ايماقتار • 01 ءساۋىر، 2020

الماتىداعى تەلەساباقتاردى ەڭ مىقتى مۇعالىمدەر جۇرگىزەدى

206 رەتكورسەتىلدى

بۇل تۋرالى بۇگىن الماتى قالاسى ءبىلىم باسقارماسىنىڭ باسشىسى ءلاززات جىلقىباەۆا مالىمدەدى.

قالالىق ءبىلىم باسقارماسىنىڭ جەتەكشىسى قاشىقتان ءبىلىم بەرۋ ماسەلەلەرىنە قاتىستى بريفينگ وتكىزىپ، مەكتەپ وقۋشىلارىن ونلاين وقىتۋدىڭ جاي-جاپسارىنا توقتالدى.

قاشىقتان ءدارىس بەرۋدى سىناۋ بارىسىندا مۇعالىمدەر مەن وقۋشىلاردىڭ 90 پايىزى ونلاين-بايلانىسقا شىعا العان.

سونىمەن 6 ساۋىردەن باستاپ الماتى قالاسىنىڭ بارلىق مەكتەپتەرى قاشىقتىقتان وقىتۋعا كوشەدى.

– قازىرگى ۋاقىتتا ءبىزدىڭ پەداگوگتار وقىتۋدىڭ جاڭا فورماتىنا   كوشۋدە وتە اۋقىمدى جۇمىستاردى اتقارىپ وتىر. مۇعالىمدەر وزدەرىنىڭ ساباق جوسپارلارى مەن دارىستەرىنە تولىقتاي وزگەرىس ەنگىزۋدە.

ءبىلىم باسقارماسى مەكتەپتەردە قاشىقتىقتان وقىتۋدى ۇيىمداستىرۋ ءۇشىن كۋرستار وتكىزىپ جاتىر.

ءبىلىم جانە عىلىم مينيسترلىگى ءبىلىملاند، دارىن.ونلاين، كۇندەلىك جانە باسقا دا ينتەرنەت پلاتفورمالارىنىڭ وقىتۋ كونتەنتىنە تەگىن قولجەتىمدىلىك  تۋرالى  كەلىسىمگە قول جەتكىزدى.

ارينە، تەحنيكالىق كومەك كورسەتۋدى ۇيىمداستىرۋ وتە ماڭىزدى ماسەلە. ءبىزدىڭ 276 مىڭعا جۋىق ستۋدەنتىمىز بەن پەداگوگتەرىمىز تەحنيكالىق جانە ادىستەمەلىك كومەكتى قاجەت ەتەدى، سوندىقتان ءار مەكتەپ، ءار كوللەدج، ءبىلىم بولىمدەرى،   ءبىلىم باسقارماسى جانە ءبىلىم جانە عىلىم مينيسترلىگى دەڭگەيىندە كولل-ورتالىقتار اشىلعان، – دەدى ءلاززات جىلقىباەۆا

ورتا ءبىلىم بەرۋدە قاشىقتىقتان وقىتۋدى  ۇيىمداستىرۋ الماتى قالاسىندا ەكى باعىتتان تۇرادى:

ءبىرىنشى باعىت – ينتەرنەت جۇيەسى ارقىلى، ساباق جۇرگىزۋگە بولاتىن moodle، Google classroom جانە باسقا دا پلاتفورمالار سەكىلدى ينتەرنەت پلاتفورمالارى ارقىلى جۇمىس.

بىراق، بۇل ينتەرنەت پلاتفورمالارىن پايدالانۋ ءۇشىن، ارينە، بىزگە ءتيىستى جابدىقتار قاجەت.

قاشىقتىقتان وقىتۋ ءۇشىن، وقۋشىلار مەن مۇعالىمدەرگە مەكتەپتەگى كومپيۋتەرلەردەن 10 مىڭ كومپيۋتەر جاۋاپتى ساقتاۋعا بەرىلدى. قالعان 3   مىڭنان استام وقۋشى، جانباسىنا قارجىلاندىرۋ شەڭبەرىندە قاراستىرىلعان قاراجاتتى ۇنەمدەۋ ەسەبىنەن، كومپيۋتەرلىك قۇرىلعىلاردى (نوۋتبۋكتەر، پلانشەتتەر)  قوسىمشا ساتىپ الۋ ەسەبىنەن قامتاماسىز ەتىلەدى.

مەكتەپ جاسىنداعى بالالارى تەك 1 دانا كومپتەرى بار كوپبالالى وتباسىلار دەمەۋشىلىك قاراجات ەسەبىنەن قوسىمشا كومپيۋتەرلىك تەحنيكامەن قامتاماسىز ەتىلەدى ء(بىر وتباسىدا 5 جانە ودان كوپ وقۋشى).

