جەرگىلىكتى پوليتسيا تاراتقان مالىمەت بويىنشا جەرگىلىكتى دۇكەندەردىڭ ءبىرىنىڭ ماڭىندا باپكەر مەن بوگدە ءبىر ادام سوزگە كەلىسپەي, جانجالداسىپ قالادى. ونىڭ اقىرى توبەلەسكە ۇلاسادى. قارسىلاسىنىڭ اۋىر سوققىسىنان كەيىن كورچينسكيگە شۇيدەسىمەن اسفالتا قۇلاپ, ەسىنەن تانادى. باس-سۇيەگى سىنىپ, ميى قاتتى شايقالعان سەرگەي ۇزاق ۋاقىت جانساقتاۋ بولىمىندە جاتادى. تەك ارادا ءۇش اي وتكەننەن سوڭ ەسىن جيادى. دەسەك تە ءالى كۇنگە دەيىن تانىمال باپكەر اۋىر جاراقاتتاردان تولىقتاي ايىعا قويعان جوق.
كوپ ۇزاماي كۇدىكتى انىقتالدى. اۋىر قىلمىس جاساعان 39 جاستاعى كارەن ساركيسيان قرىمدا بوي تاسالاپ ءجۇردى. ۋكراينانىڭ قۇقىق قورعاۋ ورگاندارى ىزدەپ جاريالاعانىمەن, بىرازعا دەيىن ول ۇستاتپادى. 26 ناۋرىزدا ساركيسيان نيكولاەۆ قالاسىنا كەلىپ, پوليتسەيلەرگە ءوز ەركىمەن بەرىلدى. ازىرگە ول 60 كۇنگە قاماۋعا الىندى.
بۇل وقيعا جايىندا ءبىز بەكەر اڭىگىمەلەپ وتىرعان جوقپىز. 57 جاستاعى سەرگەي كورچينسكي كەزىندە قازاقستاندا ەڭبەك ەتىپ, «استانا ارلاندارى» كلۋبىن تاربيەلەدى. سول ماماننىڭ جەتەكشىلىگىمەن جەرلەستەرمىز 2013 جىلى دۇنيەجۇزىلىك بوكس سەرياسىنىڭ جەڭىمپازى اتانسا, كورچينسكيدىڭ ءوزى وسى جوبانىڭ ەڭ ۇزدىك باپكەرى دەپ تانىلدى.
