ايتا كەتۋ كەرەك, مەملەكەت باسشىسى مەن ۇكىمەت جاھاندىق قاۋىپ – كوروناۆيرۋس پاندەمياسى ەلىمىزگە جەتپەي تۇرىپ, ۆيرۋس ىندەتىنىڭ الدىن الۋعا قاتىستى كەشەندى جۇمىستاردى باستاپ تا كەتكەن ەدى. حالقىمىزدا «جاۋ ايتىپ كەلمەيدى» دەگەن بەينەلى ناقىل بار. سول ايتقانداي, عالامدانۋ زامانىندا كوروناۆيرۋستىڭ الاپات قيىندىق تۋعىزاتىنىن سەزسەك تە, ونىمەن كۇرەستىڭ اقىل مەن بىلىككە, بىرلىك پەن كۇش-جىگەرگە ارقا سۇيەيتىنىن جانە ونىڭ ۇيلەستىرۋشىسى – مەملەكەت ەكەنىن بايىپتاعانبىز.
الەمدىك دەڭگەيدە تاجىريبەسى مول, سارابدال تۇلعا ەلباسى دا حالىققا ارنالعان 20 ناۋرىزداعى ۇندەۋىندە: «وسىنداي اۋىر كەزەڭدە مەن بارلىق قازاقستاندىقتاردى ەل پرەزيدەنتى قاسىم-جومارت توقاەۆ پەن ۇكىمەت تاراپىنان ىسكە اسىرىلىپ جاتقان شۇعىل شارالاردى قولداۋعا شاقىرامىن. ماقسات – ءبىزدىڭ ازاماتتارىمىز بەن مەملەكەتىمىزدىڭ مۇددەسىن قورعاۋ» دەپ اتاپ كورسەتتى.
راسىندا, كوروناۆيرۋسقا شالدىققان العاشقى ناۋقاس انىقتالعان 13 ناۋرىزدان باستاپ ءاربىر كۇن, ءاربىر ساعات, ءاربىر مينۋت 18 ميلليون 400 مىڭعا جۋىقتاعان قازاقستان حالقى ءۇشىن زور سىناق بولىپ تۇر. مەملەكەت باسشىسى ايتقانداي, ء«بىز دۇربەلەڭ تۋدىرۋعا جول بەرمەيمىز. ءدال وسى كەزدە حالىق مەملەكەتكە قولداۋ كورسەتۋى كەرەك. بۇل اسا ماڭىزدى. كوروناۆيرۋس – باتپانداپ كىرىپ, مىسقالداپ شىعاتىن قاۋىپتى دەرت».
پرەزيدەنت ق.ك.توقاەۆتىڭ 31 ناۋرىز كۇنگى حالىققا ارنالعان مالىمدەمەسىندەگى مىنا تۇجىرىم مەن توقتامداردى ايرىقشا اتاعىمىز كەلەدى.
بىرىنشىدەن, مەملەكەتكە ەل سەنىم ارتتىراتىن جۇيەلى جۇمىستار كەشەنى ايقىندالدى.
ەكىنشىدەن, ەكونوميكالىق داعدارىسپەن جانە قيىندىقتارمەن كۇرەستىڭ ناقتى امالدارى بەلگىلەندى.
ۇشىنشىدەن, حالىققا, ونىڭ الەۋمەتتىك جاعىنان از قورعالعان بولىگىنە كومەكتەسۋدىڭ ورايلى جولى شەشىلدى.
تورتىنشىدەن, تىعىرىققا تىرەلگەن بينەستىڭ قولتىعىنان دەمەۋ جانە جۇمىسسسىزدىقتىڭ الدىن-الۋ شارالارى جاريا ەتىلدى.
بەسىنشىدەن, وتاندىق مەديتسيناعا جان-جاقتى مەملەكەتتىك قامقورلىقتىڭ تۇجىرىمداماسى جانە ءىزاشار ىستەرى شەگەلەندى.
التىنشىدان, حالىقتى ازىقپەن قامتاماسىز ەتەتىن اۋىل شارۋاشىلىعى جۇمىستارىنا, اسىرەسە كوكتەمگى ەگىس شارالارىنا شۇعىل, جۇيەلى كومەك كورسەتۋ تاپسىرمالارى ءمالىم ەتىلدى.
