سپورت • 03 ءساۋىر، 2020

وليمپيادانىڭ كەيىنگە شەگەرىلۋى وڭاي تيمەيتىن ءتارىزدى

26 رەتكورسەتىلدى

جەر-جاھاندى جايلاعان كوروناۆيرۋستىڭ كەسىرىنەن بيىل توكيودا الاۋى تۇتانۋعا ءتيىس وليمپيا ويىندارى كەلەسى جىلى وتەتىن بولدى. ارينە، وسى كەلەڭسىز جاعداي سپورتشىلار قاۋىمىنا كوپتەگەن قولايسىزدىق تۋدىرىپ وتىر. ونىڭ كەرى اسەرى كوپ. ەڭ وكىنىشتىسى، ءتورت جىل بويى توگىلگەن تەر، ەسىل ەڭبەك ەش كەتۋى مۇمكىن. ولاي دەۋىمىزگە نەگىز، ءتۇرلى جاۋاپتى جارىستاردا جانىن سالىپ ايقاسىپ، جولداماعا يەلىك ەتكەن ءار سپورتشى عالامدىق دوداعا ناعىز بابىندا بارۋعا بارىن سالدى. ەندى ولارعا كەلەسى جىلدى كۇتۋگە تۋرا كەلەدى. ياعني، ءار ورەن تاعى 12 اي بويى دامىلسىز جاتتىعىپ، ءدۇبىرلى دودالاردا وزدەرىنىڭ مىقتىلىعىن پاش ەتۋگە ءتيىس.

اتى جامان اۋرۋ الەمدى شارلاعانعا دەيىن ءتۇرلى جارىستاردا تابىستى ونەر كور­سەتكەن قازاقستاننىڭ سپورتشىلارى 42 ليتسەنزيا الىپ ۇلگەردى. ەڭ كوپ جولدا­ما­نى بالۋاندار مەن بوكسشىلاردىڭ يە­­لەن­گەنى بەلگىلى. ارقايسىنىڭ ەنشى­سىن­­­دە سەگىز-توعىز ليتسەنزيادان بار. بىل­­تىر نۇر-سۇلتاندا وتكەن الەم چەم­­­پيو­ناتىندا گرەك-ريم كۇرەسىنەن
مەي­رام­بەك ايناعۇلوۆ (60 كيلو)، اسحات دىل­مۇحامەدوۆ (77 كيلو)، ەركىن كۇرەستەن نۇريسلام ساناەۆ (57 كيلو)، داۋلەت نياز­بەكوۆ (65 كيلو)، دانيار قايسانوۆ
(74 كيلو)، الىشەر ەرعالي (97 كيلو) جانە ايەل­دەر اراسىندا ۆالەنتينا يسلاموۆا (50 كيلو) مەن ەلميرا سىزدىقوۆا
(76 كيلو) سەكىلدى بالۋانداردىڭ باعى جان­دى.

ناۋرىز ايىنىڭ العاشقى جارتىسىندا امماندا اياقتالعان ىرىكتەۋ تۋرنيرىندە نادەجدا ريابەتس (75 كيلو)، ساكەن بيبوسىنوۆ (52 كيلو)، سەرىك تەمىرجانوۆ (57 كيلو)، زاكىر سافيۋللين (63 كيلو)، ابىلايحان ءجۇسىپوۆ (69 كيلو)، ءابىلحان امانقۇل (75 كيلو)، بەكزات نۇرداۋلەتوۆ (81 كيلو)، ۆاسيلي لەۆيت (91 كيلو) قام­شىبەك قوڭقاباەۆ (+91 كيلو) سىندى بىل­عارى قولعاپ شەبەرلەرىنىڭ اسىعى الشىسىنان ءتۇستى.

