اننا ساۋەربرەي,
New-York Times
گەرمانيادا دا جاعداي ءدال سولاي. مەملەكەتتە جالپى كارانتين رەجىمى ەنگىزىلمەسە دە, مەكتەپتەر, دۇكەندەر, مەيرامحانالار مەن تەاترلار جابىق. ەكى ادامنان ارتىق جينالۋعا تىيىم سالىنعان. ەكونوميكالىق ءوسىم توقتاعاندىقتان, جۇمىس ورنى ازايا بەرمەك. ءتىپتى كانتسلەر انگەلا مەركەل دارىگەرى كوروناۆيرۋس جۇقتىرعانىن ەستىپ, ءوز-ءوزىن وقشاۋلادى (گەرمانيا كانتسلەرى كوروناۆيرۋستىڭ جاڭا ءتۇرىن انىقتاۋعا تەست تاپسىرىپ, ۆيرۋس جۇقتىرماعانى انىقتالدى).
28 ناۋرىزدا گەرمانيادا 56 202 ادامعا كوروناۆيرۋستىڭ جۇققانى انىقتالسا, 403 ناۋقاس باقيعا اتتانعان. وسىلايشا, ءولىم-ءجىتىم كورسەتكىشى 0,72 پايىزدى قۇراپ وتىر. سالىستىرىپ قاراساق, 10 مىڭنان استام ادام قازا تاپقان يتاليادا بۇل كورسەتكىش 10,8 پايىزدى قۇرايدى. يسپانيادا ءولىم-ءجىتىم كورسەتكىشى 8 پايىزعا جەتكەن. ۇلىبريتانيادا گەرمانياعا قاراعاندا ناۋقاستار سانى 3 ەسە از بولعانىمەن, قازا تاپقاندار سانى ەكى ەسە كوپ.
تاڭعالارلىق ستاتيستيكا. مۇنداي بىرەگەي وقيعاعا نە سەبەپ؟
ەڭ ءبىرىنشى سەبەپ – جالپى تەستىنى ەرتە جاساۋ. سونداي-اق ۆيرۋس جۇقتىرعانداردى ىزدەپ, تەز وقشاۋلاۋ. ماسەلەن, ەلدەگى ەڭ العاشقى جاعدايدى الىپ قارايىق. 28 قاڭتاردا ۋحاندا (قىتاي) ەكى زاۋىتى بار, اۆتوجابدىقتار شىعاراتىن باۆاريالىق كومپانيا قىزمەتكەرىنىڭ ۆيرۋس جۇقتىرعانى بەلگىلى بولدى. ەكى كۇن ىشىندە بيلىك قىزمەتكەرگە ۆيرۋس جۇقتىرعان ادامدى تاۋىپ, ونىمەن بايلانىستا بولعاننىڭ ءبارىن وقشاۋلادى. كومپانيا قىتايعا ءىسساپاردىڭ ءبارىن توقتاتىپ, باۆارياداعى زاۋىتىن جاپتى. تەست وڭ ناتيجە كورسەتكەن بىرنەشە قىزمەتكەر تەز وقشاۋلانىپ, ەپيدەميانىڭ تاراۋىنا توسقاۋىل جاسالدى. مۇنداي جاعداي ەلدىڭ باسقا بولىكتەرىندە دە قايتالاندى. جەرگىلىكتى دەنساۋلىق ساقتاۋ دەپارتامەنتتەرى مەن فەدەرالدى بيلىك ناۋقاستانعان ازاماتتاردى جىلدام انىقتاپ, وقشاۋلاۋ ءۇشىن تىزە قوسىپ جۇمىس ىستەدى.
سونداي-اق گەرمانيادا قاريا كىسىلەردىڭ باسىم بولىگى ۆيرۋس جۇقتىرعان جوق. قارتتاردىڭ ۇيىنە بارىپ قال-جاعدايىن سۇراۋعا تىيىم سالىنىپ, مەملەكەت ولارمەن كەز كەلگەن بايلانىس ءتۇرىن شەكتەيتىن زاڭ جوباسىن قابىلدادى. كوپتەگەن جاسى كەلگەن كىسىلەر وزدەرى وقشاۋلاندى. ناتيجە ايقىن. ناۋقاستاردىڭ اراسىندا جاسى 80-نەن اسقانداردىڭ ۇلەسى 3 پايىز عانا. جالپى, ەلدە مۇنداي قاريالار سانى 7 پايىزدى قۇرايدى. اۋىرعانداردىڭ ورتا جاسى – 46 جاستى قۇراسا, يتاليادا – 63 جاس.
گەرمانيادا ۆيرۋس جۇقتىرعان جاستاردىڭ سانى باسقا ەلدەرگە قاراعاندا اناعۇرلىم كوپ. بۇل – ەلدە جاپپاي تەست جاساۋعا بايلانىستى. سونىمەن قاتار كەزدەيسوقتىق پەن مادەنيەت تە اسەر ەتۋى مۇمكىن. گەرمانيا ازاماتتارى شاڭعى تەبۋگە قۇمار كەلەدى. قىسقى ماۋسىمدا شامامەن 14,5 ميلليون نەمىس شاڭعى تەبۋگە اۋستريانىڭ جانە يتاليانىڭ سولتۇستىگىندە ورنالاسقان ءالپى تاۋلارىنا اسىعادى. بيىل ەۋروپاداعى ىندەت وشاعىنىڭ ءبىرى تيرولعا بارعان تۋريستەر ەلگە ۆيرۋستى اكەلدى.
