىپتى تاڭىرىدەي كورەتىن, كىسىلىكتى كىمگە دە تەڭ كورسەتەتىن تەكتىلىكپەن, ءۇمىت وتى تەڭ جاناتىن, تىلەك-نيەتى تەڭ ءتۇسىپ وتىراتىن ابىروي. بيلىك پەن بۇقارانىڭ ءبىر مەزگىلدە ءبىر-ءبىرىن بىردەي قولداپ وتىراتىن ابىرويى. ەگەر ءبىز مىنا قيىندىقتاردى ەڭسەرىپ, دامۋدىڭ جاڭا كەزەڭىنە اياق باسا بەرەمىز دەسەك, وسىنى قاپەردەن شىعارمايىق.
رەتى كەلگەندە ايتا كەتپەي بولماس. ۇكىمەتتىڭ قارجىلاي كومەگىن ايتقاندا, كەيبىرەۋدىڭ كورپەنى وزىنە قاراي تارتقىشتاۋى بايقالادى. انانى قويا تۇرۋ كەرەك, مىنانى توقتاتۋ كەرەك. بىزگە بەرىلسىن, اۋەلىسى وسىندا بولماسا, مەملەكەتتىڭ, حالىقتىڭ كۇنى شىعىپ, ايى باتپايتىن سياقتى. ەل باسىنا كۇن تۋعان ساتتە بيلىك سەن كاسىپكەرسىڭ, جۇمىسشىسىڭ, اناۋسىڭ-مىناۋسىڭ دەپ الالاپ, الاساپىران جاساي المايدى. ء«وزىم دەگەندە وگىز قارا كۇشىم بار» دەۋ, بىرتۇتاستىققا سىزات تۇسىرەتىن, وتكەن شاق. ءونىپ-وسەتىن وركەنيەتكە جات قىلىق. قوعامدى بىرەر كاسىپ يەلەرى, مەيلى ولاردىڭ مۇمكىندىكتەرى تەڭدەي تاسىپ جاتسا دا, قۇراي المايدى. مەملەكەتتىڭ كوشى حالىقتىڭ بىرتۇتاستىعىمەن عانا جاسالادى.
نەسىپبەك داۋتاي ۇلى,
جازۋشى, قازاقستاننىڭ ەڭبەك سىڭىرگەن قايراتكەرى