ۆەلوشاباندوزداردىڭ قورجىنىنا جەتى جولداما ءتۇستى. بۇل سپورت تۇرىندە ليتسەنزيالار جەكەلەگەن ادامعا بەرىلمەيدى. كۇن شىعىس ەلىنە ناقتى كىمدەردىڭ بارۋ­عا لايىقتى ەكەنىن انىقتاۋ ماسەلەسى ۇلت­تىق قۇراما باپكەرلەرىنىڭ قۇزىرىندا. سون­دىقتان دا الدىن الا تون پىشپەي، ما­مان­دار­دىڭ ناقتى شەشىمىن كۇتەيىك.

جەڭىل اتلەتتەر سايىسىندا گەورگي شەيكو، ايمان راتوۆا جانە ولگا رىپا­كو­ۆا ونەر كورسەتەدى. جۇزۋشىلەر جارىسىن­دا دميتري بالاندين مەن ۆيتالي حۋدياكوۆ شەبەرلىك بايقاسادى. سينحروندى جۇزۋدە ەگىز قىزدار – الەكساندرا مەن ەكاتەرينا نەميچكە سەنىم ارتامىز. ساداق اتۋدا سانجار مۇساەۆ، دەنيس گانكين جانە يلفات ابدۋللين سايىسقا تۇسەدى. مەرگەن­دەردىڭ «مايدانىندا» سارسەنگۇل رىسبە­كوۆا مەن يۋري يۋركوۆتىڭ تىلەۋىن تى­لەيمىز. بەسسايىسشىلار باسەكەسىندە پاۆەل يلياشەنكو مەن ەلەنا پوتاپەنكو بوي كورسەتەدى. سپورتتىق گيمناستيكا­دا ميلاد كاريمي ءوز ونەرىن پاش ەتە­دى. سو­نىمەن قاتار وليمپيادا باع­دار­لا­ما­سىنا جاڭادان عانا ەنگەن سپورت تۇر­لە­رىنەن دە قۇر قول ەمەسپىز. ول جولدا­ما­لاردىڭ يەگەرلەرى – قۇزعا ورمەلەۋشى ريشات حايبۋللين مەن كاراتەشى دارحان ءاسا­دىلوۆ.

توكيو وليمپياداسىنا جولداما ال­عان­­دار اراسىندا ءبىراز جاسقا كەلىپ قال­­عان ازاماتتار دا جوق ەمەس. سپورتتىق ولشەم بويىنشا ولاردى ارداگەرلەردىڭ سانا­تىنا جاتقىزۋعا بولادى. ماسەلەن، ءۇش قارعىپ سەكى­رۋدى سەرىك ەتكەن ولگا رىپاكوۆا ۇستى­مىز­دەگى جىلدىڭ 30 قاراشاسىندا 36 جاسقا تولعالى وتىر. ونىڭ ەسىمى ءۇش بىردەي وليمپيا ويىندارىندا جەڭىس تۇعىرىنا كوتە­رىلگەن جالعىز سپورتشى رەتىندە ەل تاريحىندا التىن ارىپتەرمەن جازۋلى. ەگەر رىپاكوۆا توكيودا دا جۇلدەگەرلەر سانا­تى­نا قوسىلسا، ارينە، نۇر ۇستىنە نۇر بولار ەدى.

بوكسشى زاكىر سافيۋللين مەن گرەك-ريم كۇرەسى شەبەرى اسحات دىلمۇحامەدوۆ تۇي­دەي قۇرداس. ەكەۋى دە 1986 جىلدىڭ تۋما­لارى. ءسوز جوق، ىرىكتەۋ سىندارىندا ولار وزدەرىن جاقسى قىرىنان كورسەتتى. توكيودا باق سىناۋ قۇرمەتىنە بولەندى.

