وسى ارەكەتتىڭ تيىمدىلىگىنە وراي, الماتى قالاسى اكىمدىگىنىڭ ءباسپاسوز ورتالىعىندا قالالىق تۇرعىن ءۇي ساياساتى باسقارماسى باسشىسىنىڭ ورىنباسارى مەيىرجان وتىنشيەۆ ونلاين-بريفينگتە باق ساۋالدارىنا جاۋاپ بەردى.
رەسپۋبليكا بويىنشا ەڭ ءىرى تۇرعىن ءۇي قورى الماتى قالاسىندا. ونىڭ قۇرامىندا 800-دەن استام باسقارۋ ورگانى قىزمەت كورسەتەتىن شامامەن 8,5 مىڭ كوپپاتەرلى ءۇي, 23,5 مىڭ كىرەبەرىس جانە 4 مىڭ اۋلا بار.
– جۇمىس كولەمىنىڭ اۋقىمدىلىعى ەسكەرىلىپ, بارلىق اۋداندا زالالسىزداندىرۋ 3 كۇنگە ءبولىنىپ, ولاردىڭ جالپى سانىنىڭ كەم دەگەندە كۇنىنە 33%-ى قامتىلادى. وسىلايشا, كوپقاباتتى ۇيلەردىڭ كىرەبەرىستەرى مەن اۋلالارى كەستەگە سايكەس اپتاسىنا 2 رەت وڭدەلەدى.
جۇمىس كەستەسىنە كەلەتىن بولساق, زالالسىزداندىرۋدىڭ ءبىرىنشى كەزەڭىنىڭ تاجىريبەسىن ەسكەرە وتىرىپ, ءبىز ولاردى تۇزەتتىك. بۇگىنگى كۇنى ولار ۆەب-سايتتاردا جانە اۋداندىق اكىمدىكتەردىڭ الەۋمەتتىك جەلىلەردەگى رەسمي ەسەپتەرىندە قولجەتىمدى, سونىمەن قاتار كىرەبەرىستەر مەن اقپاراتتىق ستەندتەردە ورنالاسقان.
قازىرگى ۋاقىتتا جۇمىسقا شامامەن 70 بريگادا, 500-دەن استام ادام جۇمىلدىرىلعان, – دەدى م.وتىنشيەۆ.
كوپپاتەرلى تۇرعىن ۇيلەردى زالالسىزداندىرۋعا, وڭدەۋدە قولدانىلاتىن ونىمدەر سەرتيفيكاتتالعان جانە ولار ادامدار مەن ءۇي جانۋارلارى ءۇشىن قاۋىپسىز دەپ وتىر ماماندار. ول ونىمدەر مەديتسينالىق ۇيىمداردا, مەكتەپتەردە جانە بالالار مەكەمەلەرىندە, باكتەريالىق, ۆيرۋستىق, ساڭىراۋقۇلاق ەتيولوگياسىنىڭ, اسىرەسە قاۋىپتى جانە كارانتيندىك ينفەكتسيالاردىڭ وشاقتارىندا پروفيلاكتيكالىق دەزينفەكتسيا رەتىندە قولدانىلادى.
ولار قازاقستان رەسپۋبليكاسىندا جانە كەدەن وداعى اۋماعىندا قولدانۋعا رۇقسات ەتىلگەن, سونىمەن قاتار بىرىڭعاي سانيتارلىق-ەپيدەميولوگيالىق جانە گيگيەنالىق تالاپتارعا سايكەس كەلەدى, ست-KZ سەرتيفيكاتتارىنا يە.