جەتىنشىدەن, داعدىرىستان شىعۋ جولىنداعى الەم مەن ەل, ورتالىق پەن ءوڭىر اراسىنداعى ماڭىزدى دا قاۋىرت ءىس-شارالاردىڭ ءجون-جوباسى ۇسىنىلدى.
مەملەكەت باسشىسىنىڭ: «ينفلياتسيانىڭ ارتۋىنا بايلانىستى زەينەتاقى, مەملەكەتتىك جاردەماقى جانە اتاۋلى الەۋمەتتىك كومەك مولشەرىن 10 پايىزعا يندەكساتسيالاۋدى تاپسىردىم. وسىعان وراي, اتالعان ساناتتاعى ازاماتتاردىڭ تابىسىن ارتتىرۋ ءۇشىن مەملەكەت تاراپىنان 200 ميلليارد تەڭگەدەن استام قاراجات بولىنەدى», سونداي-اق: «3 ميلليونعا جۋىق ازاماتىمىزعا قولداۋ كورسەتىلەدى. تۇرمىسقا قاجەتتى زاتتار مەن ازىق-ت ۇلىكتى تەگىن الاتىن ازاماتتاردىڭ قاتارى كوبەيەدى. مۇنداي كومەكتى مۇگەدەكتەر جانە جۇمىسسىز رەتىندە تىركەلگەن ازاماتتار دا يەلەنەدى» سەكىلدى قاداۋ-قاداۋ دايەكتەرى, «شاعىن جانە ورتا بيزنەس وكىلدەرىن بيىلعى 1 قازانعا دەيىن ەڭبەكاقى تولەۋ قورىنان ۇستالاتىن سالىقتان بوساتۋدى تاپسىرامىن», «كوكتەمگى ەگىس ناۋقانى ءۇشىن «قاراپايىم زاتتار ەكونوميكاسى» باعدارلاماسى ارقىلى قوسىمشا 100 ميلليارد تەڭگە ءبولۋدى تاپسىرامىن» ت.ب. ءجىتى قۇنتتاۋلارى وسى سالاداعى ميلليونداعان ازاماتتاردى جىگەرلەندىردى دەپ ەسەپتەيمىز.
ءبىز – جوعارى ءبىلىم سالاسىنىڭ ماماندارىمىز. سوندىقتان ەلدىڭ ءال-اۋقاتى مەن ەكونوميكاسىنا عىلىم كوزىمەن قاراۋ – مىندەتىمىز. بۇل تۇرعىدان كەلسەك تە, ۇندەۋدىڭ جۇيەلىلىگى مەن اۋقىمدىلىعى داعدارىس سالماعىن دا, سوعان بايلانىستى امال-تاسىلدەر الەۋەتىن دە ناقتى ءتۇسىندىرىپ تۇر.
ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى – 24 مىڭعا جۋىق ادامنان تۇراتىن ىرگەلى ۇجىم. مەملەكەت پەن ۇكىمەت تاپسىرماسىمەن بۇگىندە قاشىقتان وقىتۋدى ءساتتى جۇرگىزىپ جاتىرمىز. مۇنى جۇيەلەگەن ءبىلىم جانە عىلىم مينيسترلىگى بارشامىزدى ەلدىك مۇددە توڭىرەگىنە توپتاستىرا ءبىلدى.
وقىتۋشى-عالىمدارىمىز بەن ءبىلىم الۋشىلارىمىزدىڭ كوڭىل-كۇيى, ارمان-يەتى وتانىمىزدىڭ تىلەگىمەن ۇندەسەدى. ۇندەۋدە شىدامدىلىق, توزىمدىلىك, جاۋاپكەرشىلىك جايىن ەرەكشە ايتقان قاسىم-جومارت كەمەل ۇلىنىڭ «بۇل سىناقتان دا سۇرىنبەي ءوتىپ, قيىندىقتى بىرگە ەڭسەرەمىز!» دەگەن تۇجىرىمى ءبىزدى ودان سايىن سەرپىلتە تۇسەدى.
انىق جول, ايقىن جوسپار – ەلدىكتىڭ بەلگىسى. قازاقستان جولى وسىنى ايقىندايدى.
ەرلان سىدىقوۆ,
ل.ن.گۋميلەۆ اتىنداعى
ەۋرازيا ۇلتتىق ۋنيۆەرسيتەتىنىڭ
رەكتورى, اكادەميك
