جۇمىسىنان امالسىز ايىرىلعان, كاسىبىنەن قاعىلعان جۇرت نە ىستەرىن بىلمەي داعدارىپ قالعان بولاتىن. مىنە, ەلىمىزدەگى توتەنشە جاعدايعا جانە مەملەكەتتىڭ داعدارىسقا قارسى ءىس-شارالارىنا بايلانىستى پرەزيدەنت قاسىم-جومارت توقاەۆتىڭ مالىمدەمەسى ەلدىڭ وسىناۋ الاڭ كوڭىلىن باسىپ, قانداي قيىن كەزەڭ بولسا دا مەملەكەت تاراپىنان قولداۋ ەشقاشان توقتامايتىنىن انىق بايقاتتى.
شىنىندا قازىرگى كۇردەلى جاعداي ىرعالىپ-جىرعالۋدى كوتەرمەيدى. ناقتى ءارى باتىل ارەكەتتەر كەرەك. پرەزيدەنتتىڭ مالىمدەمەسى سونىسىمەن دە ماڭىزدى. ەندى ۇكىمەت, جەرگىلىكتى اتقارۋشى ورگاندار تاپسىرمالاردى تەزىرەك ءارى ساپالى جۇزەگە اسىرۋى ءتيىس. ارينە ءار ادامنىڭ دەنساۋلىعى ءوز قولىندا. بۇل تاراپتا مەملەكەت ادام دەنساۋلىعىن ساقتاۋدا بارلىق مۇمكىندىكتى جاساپ وتىر. مەملەكەت باسشىسى الەمدى جايلاعان ىندەتتىڭ قوعام دامۋىنا قانداي قيىندىقتار تۋدىرعانىن اتاپ ءوتىپ, ودان شىعۋدىڭ جولدارىن دا كورسەتىپ, مۇمكىندىكتەر جاساۋدا.
بۇل قيىندىقتان شىعۋ تەك مەملەكەتتىڭ عانا مىندەتى ەمەس. قيىندىقتى ەڭسەرۋگە ەل ازاماتتارىنىڭ بارلىعى اتسالىسۋى كەرەك. بىردە سۇيىكتى پايعامبارىمىز مۇحاممەدتەن (س.ع.س.) ءبىر كىسى: «ۋا, اللانىڭ ەلشىسى, ەڭ جاقسى ادام كىم؟» دەپ سۇراعاندا, ول: «ەڭ جاقسى ادام – قوعامعا, ەلگە پايداسى تيگەن پەندە» دەپ جاۋاپ بەرگەن ەكەن. شىنىندا قازىرگىدەي قىسىلتاياڭ ساتتە دۇربەلەڭ تۋدىرماي, حالىق مەملەكەتكە قولداۋ كورسەتۋى كەرەك. ياعني ءار ادامنىڭ قوعامعا, ەلگە پايداسى ءتيۋى كەرەك.
جالپى العاندا, ەلدىڭ ەكونوميكالىق دامۋىنىڭ لوكوموتيۆى اۋىل شارۋاشىلىعى سالاسى ەكەنى بەلگىلى. قازاقستان – اگرارلىق مەملەكەت. وسىنى ەستەن شىعارماۋىمىز قاجەت. سوندىقتان كوكتەمگى ەگىس ناۋقانىن ۋاقتىلى وتكىزۋ اسا ماڭىزدى. بۇعان بيۋدجەتتەن 70 ميلليارد تەڭگە بولىنەتىن بولدى. «كوكتەمنىڭ ءار كۇنى جىلعا ازىق» دەگەن, پرەزيدەنتتىڭ ەگىس ناۋقانىنا جاساعان قولداۋى شارۋا قاۋىمنىڭ تىرلىگىن باياندى ءارى تابىستى ەتە تۇسەتىنى ءسوزسىز. «ەڭبەك ەتپەسەڭ, ەلگە وكپەلەمە, ەگىن ەكپەسەڭ, جەرگە وكپەلەمە» دەگەن, بۇگىندە داۋلەتىن اسىرىپ, اسىعى الشىسىنان ءتۇسىپ وتىرعان شارۋاشىلىقتار جەتەرلىك. مىنە, وسى شارۋاشىلىقتار تىرشىلىگىن شاشىراتىپ الماۋى كەرەك.
قالاي ايتساق تا, ءبىز تاريحىمىزدا قانداي قيىندىقتار بولعانىن ءتۇسىنۋ ارقىلى عانا بولاشاقتىڭ قالاي بولاتىنىن ۇعىنا الامىز. ەندەشە قوعامداعى بەرەكە-بىرلىك كۇش-قۋاتىمىزدى ارتتىرا تۇسەتىنى انىق.
ءابدالى نۇراليەۆ,
سەنات دەپۋتاتى
