ناقتى مالىمدەمەگە توقتالاتىن بولساق, ەڭ الدىمەن, بۇل – بۇگىنگى جاعدايدا تۋىنداپ وتىرعان الەۋمەتتىك ماسەلەلەردى شەشۋگە باعىتتالعان باستاما. كاسىپكەرلىككە, شاعىن جانە ورتا بيزنەسكە دەمەۋ شارالارى دەسەك تە بولادى. ونىمەن قوسا مالىمدەمەدە جاستاردىڭ دا ماسەلەسى شەت قالعان جوق. ءبارىمىز جاقسى بىلەتىندەي, ەلىمىزدىڭ نۇر-سۇلتان, الماتى, شىمكەنت سياقتى ۇلكەن قالالارى كارانتينگە جابىلىپ, كوپتەگەن كاسىپورىندار مەن مەكەمەنىڭ جۇمىسىن توقتاتۋعا تۋرا كەلدى. ونىڭ ىشىندە جاستار دا جۇمىسسىز قالدى. وسى قالالاردىڭ اكىمدىكتەرىنە ارنايى تاپسىرما بەرىلىپ, جۇمىسپەن قامتۋ ورتالىقتارىن دايىنداۋ قولعا الىناتىن بولدى. وسىلايشا, جاستاردىڭ, باسقا دا جۇمىسسىز ازاماتتارىمىزدىڭ جۇمىسقا ورنالاسۋىنا مۇمكىندىك جاسالماق.
ينفلياتسيانىڭ ارتۋىنا بايلانىستى زەينەتاقى, مەملەكەتتىك جاردەماقى جانە اتاۋلى الەۋمەتتىك كومەك مولشەرىن جىلدىق ولشەممەن العاندا 10 پايىزعا يندەكستەۋ تاپسىرىلدى. وسىعان وراي, حالىقتىڭ تابىسىن ارتتىرۋ ءۇشىن مەملەكەت تاراپىنان 200 ميلليارد تەڭگەدەن استام قاراجات بولىنەدى.
تۇرمىسقا قاجەتتى زاتتار مەن ازىق-ت ۇلىكتى تەگىن الاتىن ازاماتتاردىڭ ساناتى كەڭەيتىلەتىن بولدى. بۇعان 800 مىڭ ادام ىلىكپەك. بۇل پاندەميا كەزىندە قولعا الىنعان جاقسى باستاما دەپ ەسەپتەيمىن. 800 مىڭ ادام – بۇل دا ءبىر ۇلكەن قاۋىم. بۇگىنگىدەي قاۋىپ-قاتەر ارتقان كۇندەردە مەملەكەتتەگى ءار ادامنىڭ جاعدايى ماڭىزدى.
بيىلعى 23 ناۋرىزدا تابىسىنان ايىرىلعان ازاماتتارعا ەڭ تومەنگى جالاقى مولشەرىندە قولداۋ كورسەتىلەتىنى تۋرالى دا ايتىلدى. كومەك الاتىن ازاماتتاردىڭ ءتىزىمى دە كەڭەيتىلىپ جاتىر. بۇل جۇمىسسىز قالعان حالىق ءۇشىن كەرەك-اق.
قيىندىقتىڭ ۋاقىتشا ەكەنىن ءبارىمىز بىلەمىز. دەگەنمەن وسىنداي كەزدە دە حالىقتى قولداۋ, قيىن-قىستاۋ كەزەڭدە دەمەۋ ماڭىزدى. ويتكەنى ىندەتپەن كۇرەسكە حالىقتىڭ الەۋمەتتىك جاعدايىنا قامقورلىق تانىتۋ دا كىرەدى. «جۇمىلا كوتەرگەن جۇك جەڭىل» دەمەكشى, بىرلەسسەك بۇل سىناقتان دا وتەتىنىمىزگە سەنىمدىمىن.
گەننادي شيپوۆسكيح,
ءماجىلىس دەپۋتاتى