بۇرىن حابارلانعانداي, قالا اكىمدىگى تۇرعىنداردى قولداۋدا بىرقاتار قوسىمشا شارالار قابىلدادى, سونىڭ ىشىندە الماتىلىقتار سۋمەن جابدىقتاۋ جانە سۋ تارتۋ قىزمەتتەرىنە («الماتى سۋ» مكك), جىلۋ جانە ىستىق سۋمەن جابدىقتاۋعا («الماتى جىلۋ جەلىلەرى» جشس) جانە ەلەكتر ەنەرگياسىنا («الماتىەنەرگوسبىت» جشس), گازبەن جابدىقتاۋ («قازترانسگاز ايماق» اق الماتى وندىرىستىك فيليالى) جانە تەلەفون بايلانىسىنا («الماتىتەلەكوم» اتد) تولەم جاساۋدى كەيىنگە قالدىردى. باسقارما باسشىسى وسى جونىندە دە ايتىپ ءوتتى.
– بۇل باستامانى ليفت ۇيىمدارى دا قولدادى. ولار قالا تۇرعىندارىنا ايىپپۇل سانكتسيالارىن قولدانباي, ەكى ايعا (ناۋرىز, ءساۋىر) تولەمدى كەيىنگە قالدىردى. وسىعان بايلانىستى, بۇگىندە تۇرعىندار تاراپىنان كوممۋنالدىق تولەمدەردى كەيىنگە قالدىرۋ جوندەۋ جانە قىزمەت كورسەتۋ اقىلارىنا دا قاتىستى ما دەگەن سۇراقتار ءجيى قويىلادى. تۇرعىن ءۇي ساياساتى باسقارماسى تاراپىنان اي سايىنعى جارنالار بولماعان كەزدە باسقارۋ ورگاندارىنىڭ قىزمەتىن قامتاماسىز ەتۋ مۇمكىن ەمەستىگىن تۇسىندىرەمىز.
تۇرعىن ءۇيدى جوندەۋ جانە كۇتىپ ۇستاۋ قورىنان اۋلا سىپىرۋشىلاردىڭ, كلينينگتىك كومپانيالاردىڭ ەڭبەكاقىسى, اۆاريالىق قىزمەتتەردىڭ, ليفتىلەر مەن كوتەرگىشتەر سياقتى قاۋىپتى تەحنيكالىق قۇرىلعىلارعا قىزمەت كورسەتەتىن ۇيىمداردىڭ شاقىرۋلارى, سونداي-اق كوندومينيۋمنىڭ تىنىس-تىرشىلىگىن قامتاماسىز ەتۋ جانە ورتاق م ۇلىكتى قاۋىپسىز پايدالانۋ, وندا ءتيىستى ءتارتىپتى ساقتاۋ, دەزقۇرالداردى پايدالانا وتىرىپ, سانيتارلىق ىلعالدى تازالاۋ ءۇشىن قاجەتتى باسقا دا شىعىندار تولەنەدى.
بۇل رەتتە, باسقارۋ ورگاندارىنا توتەنشە جاعدايدىڭ قولدانىلۋ كەزەڭىندە جارنالاردى كەيىنگە قالدىرۋدى كوزدەي وتىرىپ, كۇردەلى جوندەۋگە جارنالار جۇرگىزۋگە مۇمكىندىگى جوق مەنشىك يەلەرىنە ايىپپۇل سانكتسيالارىن قولدانباۋدى ۇسىنامىز, – دەدى قالالىق تۇرعىن ءۇي ساياساتى باسقارماسى باسشىسىنىڭ ورىنباسارى م.وتىنشيەۆ.
سونداي-اق تۇرعىن ءۇي-كوممۋنالدىق شارۋاشىلىعىن جاڭعىرتۋدىڭ مەملەكەتتىك باعدارلاماسى بويىنشا كوندومينيۋم وبەكتىسىنىڭ ورتاق مۇلكىنە كۇردەلى جوندەۋ جۇرگىزۋ بويىنشا قارىزدى وتەۋگە ارنالعان تولەمدەرگە قاتىستى مەنشىك يەلەرى دە كارانتين ۋاقىتىندا تولەمدەردىڭ مەرزىمىن ۇزارتا الادى. تولەۋ مۇمكىندىگى بولماعان جاعدايدا ايىپپۇل سانكتسيالارى قولدانىلمايدى.
