«ەلدە كوروناۆيرۋس ىندەتىنە قارسى شارالار قولعا الىنىپ, ارنايى قۇرىلعان مەملەكەتتىك كوميسسيا جۇمىسىن باستاعان ساتتەن مادەنيەت جانە سپورت مينيسترلىگى شەت مەملەكەتتەردە جانە ەلىمىزدە جوسپارلانعان مادەني, سپورتتىق ءىس-شارالارىن شەكتەپ, قاۋىپسىزدىككە اسا ءمان بەردى. سپورتشىلارىمىز بەن ونەر قايراتكەرلەرىنىڭ شەتەلدەرگە شىعۋىنا دەر كەزىندە توقتاۋ قويىلىپ, بارلىق ەل ازاماتتارىنىڭ ساقتىق شارالارىنا نازار اۋدارۋعا شاقىردىق», - دەدى مينيستر.
ءمينيستردىڭ ايتۋىنشا, توتەننەن كەلگەن بۇل ىندەت قازىر تەك قازاقستان ەمەس, بارلىق الەم جۇرتىنىڭ جۇمىس جوسپارىنا, ءومىر ءسۇرۋ داعدىسىنا وزگەرىس ەنگىزۋگە ماجبۇرلەدى. كۇنى كەشە مەملەكەت باسشىسى قاسىم-جومارت توقاەۆ ەلىمىزدەگى توتەنشە جاعدايعا جانە مەملەكەتتىڭ داعدارىسقا قارسى ءىس-شارالارىنا بايلانىستى ارنايى مالىمدەمە جاساپ, الداعى ءىس-شارالار جوسپارىن بەكىتىپ بەردى.
سونداي-اق مينيستر بۇل شارالاردىڭ تياناقتى ورىندالىپ, ەلىمىزدىڭ وسى ءبىر قىسىلتاياڭ شاقتان قينالماي شىعۋىنا مادەنيەت جانە سپورت, تۋريزم وكىلدەرى بەلسەنە ات سالىساتىنىن جەتكىزدى. پرەزيدەنت ايتقان قولداۋلار قوعامنىڭ بارلىق سالاسىن قامتيتىن ساتتە ەشكىمنىڭ نازاردان تىس قالمايتىنىن اتاپ ءوتتى.
«مادەنيەت جانە سپورت مينيسترلىگى ونەر مەن سپورتتىڭ بارشاعا قولجەتىمدىلىگىن قامتاماسىز ەتۋ ماقساتىندا ونلاين نۇسقاداعى جۇمىس تارتىبىنە كوشتى. بارلىق رەسپۋبليكالىق ونەر وشاقتارى كەستەگە سايكەس كۇن سايىن قويىلىمدارىن, ونلاين رەجيمدە ءوز سايتتارىندا, YouTube ارنالارىندا جانە الەۋمەتتىك جەلىلەردە كورسەتىپ كەلەدى. جالپى رەسپۋبليكا بويىنشا مادەنيەت جانە سپورت مەكەمەلەرىنىڭ قىزمەتكەرلەرىنىڭ 90%-ى قاشىقتان جۇمىس رەجيمىنە اۋىستىرىلدى. كۇن سايىنعى تاڭعى 8-دەن باستاپ كەشكى 9-عا دەيىن مادەنيەت جانە سپورت وكىلدەرى قازاقستاندىقتارعا ۇيدەن شىقپاي, بوي جازۋ جاتتىعۋلارىن جاساپ, ءتۇرلى كەزدەسۋلەر, ونلاين لەكتسيالار, كونتسەرتتەر وتكىزىپ جاتىر», - دەدى مينيستر.
كەشكى ۋاقىتتا مادەنيەت مايتالماندارى كورەرمەندەرىمىزگە اسەم اندەرى مەن اۋەزدى كۇيلەرىن, كينو جانە تەاتر قويىلىمدارىن كورسەتىپ كەلەدى.
«جالپى مينيسترلىكتىڭ باستاماسىمەن قولعا الىنعان جاڭا فورماتتاعى جۇمىس ءتارتىبى بۇگىن دە جالعاسىپ, قازىر جەرگىلىكتى ونەرپازداردىڭ قاتىسۋىمەن ونلاين كەزدەسۋلەر, لەكتسيالار, كونتسەرتتەر دە ءوتىپ جاتىر. سوڭعى 10 كۇننىڭ ىشىندە 600-گە جۋىق ونلاين نۇسقاداعى شارالار وتكىزىلىپ كەلەدى», دەدى ا. رايىمقۇلوۆا.