قازىرگى ۋاقىتتا ءبىلىم باسقارماسى «كسەلل»، «كازاحتەلەكوم» جانە «بيلاين» بايلانىس وپەراتورلارىنان ءار ءتۇرلى تاريفتىك جوسپارلاردى قوسۋعا قاتىستى تۇسكەن ۇسىنىستاردى جان-جاقتى قاراستىرىپ وتىر.

«كسەلل»، «بيلاين»، «تەلە2»، «التەل» ۇيالى بايلانىس وپەراتورلارى ارقىلى 714 مۇعالىم مەن 4 000 وتباسى  مەكتەپ وقۋشىلارىنىڭ ينتەرنەتكە قولجەتىمدىلىگىن «قازاقتەلەكوم» ارقىلى شەشۋ تۋرالى الدىن الا شەشىلىپ وتىر.

ەكىنشى قوسىمشا باعىت– بۇل تەلەارنالار ارقىلى وقىتۋ، تەلەديدار ساباقتارى. ءتورتىنشى توقساننىڭ باسىنان باستاپ 1–11 سىنىپ وقۋشىلارى ءۇشىن اپتاسىنا بەس كۇن «بالاپان» جانە «ەل-ارنا» تەلەارنالارىندا ساباقتار كورسەتىلەدى.

ءبىلىم باسقارماسى «الماتى» تەلەارناسىمەن بىرلەسىپ، 9 جانە 11-ءشى سىنىپ مەكتەپ تۇلەكتەرىنىڭ باعدارلامالىق ماتەريالدى ساپالى يگەرۋى ءۇشىن، تەلەارنالاردا كورسەتىلەتىن جاراتىلىستانۋ-ماتەماتيكالىق باعىتتاعى ساباقتاردى  قوسىمشا جازىپ جاتىر. سونىمەن قاتار،قر بجعم قازاقراديوسى-راديوارناسى ارقىلى وقىتۋ تۋرالى  كەلىسىمگە قول جەتكىزدى.

ءتورتىنشى توقساننىڭ باستالۋىنا ءساتتى دايىندالۋ ءۇشىن، بۇگىن، 01.04.2020 جىلى بۇكىل رەسپۋبليكا بويىنشا سىناق ساباقتارى وتكىزىلۋدە. نەگىزگى ماقساتى – جۇيەنىڭ قالاي جۇمىس جاسايتىندىعىن ءبىلۋ ءۇشىن، ولارمەن بايلانىس ورناتۋعا، تەستىلەۋگە، قاراپ شىعۋعا جانە وسى جۇيەنىڭ جۇمىسىمەن تانىسۋعا دايىندىق.

– بەيسەنبى كۇنى، ياعني 2 ساۋىرردە رەسپۋبليكا بويىنشا اتا-انالار جينالىسى وتەدى. ءبىزدىڭ مىندەتىمىز – اتا-انالارعا قاشىقتىقتان وقىتۋدىڭ قالاي ۇيىمداستىرىلاتىنىن، اتا-انالاردان قانداي كومەك قاجەت ەكەنىن جانە جالپى ەلىمىزدە وقۋ ۇدەرىسىنىڭ قالاي جۇرەتىنىن ءتۇسىندىرۋ.

جۇما كۇنى، 3 ساۋىردە  ەلىمىزدە  ينتەرنەت بايلانىسى ارقىلى، باسقا جۇيەلەر ارقىلى سىنىپ ساعاتتارىن وتكىزۋ جوسپارلانعان.

سونداي-اق، قاشىقتىقتان وقىتۋعا كوشۋگە بايلانىستى مۇعالىمدەردىڭ جالاقىسى وزگەرىسسىز قالاتىندىعىن، ستۋدەنتتەر دە شاكىرتاقى الاتىندىعىن حابارلايمىز.

قازىرگى ۋاقىتتا، وسى جاعدايدا اتا-انالاردىڭ قاتىسۋى وتە ماڭىزدى ءرول اتقاراتىنىن ايتقىم كەلەدى، سوندىقتان مەن بارلىق اتا-انالاردان شىدامدىلىق تانىتىپ، وقۋ ءۇردىسىنىڭ وسىلايشا ۇيىمداستىرىلۋىنا تۇسىنىستىكپەن قاراۋىن سۇرايمىن، – دەدى قالالىق ءبىلىم باسقارماسىنىڭ باسشىسى.

 

 

الماتى

سوڭعى جاڭالىقتار

ۇقساس جاڭالىقتار