كوكتەمگە تامان گەرمانيادا كارناۆال وتەدى. ەلدەگى اۋرۋدىڭ تاراۋىنا جاستار اراسىندا تانىمال وسى كارناۆال اسەر ەتتى.
«شاڭعى تەبۋ مەن كارناۆال انىقتالعانداردىڭ ورتا جاسى تومەن بولۋىنا اسەر ەتكەن سەكىلدى», دەيدى بۋندەستاگتىڭ مۇشەسى, دارىگەر كارل لاۋتەرباح. وسىلايشا ءولىم كورسەتكىشىنىڭ از كەزدەسۋىنە ەرتە تەست جاساۋ مەن ۆيرۋستىڭ جاستار اراسىندا كوپ تاراۋى اسەرىن تيگىزدى.
«ماڭىزدىسى – كىمدى جانە قانشا ادامدى تەكسەرۋ», دەيدى فرانكفۋرتتا كوروناۆيرۋستى انىقتايتىن زەرتحانانىڭ ديرەكتورى, ۆيرۋسولوگ مارتين شتيۋرمەر. جالپى, تەست جاساۋدى از جۇرگىزەتىن يتاليا سەكىلدى ەلدەردە ءولىم سانى وتە جوعارى.
ايتسە دە, قازىرگى ستاتيستيكاعا, اسىرەسە, ىندەت كەڭ تاراماي تۇرعان تۇستا مۇقيات قاراعان ءجون. گەرمانياداعى دەنساۋلىق ساقتاۋ جۇيەسىنىڭ جاقسى دامىپ, اۋىر ناۋقاستارعا ارنالعان توسەك سانى 100 مىڭ ەكەنىنە قاراماستان, ول ءالى تولىققاندى سىناقتان وتكەن جوق. ۆيرۋس جۇقتىرعاندار ەندى-ەندى اۋرۋحاناعا تۇسە باستادى. ورتا ەسەپپەن, جاعدايى اۋىر پاتسيەنت Covid-19 جۇقتىرعاننان كەيىن 30 كۇننەن سوڭ قايتىس بولادى. «گەرمانيا ەپيدەميانىڭ العاشقى ساتىسىندا تۇر. جاعداي قالاي ءوربيتىنىن ۋاقىت كورسەتەدى», دەدى روبەرت كوح ينستيتۋتىنىڭ پرەزيدەنتى لوتار ۆيلەر.
بالكىم, گەرمانيا ىندەتتىڭ الەمدىك كورسەتكىشىنەن قالىپ كەلە جاتۋى مۇمكىن. پىكىرلەر ءار الۋان. الداعى اپتادا دەنساۋلىق ساقتاۋ سالاسىنا تۇسەتىن كۇشتىڭ اۋقىمىنا بايلانىستى. «مەنىڭشە, يتالياداعىداي جاعدايعا تاپ كەلۋىمىز ەكىتالاي», دەيدى ستەفان ۆيلليح. ول – بەرليندەگى Charité ۋنيۆەرسيتەتى اۋرۋحاناسىنىڭ الەۋمەتتىك مەديتسينا, ەپيدەميولوگيا جانە دەنساۋلىق ساقتاۋ ەكونوميكاسى ينستيتۋتىنىڭ ديرەكتورى. ك.لاۋتەرباحتىڭ بولجامىنا سايكەس, گەرمانيادا ءولىم دەڭگەيى وسەدى. راسىندا, كەيىنگى بىرنەشە كۇندە بۇل كورسەتكىش 0,48 پايىزدان 0,72 پايىزعا جەتتى.
سونداي-اق دەنساۋلىق ساقتاۋ سالاسىنا كوپ كۇش تۇسەتىنى ازىردەن اڭعارىلا باستادى. اۋرۋحانالار مەن دارىگەرلەر ماسكا جانە باسقا قورعانىس جابدىقتارىنىڭ جەتىسپەي جاتقانىن ايتا باستادى. نەمىس مەديتسينا اسسوتسياتسياسى جاريالاعان قۇجاتتا گەرمانيادا اتقارىلىپ جاتقان جۇمىستارعا قاراماستان, بۇكىل ناۋقاستاردى ينتەنسيۆتى ەمدەۋگە كۇش جەتىسپەۋى مۇمكىن ەكەنى ايتىلعان.
قورىتا ايتقاندا, گەرمانيادان الاتىن ۇلگىمىز بار. بىراق ستاتيستيكالىق دەرەكتەرگە سەنىپ, شەشىم قابىلداۋعا اسىقپاۋ كەرەك.
اۋدارعان اباي اسانكەلدى ۇلى,
«Egemen Qazaqstan»
