پرەزيدەنت توتەنشە جاعداي رەجىمىنىڭ قاشاندا ەكونوميكالىق, الەۋمەتتىك سالدارى بولاتىنىن جانە ول قازىردىڭ وزىندە كوپتەگەن سالاعا سالقىنىن تيگىزىپ ۇلگەرگەنىن ايتتى. شاعىن جانە ورتا بيزنەسى تۇرالاپ قالعان كاسىپكەرلەر قازىر مەملەكەتتىك قولداۋعا مۇقتاج. بۇل ورايدا قاسىم-جومارت توقاەۆ مەملەكەت تاراپىنان شاعىن جانە ورتا بيزنەسكە قولداۋ كورسەتۋ ءۇشىن بۇرىن-سوڭدى بولماعان شارالار قولعا الىناتىنىن دا اتاپ ايتتى. ماسەلەن, شوب وكىلدەرى بيىلعى 1 قازانعا دەيىن ەڭبەكاقى تولەۋ قورىنان ۇستالاتىن تابىس سالىعىنان بوساتىلاتىن بولدى. مۇنداي قولداۋ ساۋدا, كولىك قىزمەتى, قوناقۇي, تۋريزم جانە باسقا دا سالالاردى قامتيدى. بۇل بيزنەس وكىلدەرىنە جاسالعان زور قولداۋ بولارى انىق.
كوروناۆيرۋستىڭ وراسان زاردابىنا توتەپ بەرۋ مۇمكىن بولماعان سالالاردىڭ كوش باسىندا تۋريزم تۇر. ساراپشىلاردىڭ بولجامى بويىنشا سالا جۇمىسىنا تيگەن زالال 11 قىركۇيەكتەگى تەررورلىق ارەكەتتىڭ اتالمىش يندۋسترياعا تيگىزگەن زالالىنان بىرنەشە ەسەگە اسىپ تۇسكەن. سوعان قاراماستان, مەملەكەت تاراپىنان جاسالاتىن ناقتى قولداۋلاردىڭ ارقاسىندا پاندەميا اياقتالعان سوڭ وتاندىق تۋريزم اياعىنا نىق تۇرادى دەگەن سەنىم بار. وسى ماقساتتا تۋريزم سالاسىنداعى, سونداي-اق قوناقۇي جانە قوعامدىق تاماقتانۋ بويىنشا زاڭدى تۇلعالار مەن جەكە كاسىپكەرلەر سالىقتان بوساتىلادى. قازىرگى تاڭدا وتاندىق تۋريستىك كومپانيا وكىلدەرىنىڭ وتىنىشتەرى بويىنشا شىعىندارىن ەسەپتەپ, ولارعا قولداۋ كورسەتۋ شارالارى پىسىقتالىپ جاتىر.
مادەنيەت جانە سپورت مينيسترلىگى كوروناۆيرۋس سالقىنى تۋريزم سالاسىنا ءتيىپ, تۋروپەراتورلار جۇمىسىنا كەسىرىن تيگىزە باستاعان ۋاقىتتان باستاپ ولارعا قاراسۋدا. ماسەلەن, مەملەكەت الەم بويىنشا قاتەرلى ىندەت جىلدام تارالىپ جاتقان شاقتا سىرتتا جۇرگەن وتانداستارىمىزدى ەلگە الدىرۋدا ايتارلىقتاي شارۋا اتقاردى. تج جاريالانعاننان بەرى 5913 تۋريست ەلگە قايتارىلدى. ولاردىڭ بارلىعى دا ەلىمىزدىڭ سانيتارلىق رەگلامەنتىنە سايكەس تەكسەرۋدەن ءوتتى.