بوكسشى ۆاسيلي لەۆيت – 32 جاستا، جەڭىل اتلەت گەورگي شەيكو مەن ەركىن كۇرەس شەبەرى داۋلەت نيازبەكوۆتىڭ جاسى 31-دە. بەسسايىسشى پاۆەل يلياشەنكو مەن ساداق اتۋشى دەنيس گانكين وردا بۇزار جاستا. وسىلاي تىزبەكتەي بەرسەك، ۇلت­تىق قۇراما ساپىندا «ەگدە تارتقان» ازا­ماتتاردىڭ از ەمەس ەكەنىن اڭعارامىز. 

بىراق امال نەشىك! كوروناۆيرۋس دەر­تى جەر-جاھاندى دۇرلىكتىرىپ، مىڭ­دا­عان جاندى جالماپ جاتقاندا حالىق­ار­ا­لىق وليمپيادا كوميتەتى (حوك) وس­ىنداي قادامعا بارۋعا ءماجبۇر بولدى. حوك-تىڭ بۇل شەشىمىن بارشا مەم­لەكەت باسشىلارى مەن لاۋازىم يە­لە­رى، ءتۇرلى ۇيىمدار مەن سپورتشىلار، تىپتەن قاراپايىم جانكۇيەرلەرگە دەيىن قولدادى. سەبەبى بۇل جالعاندا ادام­نىڭ ءومىرى مەن دەنساۋلىعىنان قۇندى ەش­نار­سە جوق. مىنە، وليمپيا ويىندارىن وتكىزۋ مەرزىمىن شەگەرۋ جونىندە شەشىم قا­بىلدار تۇستا حوك مۇشەلەرى ءداپ وسى ءپرين­تسيپتى باسشىلىققا الدى. ءبىز دە بۇل شە­شىمدى تولىقتاي قۇپتايمىز!

توكيو وليمپياداسىنىڭ جولداماسىنا يە­لىك ەتكەن وتانداستارىمىزدىڭ اراسىن­دا­عى ەڭ ەرەسەگى – مەرگەن يۋري يۋركوۆ. ول 37 جاستا. وزدەرىڭىز بايقا­عان­داي، شىمكەنت قالاسىنىڭ تۋماسىن ءبىز جوعا­رىد­اعى تىزىمگە قوسقان جوقپىز. ويتكەنى نىسانا كوزدەۋدە 40 جاستىڭ ءوزى ناعىز كەمەل­­دەنگەن شاق بولىپ سانالادى.

ءسوز ورايى كەلگەندە، كەزىندە وسى سپورت ءتۇ­رىنىڭ سەركەسى بولعان نورۆەگيالىق وسكار گومەر سۆاندى ەسكە الساق ەش ايى­بى جوق دەپ ويلايمىز. 1912 جىلى ستوكگولمدەگى جارىستىڭ جەكەلەگەن سايىسىندا ول قولا السا، كوماندالىق باسەكەدە الدىنا جان سالمادى. وسىلايشا 65 جاسقا قاراعان شاعىندا وسكاردىڭ ەسىمى ەڭ قارت وليمپيادا چەمپيونى رەتىندە تاريحتا قالدى. 1920 جىلى بەلگيانىڭ انتۆەرپەن قالاسىندا ۇيىمداستىرىلعان دودادا كۇمىس مەدالدى ەنشىلەپ، وليمپيادا جۇلدەگەرى اتانعان ەڭ قارت سپورتشى اتاندى. ول كەزدە وسكار 72 جاستان اسقان ەدى. سكانديناۆيالىق سۇرمەرگەن وليمپيا ويى­ندارىنا ءۇش مارتە قاتىسىپ، بارلىعى 3 التىن، 1 كۇمىس جانە 2 قولانى قورجىنعا سالدى. وسى تابىستارىنىڭ بارلىعىنا ول قارتايعان شاعىندا قول جەتكىزدى. مىنە، مەرگەن يۋري يۋركوۆتى ارداگەرلەر تىزىمىنە قوسپاعان سەبەبىمىز دە سول!

 

سوڭعى جاڭالىقتار

ۇقساس جاڭالىقتار