ەكونوميكا • 01 ءساۋىر، 2020

بەنزين باعاسى ارزاندادى

1032 رەتكورسەتىلدى

2020 جىلدىڭ 1 ساۋىرىنەن باستاپ ءىرى جانارماي قۇيۋ ستانتسيالارىندا بەنزين جانە ديزەل وتىنىنىڭ بولشەك باعاسى تومەندەپ جاتىر. ناۋرىز ايىنان باستاپ بەنزين جانە ديزەل وتىنىنىڭ ىشكى نارىقتاعى كوتەرمە باعاسى تومەندەپ، شامامەن 10%-دى قۇرادى. بۇل تۋرالى اتامەكەن كاسىپكەرلەر پالاتاسى حابارلادى.

نەگىزگى سەبەپ – مۇناي جانە مۇناي ونىمدەرىنە الىمدىك باعا بەلگىلەۋدىڭ ءتۇسۋى، سونداي-اق ۇكىمەتتىڭ توتەنشە جاعداي كەزەڭىندە بيزنەستى قولداۋ بويىنشا شارالار پاكەتىن بەكىتۋى.  

سونىمەن قاتار قازاقستاندا بەنزين باعاسىنا بەنزين جانە ديزەل وتىنى بويىنشا اكتسيزدەلەتىن تاۋارلاردى وندىرۋشىلەردى اكتسيزدەردى تولەۋدەن بوساتۋ (31.12.2020 جىلعا دەيىن)  جانە رەسەيدەن قازاقستانعا بەنزين مەن ديزەل وتىنىن تەمىرجولمەن تاسىمالداۋعا تىيىم سالۋ اسەر ەتتى. ال مۇناي ونىمدەرىن شىعارۋعا كەدەندىك سالىققا كەلەتىن بولساق، بۇل باعىتتا نولگە تەڭەۋ جوسپارلانعان.  

قازىرگى تاڭدا ديزەل وتىنى ەلدىڭ بارلىق وڭىرىندە 7-8 تەڭگەگە ارزانداعان، ال اي-92 ماركالى بەنزينگە باعا وڭىرلەر بويىنشا ەڭ تومەنگى شەك – 150-155 تەڭگەگە جەتتى.

«اتامەكەن» ساراپشىلاردىڭ ايتۋىنشا، مۇناي جانە مۇناي ونىمدەرىنە الەمدىك تاۋار نارىقتارىندا باعالاردىڭ كۇرت تومەندەۋى  جاعدايىندا قازاقستاننان ەكسپورتتالاتىن مۇناي ونىمدەرى ەكونوميكاسىنىڭ تيىمدىلىگى تومەن.  

قازىرگى نارىقتىق احۋال قازاقستاننىڭ مۇناي سەكتورىنا وڭاي ءتيىپ جاتقان جوق. وتاندىق مۇنايدى ءوندىرۋدىڭ وزىندىك قۇنىن، سونداي-اق مۇنايدى كەن ورنىنان مۇناي نارىقتارىنا تاسىمالداۋعا جۇمسالعان شىعىندار جانە قازاقستان رەسپۋبليكاسىنىڭ قولدانىستاعى سالىق ستاۆكالارىن ەسەپكە الساق، مۇنايدى وتكىزۋدىڭ ەكونوميكالىق تيىمدىلىگى نولگە تەڭ.  

سايكەسىنشە قازاقستاندىق جەر قويناۋىن پايدالانۋشىلار الەمدىك نارىقتىڭ قىسپاعىندا قالىپ وتىر. جۋىق ارادا قازاقستاندىق مۇنايعا جاعىمسىز باعانىڭ قالىپتاسۋىنىڭ قاتەرى جوعارى.

اتالعان پروبلەماعا كانادانىڭ مۇناي وڭدەۋشى كاسىپورىندارى تاپ بولدى. مۇنداي جاعدايدا مۇنايشىلار مۇناي ءوندىرۋدى تولىعىمەن توقتاتۋعا ءماجبۇر بولادى. ال مۇنداي جايت كەن ورىندارىنداعى ءوندىرىستىڭ توقتاۋىنا، جۇمىس ورىندارىنىڭ قىسقارۋىنا اكەلەدى. قازاقستاننىڭ مۇناي سالاسىندا 150 مىڭنان استام قازاقستاندىق جۇمىسشى ەڭبەكتەنەدى.

سوڭعى جاڭالىقتار

ۇقساس جاڭالىقتار