وزەكتى ماسەلەلەردىڭ ءبىرى جۇمىسپەن قامتۋعا بايلانىستى بولىپ وتىر. توتەنشە جاعداي مەن كارانتين رەجىمىنىڭ ەنگىزىلۋىنە بايلانىستى قالا سىرتىنان كەلىپ ءىرى مەگاپوليستەردە جۇمىس ىستەيتىندەردىڭ تىعىرىققا تىرەلىپ, جۇمىسسىزدار قاتارىن تولىقتىرىپ جاتقانىن ايتقان پرەزيدەنت «بيزنەستىڭ جول كارتاسى-2025» باعدارلاماسى اياسىندا ەڭبەكپەن قامتۋ جۇمىستارىن ۇيلەستىرۋدى تاپسىردى. مادەنيەت جانە سپورت مينيسترلىگى دە بۇل ىسكە بەلسەندى قاتىسادى. وسى رەتتە ەلىمىزدەگى كۋرورتتىق ايماقتاردىڭ ينفراقۇرىلىمىنا باعىتتالعان جوبالارىمىز بارشىلىق. ولار جۇزەگە اسسا 16 مىڭ ادامدى جۇمىسپەن قامتي الامىز.
پرەزيدەنت وسىناۋ قىسىلتاياڭ شاقتا سابىرلىق تانىتىپ, قولداۋ بىلدىرگەن قازاقستان حالقىنا العىس ءبىلدىردى. راسىمەن, توتەنشە جاعدايعا بايلانىستى كارانتين جاريالانعانىنا قاراماستان حالىقتىڭ رۋحىنىڭ ءبىر ساتكە بولسىن سىنباعانىنا كۇندەلىكتى كۋا بولىپ وتىرمىز. كوپتەگەن مەكەمەلەر قاۋىپسىزدىك ماقساتىندا قاشىقتان جۇمىس ىستەۋگە كوشتى. ەلىمىز ءۇشىن بۇل بۇرىن-سوڭدى جاپپاي قولدانىلماعان جاڭا ۇدەرىس ەكەنىنە قاراماستان ويداعىداي ءجۇرىپ جاتىر دەپ ايتا الامىز. مادەنيەت جانە ونەر سالاسى بويىنشا كادرلار دايارلايتىن وقۋ ورىندارى مەن ونەر, سپورت مەكتەپتەرى دە 6 ساۋىردەن باستاپ قاشىقتان ءبىلىم بەرۋگە كوشكەلى وتىر. وسى رەتتە ايتا كەتۋ كەرەك, قاشىقتان جۇمىس ىستەۋگە كوشكەن بارلىق مادەنيەت مەكەمەلەرى, وقۋ ورىندارى مەن مينيسترلىككە قاراستى ۇيىم قىزمەتكەرلەرىنىڭ جالاقاسى ساقتالادى.
جالپى قاشىقتان جۇمىس ىستەۋ دەگەن اتىنا قاراماستان, مادەنيەت پەن رۋحانياتقا باعىتتالعان ءىس-شارالار ءبىر ساتكە دە تولاستاعان جوق. تسيفرلى تەحنولوگيالاردىڭ جەتىستىگى ارقاسىندا مادەنيەت وشاقتارى كورەرمەندەرىن رەپەرتۋارىنداعى تاماشا تۋىندىلارىمەن ەل رۋحىن كوتەرۋدە. كورنەكتى ونەرتانۋشىلار مەن تانىمال ونەر يەلەرىنىڭ, جوو وقىتۋشىلارىنىڭ شەبەرلىك دارىستەرى ونلاين پلاتفورمالاردا بارلىعىنا قولجەتىمدى. مادەنيەت مينيسترلىگى ەلىمىزدىڭ كەز كەلگەن تۇرعىنى ۇيدەن شىقپاي-اق مۋزەيلەرگە ۆيرتۋالدى ساياحات جاساۋى, تەاترلاردىڭ قويىلىمىن, ونەر جۇلدىزدارىنىڭ كوتسەرتتەرىن ونلاين تاماشالاي الۋى مۇمكىندىگىن ۇيىمداستىردى. ءبىر عانا «كارانتيندەگى جۇلدىز», «ونلاين-ونەر» جوبالارى وتانداستارىمىزدىڭ جىلى لەبىزىنە يە بولىپ جاتقانىن اتاسام دا جەتكىلىكتى بولار. «حالىق قازىناسى» اتتى قۇرمانعازى اتىنداعى قازاق ۇلتتىق كونسەرۆاتورياسى مەن قازاق راديوسىنىڭ بىرلەسكەن جاڭا جوباسى تىكەلەي ەفيرگە شىعا باستادى.
رۋحاني ازىق الام دەيتىن ءاربىر ادام ءۇشىن ەلىمىزدەگى كىتاپحانالار ەلەكتروندى كىتاپتار قورىن ۇسىنىپ, مەملەكەتتىك مۇراعات ونلاين قىزمەت كورسەتۋگە كوشتى. مەملەكەتتىك ءتىلدى ۇيرەنەمىز دەۋشىلەرگە تەگىن ونلاين كۋرستار اشىلدى. ال ءتىل ساياساتى كوميتەتى تەرمين سوزدەر جاساۋعا «قازاقى تەرميندى حالىق جاسايدى» كونكۋرسىن جاريالاپ, ءالىپبيدى جەتىلدىرۋگە قاتىستى عالىمدارمەن ونلاين تالقىلاۋلار ۇيىمداستىردى. سپورت كوميتەتىنىڭ باستاماسىمەن سپورت ساڭلاقتارىنىڭ تاڭعى جاتتىعۋى الەۋمەتتىك جەلىلەردە تاراتىلىپ, كۇللى قازاقستاندىقتار چەمپيوندارمەن بىرگە جاتتىعۋ جاساۋ مۇمكىندىگىنە يە بولدى. سەرىك ساپيەۆ, ءاليا يۋسۋپوۆا, ۆاسيلي لەۆيت, ادىلبەك نيازىمبەتوۆتەرمەن وتكەن تىكەلەي ەفيردەگى سۇحباتتار كوپشىلىك كوڭىلىنەن شىقتى.
پرەزيدەنت مالىمدەمەسىندە ء«بىز – رۋحى اسقاق, بىرلىگى بەكەم, ەڭسەسى بيىك حالىقپىز. سوندىقتان بۇل سىناقتان دا سۇرىنبەي ءوتىپ, قيىندىقتى بىرگە ەڭسەرەمىز دەپ سەنەمىن» دەگەن سوزدەر بار. مينيسترلىكتىڭ باستاماسىمەن الەۋمەتتىك جەلىدە بەلگىلى ءانشى, حالىق ءارتىسى روزا رىمباەۆا جولداعان «بىرگە ەڭسەرەمىز» اتتى ەستافەتا از كۇننىڭ ىشىندە 500-دەن اسا ادامعا تارالىپ, بۇگىندە شەتەلدىك ونەر يەلەرى مەن زيالى قاۋىم دا قوسىلىپ جاتىر. بۇل دا بولسا قازاقستان حالقىنىڭ اۋىزبىرشىلىگى مەن بەرىك رۋحىنىڭ ءبىر سيپاتى بولار.
الاشتىڭ ارىسى ماعجان جۇماباەۆ «ەردىڭ ەلگە باعاسى قانى ءبىر بولۋدا ەمەس, جانى ءبىر بولۋدا; قۋانىش-قايعىسى ورتاق بولۋدا. ەردىڭ باعاسى ەلگە ەتكەن ەڭبەگىنىڭ زور ياكي كىشىلىگىندە ەمەس, ەل دەگەن جۇرەگىنىڭ تازا بولۋىندا; تىلەگىنىڭ ەلمەن ورتاق بولۋىندا» دەگەن اتالى ءسوز قالدىرىپ كەتكەن ەكەن. ەندەشە تورتكۇل دۇنيەنى دۇربەلەڭگە سالعان دەرتتى قارشاداي بالادان, قابىرعالى قارياعا دەيىن جۇمىلا ءجۇرىپ جەڭەتىن كۇن جاقىن بولعاي!
اقتوتى رايىمقۇلوۆا,
مادەنيەت جانە سپورت ءمينيسترى
